ކުވެއިތުގެ ބަނދަރުން 2 މިލިއަން ފީފާ ތެޔޮ ބަރުކޮށްގެން ސްރިލަންކާގެ އިރުމަތިން 20 ނޯޓިކަލް މޭލު ދުރުން ދަތުރު ކޮށްފައި އަންނަނިކޮށް ރޯވި "ނިއު ޑައިމަންޑް" ޓޭންކަރު ލަންކާގެ ގޮނޑުދޮށާ ދުރަށް ޓޯވ ކުރުމުގެ މަސައްކަތް ފަށައިފިއެވެ.

ނިއު ޑައިމަންޑަކީ އިންޑިއާގެ އިންޑިއަން އޮއިލް ކޯރޕް (އައިއޯސީން) ޗާޓަރ ކޮށްގެން ގެނަ ތެޔޮ ޓޭންކަރެކެވެ. ތެޔޮ ޓޭންކަރުގައި އަލިފާން ހިފާފައިވަނީ އިންޑިއާ ކަނޑު ތެރެއަށް ޓޭންކަރު ވަދެ، ސްރިލަންކާގެ އިރުމަތިން 20 ނޯޓިކަލް މޭލު ދުރުން ދަތުރު ކޮށްފައި އަންނަނިކޮށް ކަމަށް ރޮއިޓަރސްގައި ރިޕޯޓް ކޮށްފައިވެއެވެ.

އަލިފާން ހިފިއިރު ޓޭންކަރުން 23 ފަޅުވެރިން ދަތުރު ކުރިއެވެ. އޭގެ ތެރޭގައި ހިމެނެނީ ފިލިޕީންސްގެ 18 މީހަކާއި، ގްރީކަށް ނިސްބަތްވާ 5 މީހެކެވެ. އަދި އޭގެ ތެރެއިން ފިލިޕީންސް މީހަކަށް ބޮޑެތި ޒަޙަމްތަކެއް ލިބިފައިވާއިރު، އޭނާ ލިބުނު ޒަޙަމްތަކުގެ ސަބަބުން މަރުވެފައިވާ ކަމަށް ރިޕޯޓްތައް ބުނެއެވެ.

ބީބީސީގައި ރިޕޯޓް ކޮށްފައިވާ ގޮތުން، އަލިފާން ހިފާފައިވަނީ ޓޭންކަރުގެ ފަހަތު ކޮޅުގައެވެ. އަދި ތެޔޮ ރައްކާކޮށްފައި ހުރި ކާރގޯ އޭރިއާގައި އަލިފާން ހިފާފައި ނުވާކަމަށް ރިޕޯޓްތައް ބުނެއެވެ. އެހެން ނަމަވެސް، ބޯޓުގެ އެ ސަރަޙައްދުގައި 2 މީޓަރުގެ "ކްރެކް"އެއް ފާހަގަވެފައިވާ ކަމަށް އިންޑިއާގެ އަސްކަރިއްޔާއާ ޙަވާލާދީ ބީބީސީގައި ރިޕޯޓް ކޮށްފައިވެއެވެ. އެއާއެކު، ޓޭންކަރުން ތެޔޮ ލީކުވެއްޖެނަމަ، މިއީ މުޅި ދުނިޔެއަށް ވެސް މިހާތަނަށް ދިމާވާނެ އެންމެ ބޮޑު ތިމާވެށީގެ އެއް ކާރިސާއަށް ވެގެންދާނެ ކަމަށް ބެލެވޭ ކަމަށް ރިޕޯޓްތައް ބުނެއެވެ. އެހެން ނަމަވެސް، މިހާތަނަށް އަދި ތެޔޮ ލީކުވާނެ ކަމަށް ބެލެވިފައިނުވާ ކަމަށް ވެސް އަސްކަރިއްޔާއިން ބުނެއެވެ.

އޭގެ އިތުރުން، މިވަގުތުގެ ޙާލަތަށް ބަލައި، ކަންކަން އެހާ ގޯސް ނޫން ކަމަށް ލަންކާގެ ޑިޒާސްޓަރ މެނޭޖްމަންޓް ސެންޓަރުގެ ވެރިޔާ ސުދަންތާ ރަނަސިންޙާ އާ ޙަވާލާދީ ބީބީސީގައި ރިޕޯޓް ކޮށްފައިވެއެވެ.

ބީބީސީގައި ރިޕޯޓް ކޮށްފައިވާ ގޮތުން، ޓޭންކަރު އޮޔާދާތީ ލަންކާގެ އަސްކަރިއްޔާއާއި، އިންޑިއާގެ ކޯސްޓްގާރޑު ގުޅިގެން ތެޔޮ ޓޭންކަރު ލަންކާގެ ގޮނޑުދޮށާ ވީހާ ވެސް ދުރަށް ޓޯވ ކުރުމުގެ މަސައްކަތް ދަނީ ކުރަމުންނެވެ. އަދި ހެލިކޮޕްޓަރާއި، ކެނަން ބޭނުންކޮށްގެން އަލިފާންގަނޑު ނިއްވާލުމުގެ މަސައްކަތް ވަނީ ކޮށްފައެވެ. އެގޮތުން އަލިފާންގަނޑު އެއްކޮށް ނިވާލެވުމުން، ބޯޓު އަދިވެސް ދުރަށް ޓޯވ ކުރުމަށްފަހު، އަޅަންޖެހޭ ރައްކާތެރިކަމުގެ ފިޔަވަޅުތައް އަޅާނެ ކަމަށް އަސްކަރިއްޔާ އިން ވަނީ ބުނެފައެވެ.