ޗައިނާއިން އަތްގަދަ ކުރަމުން ދަނިކޮށް އެމެރިކާގެ އަސްކަރީ ބޭސްއެއް ޕަލާއޫގައި ގާއިމުކުރަނީ

ޗައިނާއިން އަތްގަދަ ކުރަމުން ދަނިކޮށް އެމެރިކާގެ އަސްކަރީ ބޭސްއެއް ޕަލާއޫގައި ގާއިމުކުރަން އެ ގައުމުގެ ސަރުކާރުން ހުއްދަދީފިއެވެ.

އެގައުމުގެ ސަރުކާރާއި ހަވާލާދީ ބައިނަލްއަގްވާމީ މީޑިއާ ރިޕޯޓުތައް ބުނާގޮތުން، ޕެސިފިކްގައި ޗައިނާގެ ނުފޫޒު ގަދަކުރާ ދަނޑިވަޅެއްގައި ޕަލާއު ސަރުކާރުން އިސްނަގައިގެން ވަނީ އެމެރިކާގެ އަސްކަރީ މަރުކަޒެއް އެ ގައުމުގެ ސަރަހައްދުގައި ގާއިމްކުރުމަށް ހުއްދަދީފައެވެ. މަޝްރަހު ދިރާސާކުރާ ފަރާތްތަކުން ފާހަގަކުރާ ގޮތުގައި މިއީ ޗައިނާއިން އެގައުމުގެ އަތްދަށަށް އެކި ގައުމުތަށް ގެންދިއުމާއި ދެކޮޅަށް އެމެރިކާއިން ކުރާ މަސައްކަތައް ލިބުނު ވަރަށް ބޮޑު ކުރިއެރުމެކެވެ.

މިކަމާއި ގުޅޭ މަޝްވަރާތަކަށް އެމެރިކާގެ ޑިފެންސް ސެކްރެޓަރީ މާރކް އެސްޕަރ ޕަލާއޫއަށް ރަސްމީ ދަތުރުފުޅެއްގައި ވަޑައިގެންނެވިކަމަށް މީޑިއާ ރިޕޯޓުތައް ބުނެއެވެ. އަދި އޭނާ ވަނީ ޕެސިފިކް ސަރަހައްދުގައި ޗައިނާއިން ނުފޫޒުފޯރުވަން މަސައްކަތް ކުރާކަމުގެ ތުހުމަތުކޮށްފައެވެ. މަޝްވަރާގެ ބައްދަލުވުމަށް ފަަހު ޕަލާއުގެ ރައީސް ޓޮމީ ރެމެންގެސައު ވަނީ އެ ގައުމުގެ ސަރަހައްދުގައި އެމެރިކާގެ އަސްކަރީ މަރުކަޒެއް ގާއިމްކުރުމަށް 1500 ކިލޯމީޓަރުގެ ސަރަހައްދެއް ދޭނެކަމަށް ވިދާޅުވެފައެވެ.

އަދި ދެ ގައުމު ގުޅިގެން އަސްކަރީ ތަމްރީންކުރުމާއި މެދު ޕަލާއުގެ ރައީސް އެދިފައިވާކަމަށް މީޑިއާ ރިޕޯޓުތައް ބުނެއެވެ. އެ ގައުމުގެ ރައީސް އެމެރިކާގެ ޑިފެންސް ސެކްރެޓަރީއަށް މީގެކުރިން ފޮނުވި ސިޓީއެއްގައި ވަނީ، އެމެރިކާގެ އަސްކަރީ މަރުކަޒަކާއި އަސްކަރީ އެއާރފީލްޑް އަދި ޕޯޓް ފެސިލިޓީސް ގާއިމްކުރުމަށް ހުއްދަދިނުމަށް ތައްޔާރަށް އޮތްކަމަށް ވިދާޅުވެފައެވެ. އާބާދީ 22،000މީހުން ހިމެނޭއިރު، ކަނޑުގެ ސަރަހައްދު ބެލެހެއްޓުމަށް ގިނަ ގޮންޖެހުންތަކާއި ކުރިމަތިވާއިރު އެކަމުގައިވެސް އެމެރިކާގެ ކޯސްޓްގާޑުގެ އެހީތެރިކަމަށް ރެމެންގެސައު ވަނީ އެދިވަޑައިގަންނަވާފައެވެ.

މިނިވަން ދައުލަތެއްގެ ގޮތުގައި ޕަލާއު އޮތްއިރު، އެ ގައުމުގައި އަސްކަރިއްޔާ އެއް ނޯވެއެވެ. އަދި އެގައުމުގެ ސަލާމަތީ ކަންކަން ބެލެހެއްޓުމަށް މަތިކޮށްފައިވަނީ އެމެރިކާއާއެވެ. މިއީ މީގެކުރިން ހެދުނު އެއްބަސްވުމެއްގައި ހުރި ކަންތައްތަކެވެ. އެއްބަސްވުމުގައި ވާގޮތުން، އެމެރިކާގެ އަސްކަރިއްޔާއަށް ޕަލާއޫގެ ރަށްތަކަށް އެރުމުގެ ހުއްދައޮތް އިރު މިހާތަނަށް އެމެރިކާއިން އެގައުމުގެ ސިފައިން ޕަލާއޫގައި ދާއިމީގޮތެއްގައި ސްޓޭޝަންކޮށްފައި ނުވެއެވެ.