ކޮވިޑް-19 އާއި ގުޅިގެން އެސްއެމްއީ ޑިވެލޮޕްމެންޓް ފައިނޭންސް ކޯޕަރޭޝަން (އެސްޑީއެފްސީ) އިން ދޫކުރާ ލޯނުތައް 480 އަންހެނުންނަށް ދޫކޮށްފައިވާ ކަމަށް ފިނޭންސް މިނިސްޓްރީ އިން ބުނެފިއެވެ.

ފިނޭންސް އިން އާންމުކޮށްފައިވާ ތަފާސްހިސާބުތައް ދައްކާގޮތުން އޮގަސްޓް 29 ވަނަ ދުވަހުގެ ނިޔަލަށް އެސްޑީއެފްސީ އިން ވަނީ އަންހެން މަސައްކަތްތެރިންނަށް 102.9 މިލިއަން ރުފިޔާ ދޫކޮށްފައެވެ.

އެގޮތުން ލޯނަށް އެދި ހުށައަޅާފައިވާ އަންހެން މަސައްކަތްތެރިންގެ 389 ވިޔަފާރިއަކަށް 100.2 މިލިއަން ރުފިޔާ ދޫކޮށްފައިވާ އިރު، އަމިއްލަ މަސައްކަތްކުރާ 91 އަންހެނުންނަށް 2.7 މިލިއަން ރުފިޔާ ވަނީ ދޫކޮށްފައެވެ.

ފިނޭންސްގެ ތަފާސްހިސާބުތަކުން ދައްކާގޮތުން، 736 އަންހެނުން ވަނީ ލޯނަށް އެދި ހުށައަޅާފައެވެ. އެއީ 154.5 މިލިއަން ރުފިޔާގެ ލޯނުކަމަށް ފިނޭންސް އިން ބުނެއެވެ. ލޯނަށް އެދި ހުށައަޅާފައިވާ ފަރާތްތަކުގެ ތެރެއިން 493 ފަރާތަކީ ވިޔަފާރިތައް ކަމަށާއި 243 ފަރާތަކީ އަމިއްލަ މަސައްކަތްކުރާ ފަރާތްތައް ކަމަށް ފިނޭންސް އިން ބުނެއެވެ.

ކުދި ވިޔަފާރިއާއި މެދު ފަންތީގެ ވިޔަފާރިތަކަށް ޚާއްސަކޮށްގެން އުފެއްދި އެސްއެމްއީ ބޭންކުގެ ޚިދުމަތް ފަށާފައި ވަނީ މިދިޔަ އަހަރުގެ މާރޗް މަހުގެ ތެރޭގައެވެ. އެސްއެމްއީ ބޭންކުން ދޫކުރާ ލޯނުގެ 25 އިންސައްތަ ޙާއްސަކޮށްފައިވަނީ އަންހެން ވިޔަފާރިވެރިންނަށެވެ.

އެސްއެމްއީ ބޭންކް މެދުވެރިކޮށް އަންހެނުންނަށް ޙާއްސަ އިސްކަމެއްދީގެން ލޯނު ދޫކުރާއިރު ޒުވާނުންނާއި، އިތުރުން ނުކުޅެދުންތެރިކަން ހުންނަ މީހުންނަށްވެސް ޙާއްސަ އިސްކަމެއްދީގެން އަންނަނީ ލޯނު ދޫކުރަމުންނެވެ.