ރައީސްގެ ހަށިކޮޅުގައި ހުޅުޖަހަން ގޮވާލުމުން އެމްޑީޕީ އެކަން ކުށްވެރިކޮށްފި
6 ސެޕްޓެމްބަރު 2020 | އާދީއްތަ 10:09އެކަހަލަ ކަމަކަށް ހިތްވަރު ދިނުމަކީ އެމްޑީޕީ އިން އެއްވެސް ޙާލެއްގައި ބަލައިގަންނަ ޢަމަލުތަކެއް ނޫން
ދިވެހިރައްޔިތުންގެ ޕާޓީ
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހްގެ ހަށިކޮޅުގައި ހުޅުޖަހަން ގޮވާލުމުން އެމްޑީޕީ އެކަން ކުށްވެރިކޮށްފިއެވެ.
ރައީސްގެ ހަށިކޮޅުގައި ހުޅުޖަހަން ގޮވާލާ، ޗެނަލް13 އިން 3 ސެޕްޓެންބަރު 2020 ވީ ބުރާސްފަތި ދުވަހުގެ ރޭގެ ލައިވް ޕްރޮގްރާމެއްގައި ގެނެސްދިން ކޮންޓެންޓުގެ މައްސަލަގައި އެމްޑީޕީން ބުނީ އެއްވެސް އިންސާނެއްގެ ޖާނަށް ނުވަތަ މާލަށް ނުވަތަ ފުރާނައަށް ގެއްލުމެއް ދިނުމާއި، އެފަދަ ކަމެއް ހިންގުމަށް ގޮވާ، ހިތްވަރު ދިނުމަކީ އެމްޑީޕީ އިން އެއްވެސް ޙާލެއްގައި ބަލައިގަންނަ ޢަމަލުތަކެއް ނޫން ކަމަށެވެ. އަދި މިއީ އެއްވެސް ތަހުޒީބު މުޖުތަމަޢެއްގެ ތެރޭގައި ޤާނޫނީ ގޮތުން ހުއްދަ ކުރާ ކަމެއް ވެސް ނޫން ކަމަށެވެ.
ތަފާތު ސިޔާސީ ފިކުރާއި، ޚިޔާލު ފާޅުކުރުމާއި، މިނިވަން ނޫސްވެރި ކަމަކީ އެމްޑީޕީ އިސްވެ އޮވެ ނުހަނު ޤުރުބާނީ އާއި، ބުރަ މަސައްކަތުން ހޯދާފައިވާ ޙައްޤުތައް ކަމަށްވާއިރު، އެ ޙައްޤުތައް ޙިމާޔަތް ކުރުމުގައި އަބަދުވެސް އެމްޑީޕީ ދެމިއޮންނާނެ ކަމުގައި ބަޔާނުގައިވެއެވެ.
ރައީސް ސޯލިހުގެ ހަށިކޮޅުގައި ހުޅުޖަހަން ޕީޕީއެމްގެ ސަޕޯޓަރެއް ޗެނަލް13 ގެ ޕްރޮގްރާމެއްގައި ގޮވާލާފައިވާއިރު މީހުން މެރުން، މާރަމާރީ، ޓެރަރިޒަމް ލޭއޮހޮރުވުން ފަދަ ޖަރީމާތައް މޮޅު ނުވަތަ ރަނގަޅު ކަންކަން ކަމަށް ދޭހަވާ ގޮތަށް ބްރޯޑްކާސްޓް ކޮށްގެން ނުވާނެ ކަމަށް ބްރޯޑްކާސްޓް ކުރުމުގެ ކޯޑް އޮފް ކޮންޑަކްޓް ގައިވެއެވެ.
