ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހަށިކޮޅަށް ގެއްލުން ދިނުމަށާއި، އެމަނިކުފާނު އަވަހާރަކޮށްލަން ބަޔަކު ރާވާއިރު ފުލުހުން ހަނުތިބުމަކީ ރައްޔިތުން ބަލައިގަންނާނެ ކަމެއް ނޫން ކަމަށް ވިދާޅުވެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ނުރުހުން ފާޅުކުރައްވައިފިއެވެ.

ރައީސް ސޯލިހުގެ ހަށިކޮޅަށް ގެއްލުން ދިނުމަށް ހިތްވަރު ލިބޭ ވާހަކަ ލައިވް ކުރި މައްސަލައާއި ގުޅިގެން މެންބަރު ކުރެއްވި ޓުވީޓެއްގައިވަނީ ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހަށިކޮޅަށް ގެއްލުން ދިނުމަށާއި، އެމަނިކުފާނު އަވަހާރަކޮށްލަން ބަޔަކު ރާވާއިރު ފުލުހުން ހަނުތިބުމަކީ ރައްޔިތުން ބަލައިގަންނާނެ ކަމެއް ނޫން ކަމަށާއި މިކަމާއި ގުޅިގެން ފިޔަވަޅު އަޅަން ޖެހޭ ފަރާތްތަކަށް އަވަހަށް ފިޔަވަޅު އެޅުމަށް ގޮވާލައްވާފައެވެ.

ޝަހީމް މިހެން ވިދާޅުވެފައިވާއިރު ފުލުހުން ވަނީ މި މައްސަލައިގެ ތަހުގީގު ފަށާފައިވާކަމަށް ބުނެފައެވެ.

މި މައްސަލަ ފުލުހުން ތަހުގީގު ކުރާ ކަމަށް ބުނެފައިވާއިރު، އެ ލައިވް ގެނެސް ޗެނަލް13 އިން ބުނީ ބުރާސްފަތި ދުވަހުގެ މެންދުރު 13:00 ގައި ބްރޯޑްކާސްޓު ކުރި ރައްޔިތުންގެ އަޑު ޕްރޮގްރާމަށް ގުޅި ބައިވެރިޔަކު ރައީސް ސޯލިހަށް ނިސްބަތްކޮށް އޭނާ އަށް ފެންނަނީ އެމަނިކުފާނުގެ ހަށިކޮޅުގައި އަލިފާން ޖަހަން ކަމަށް ބުނި ބުނުމަކީ، އޭނާގެ އަމިއްލަ ހިޔާލުގެ މައްޗަށް ދެއްކި ވާހަކައެއް ކަމަށެވެ.

ޗެނަލް13 އިން ބުނީ އެމީހާ އެހެން ބުނުމާއެކު ވަގުތުން އެ ފޯނު ކޯލު މެދުކަނޑާލި ކަމަށެވެ. ނަމަވެސް އޭނާ އެހެން ބުނާ އަޑު ބްރޯޑްކާސްޓް ކުރެވިފައިވާތީ އެކަމަށް ބެލުންތެރިންގެ ކިބައިން ޗެނަލް13 އިން ވަނީ މައާފަށް އެދިފައެވެ.