3 މަސްދުވަސް ފަަހުން އަނެއްކާވެސް ނިއުޒިލޭންޑްގައި ކޮވިޑްގެ މަރެއް

3 މަސްދުވަހަށް ފަހު ކޮވިޑް-19 ޖެހިގެން މީހަކު މަރުވެފައިވާކަމަށް ނިއުޒިލޭންޑުން ރިޕޯޓުކޮށްފިއެވެ.

ނިއުޒިލޭންޑްގެ ސިއްހީ ވުޒާރާއާއި ހަވާލާދީ ބައިނަލްއަގްވާމީ މީޑިއާ ރިޕޯޓުތައް ބުނާ ގޮތުން، އެ ގައުމުން ކޮވިޑް ޖެހިގެން މީހަކު މަރުވެފައިވަނީ 3 މަސްދުވަހަށް ވުރެ ގިނަ ދުވަސް ފަހުންނެވެ. ނިއުޒިލެންޑްގެ ޑިރެކްޓަރ ޖެނެރަލް އޮފް ހެލްތު އަޝްލޭ ބްލޫމްފީލްޑާއޮ ހަވާލާދީ މީޑިއާ ރިޕޯޓުތައް ބުނާގޮތުން، ފާއިތުވި 24 ގަޑިއިރު ތެރޭގައި އެގައުމުން ކޮވިޑްގެ އައު 3 ކޭސްވަނީ ރިޕޯޓުކޮށްފައެވެ. އޭގެތެރޭގައި އިންޑިއާއިން ދަތުރު ކުރި 2 މީހަކު ހިމެނޭކަމަށް ރިޕޯޓުތައް ބުނެއެވެ. ހޮސްޕިޓަލުގައި ޖުމްލަ 6 މީހަކަށް ފަރުވާދެމުން އަންނައިރު އޭގެތެރެއިން 2 މީހަކަަށް އައިސީޔޫގައި ފަރުވާދެމުން އަންނަކަމަށް އެންމެ ފަހުން ބޭއްވި ނޫސްވެރިންގެ ބައްދަލުވުމުގައި މައުލޫމާތު ހިއްސާކުރައްވަމުން ބްލޫމްފީލްޑާއޮ ވަނީ ވިދާޅުވެފައެވެ.

ފަސް މިލިޔަން މީހުންގެ އާބާދީއެއް އޮންނަ ނިއުޒިލެންޑަކީ ކޮވިޑް-19 ރޯގާ ފެތުރުން ކޮންޓްރޯލް ކުރުމުގައި ދުނިޔޭގައި ފާހަގަކޮށްލެވޭ ގައުމެކެވެ. އެގޮތުން އެގައުމުގެ ބޯޑަރު މިދިޔަ މާޗު މަހުގެ 19 ވަނަ ދުވަހު ބަންދުކުރިއިރު، ހަރުދަނާ ފިޔަވަޅުތަކެއް ވެސް ވަނީ އަޅާފައެވެ. އަދި އެކަން ދުނިޔޭގެ ސިއްހަތު ޖަމުޢިއްޔާ، ޑަބްލިޔުއެޗްއޯ އިންވެސް ވަނީ ފާހަގަކޮށްފައެވެ.

ނިއުޒިލެންޑްގައި ކޮވިޑް-19 ގެ ފުރަތަމަ ކޭސް ފެނިފައިވަނީ މިދިޔަ ފެބްރުއަރީ މަހުގެ ތެރޭގައެވެ. މިހާތަނަށް ނިއުޒިލެންޑްގައި ކޮވިޑް-19ށް ޕޮޒިޓިވް ވެފައިވަނީ 1،764 މީހުންނެވެ. މިއަދު ރިޕޯޓުކުރެވުނު މަރާއި އެކު ޖުމްލަ 23 މީހަކު ބަލީގައި މަރުވެފައިވާއިރު، މިހާތަނަށް 1630 މީހަކު ވަަނީ ބަލިން ފަސޭހަވެފައެވެ. އެކްޓިވް ކޭސްތަކުގެ އަދަދަކީ 112އެވެ.

މިހާރު ނިއުޒިލެންޑްގައި އަޅާފައިވާ ހަމައެކަނި ފިޔަވަޅަކީ، އެގައުމަށް އެތެރެވާ މީހުން މޮނީޓާ ކުރުމާއި، އެގައުމަށް އެތެރެވާ އެންމެން 14 ދުވަހުގެ ކަރަންޓީންގެ މުއްދަތު ފުރިހަމަ ކުރުމެވެ.