ސީއެސްސީގެ ރައީސް ކަމަށް ނާސިހު އައްޔަނު ކުރަން މަޖިލީހުން ރުހުންދީފި
ނާސިހު ވަނީ ހިންގުމުގެ ދާއިރާގައި 28 އަހަރާއި އެއް މަސް ދުވަހުގެ ތަޖުރިބާ ހޯއްދަވާފަ
ސިވިލް ސަރވިސް ކޮމިޝަން (ސީއެސްސީ) ގެ ރައީސް ކަމަށް އައްޔަނުކުރަން ފާސްކުރި މުހައްމަދު ނާސިހު
ސިވިލް ސަރވިސް ކޮމިޝަން (ސީއެސްސީ) ގެ ރައީސް ކަމަށް މުހައްމަދު ނާސިހު އައްޔަނު ކުރަން ރައްޔިތުންގެ މަޖިލީހުން ރުހުން ދީފިއެވެ.
އާދީއްތަ ދުވަހުގެ ޖަލްސާގައި ސީއެސްސީގެ ރައީސް ކަމަށް ނާސިހު އައްޔަނު ކުރަން 68 މެމްބަރުން ވޯޓު ދެއްވިއެވެ.
މީގެކުރިން ބްރޯޑްކާސްޓިން ކޮމިޝަން (ބްރޯޑްކޮމް)ގެ ސެކްރެޓަރީ ޖެނެރަލްކަން އަދާ ކުރެއްވި ނާސިހު ވަނީ ހިންގުމުގެ ދާއިރާގައި 28 އަހަރާއި އެއް މަސް ދުވަހުގެ ތަޖުރިބާ ހޯއްދަވާފައެވެ. އޭނާ ވަނީ މާސްޓަރސް އޮފް އިންޖިނިއަރިންގ އިން މަތީ ތައުލީމް ހާސިލު ކުރައްވާފައެވެ.
ކޮމިޝަންގެ ނައިބު ރައީސް ކަމަށް އައްޔަނު ކުރަން މަޖިލީހުން ރުހުން ދީފައިވަނީ އިބްރާހިމް ރަޝީދަށެވެ. އޭނާ ސީއެސްސީގެ ނައިބު ރައީސް ކަމަށް އައްޔަނު ކުރަން ފެންނަ ކަމަށް 68 މެމްބަރުން ވޯޓު ދެއްވިއެވެ.
އިބްރާހިމް ރަޝީދަކީ ޔުނިވަރސިޓީ އޮފް މައިސޫރުން ބެޗްލަރސް އޮފް އާރޓްސް އިން މަތީ ތައުލީމް ހާސިލު ކުރައްވާފައިވާ ބޭފުޅެކެވެ. އަދި ހިންގުމުގެ ދާއިރާގެ ތަޖުރިބާގެ މުއްދަތަށް ބަލާލާއިރު 10 އަހަރާއި 6 މަސް ދުވަހުގެ ތަޖުރިބާ ހޯއްދަވާފައިވެއެވެ.
ދެން ކޮމިޝަންގައި ތިއްބަވާ މެމްބަރުންނަކީ މި ދެބޭފުޅުންނާއި އެކު ކޮމިޝަނަށް އައްޔަނު ކުރެވުނު މުހައްމަދު ފަރުޝަތު އާއި ފާތިމަތު ޝަރީފެވެ. މި ހަތަރު ބޭފުޅުން މަގާމުގެ ހުވާކުރެއްވީ ބުރާސްފަތި ދުވަހުއެެވެ.
ދެން ކޮމިޝަންގައި ހުންނަވަނީ ކޮމިޝަންގެ މެމްބަރު ފާތިފަތު އާމިރާއެވެ.
