އޮގަސްޓް މަހު ރާއްޖެ އަށް ޒިޔާރާތް ކޮށްފައިވަނީ 7628 ފަތުރުވެރިން
2 ސެޕްޓެމްބަރު 2020 | ބުދަ 15:28މިދިޔަ މަހު ރާއްޖެއަށް އެވްރެޖްކޮށް ދުވާލެއްގެ މައްޗަށް 218 ފަތުރުވެރިން ވަނީ އައިސްފައި
ގަތަރު އެއާލައިންސް އިން ރާއްޖެއަށް ފަތުރުވެރިން ޒިޔާރާތް ކުރަނީ
ނިމި ދިޔަ އޮގަސްޓް މަހު ރާއްޖެއަށް 7628 ފަތުރުވެރިން ޒިޔާރާތް ކޮށްފައިވާ ކަމަށް އިމިގްރޭޝަނުން ބުނެފިއެވެ.
އިމިގްރޭޝަނުގެ ތަފާތު ހިސާބުތައް ދައްކާ ގޮތުންނަމަ، ރާއްޖޭގެ ބޯޑަރު ބަންދުކުރުމަށްފަހު އަލުން ހުޅުވާލުމާއިއެކު އެންމެ ގިނަ ފަތުރުވެރިން އައިސްފައިވަނީ ނިމިދިޔަ އޮގަސްޓް މަހުގައެވެ. އެގޮތުން މިދިޔަ މަހު ރާއްޖެއަށް އެވްރެޖްކޮށް ދުވާލެއްގެ މައްޗަށް 218 ފަތުރުވެރިން ވަނީ އައިސްފައެވެ. ޖުލައި މަހު އެވްރެޖްކޮށް ރާއްޖެއަށް ދުވާލެއްގެ މައްޗަށް އައި ފަތުރުވެރިންގެ އަދަދަކީ 100 އެވެ.
އިމިގްރޭޝަނުން އިތުރަށް ބުނީ ނިމިދިޔަ އޮގަސްޓް މަހު އެންމެ ގިނަ ފަތުރުވެރިން އައި ދުވަހުގެ އަދަދަކީ 373 ކަމަށެވެ. ޖުލައި މަހު އެންމެ ގިނަ ފަތުރުވެރިން އައި ދުވަހު އައި ފަތުރުވެރިންގެ އަދަދަކީ 218 އެވެ.
އޮގަސްޓް މަހު ރާއްޖެއަށް އެންމެ ގިނައިން ފަތުރުވެރިން ޒިޔާރާތް ކޮށްފައިވަނީ ޔުނައިޓެޑް އަރަބް އެމިރޭޓްސް (ޔޫއޭއީ) އިންނެވެ. އެގައުމުން 1627 މީހުން ވަނީ ރާއްޖެ އައިސްފައެވެ. ދެވަނަ އަށް އެންމެ ގިނައިން ފަތުރުވެރިން ޒިޔާރާތް ކުރީ އިނގިރޭސިވިލާތުންނެވެ. އެގައުމުން 715 ފަތުރުވެރިން ވަނީ ރާއްޖެ އައިސްފަ އެވެ. ތިންވަނަ އަށް އެންމެ ގިނައިން ފަތުރުވެރިން ރާއްޖެ އައިސްފައިވާ ގައުމަކީ އެމެރިކާ އެވެ. އެގައުމުން 674 ފަތުރުވެރިން ވަނީ އައިސްފައެވެ.
