އެމްޓީސީސީން މިހާރު ވެސް އައްޑޫ ސިޓީގައި 370 މިލިއަން ރުފިޔާގެ ޕްރޮޖެކްޓް ކުރިއަށް އެބަގެންދޭ: އާޒިމް
3 ސެޕްޓެމްބަރު 2020 | ބުރާސްފަތި 17:38ޖުމްލަ 9 ޕްރޮޖެކްޓެއް އެ ސިޓީގައި މިހާރުވެސް ހިންގަމުންގެންދޭ
އެމްޓީސީސީގެ ސީއީއޯ އާދަމް އާޒިމް
އައްޑޫ ސިޓީގައި 370 މިލިއަން ރުފިޔާގެ ޕްރޮޖެކްޓް އެމްޓީސީސީން މިހާރުވެސް ހިންގަމުން އަންނަ ކަމަށް އެ ކުންފުނީގެ ސީއީއޯ އާދަމް އާޒިމް ވިދާޅުުވެއްޖެއެވެ.
ރާއްޖެޓީވީގެ "ގައުމީ ތަރައްޤީ" ޕްރޮގްރާމްގައި ވާހަކަ ދައްކަވަމުން އާޒިމް ވިދާޅުވީ އެކި މަރުހަލާތަކުގައި 370 މިލިއަން ރުފިޔާގެ ޕްރޮޖެކްޓުތައް އައްޑޫ ސިޓީގައި އެމްޓީސީސީން ހިންގަމުން އަންނައިރު، ބޮޑެތި ގިނަ މަސައްކަތްތަކެއް ކުރެވެމުން އަންނަ ކަމަށެވެ. އެގޮތުން ޖުމްލަ 9 ޕްރޮޖެކްޓެއް އެ ސިޓީގައި މިހާރު ވެސް ހިންގަމުންގެންދާ ކަމަށް އާޒިމް ވިދާޅުވިއެވެ.
އެމްޓީސީސީން މިވަގުތު ވެސް ކުރަމުން އަންނަ މަސައްކަތްތަކުގެ ތެރެއިން ހުޅުމީދު ބޮޑު މަގު ހެދުމުގެ މަސައްކަތާއި، މަރަދޫ ބަނދަރު ހެދުމުގެ މަސައްކަތް އަންނަނީ ބާރު ސްޕީޑެއްގައި ކުރިއަށް ގެންދަމުންނެވެ.
އާޒިމް ވިދާޅުވީ ޕްރޮޖެކްޓުތައް ކުރިއަށް ގެންދާއިރު، ރަށު ރައްޔިތުން ލަފަޔާއި، ދާއިރާގެ މެމްބަރުންގެ ލަފާ ލިބޭ ކަމަށާއި، އެ ފަރާތްތަކުގެ އެއްބާރުލުން ފުރިހަމަ އަށް ލިބޭ ކަމަށެވެ. އަދި އަމާޒަކީ އެމްޓީސީސީއާއި ހަވާލުކޮށްފައިވާ މަސައްކަތްތައް ރަނގަޅު ފެންވަރެއްގައި އަވަހަށް ނިންމާލުން ކަމަށް އާޒިމް ވިދާޅުވިއެވެ.
އެމްޓީސީސީން މިހާރު ވެސް އަންނަނީ ރާއްޖޭގެ އެކި ސަރަހައްދުތަކުގައި ސަރުކާރުން ހަވާލު ކޮށްފައިވާ ތަރައްގީގެ ގިނަ މަސައްކަތްތަކެއް ހަލުވިކަމާއެކު ކުރިއަށް ގެންދަމުންނެވެ.
