މައުމޫން ތުރުކުރެއްވީ ނަސްރީނާގެ ހެދުން ކޮޅެއް ނޫން!
2 ސެޕްޓެމްބަރު 2020 | ބުދަ 13:27ރައީސް މައުމޫން ހޮސްޕިޓަލުގައި އެޑްމިޓް ކުރެއްވުމާއި އެކު އެންމެންގެ ނަޒަރު ހުއްޓިގެން ދިޔައީ އެމަނިކުފާނު ތުރުކުރައްވައިގެން އޮންނެވި ހެދުންކޮޅަށް
ކޮވިޑް-19 އަށް ޕޮޒިޓިވްވެ ރައީސް މައުމޫން ހޮސްޕިޓަލުގައި އެޑްމިޓް ކުރައްވާފައި ވަނިކޮށް
ކުރީގެ ރައީސް މައުމޫން އަބްދުލް ގައްޔޫމް ތުރުކުރައްވައިގެން އޮންނެވީ މެޑަމް ނަސްރީނާގެ ހެދުންކޮޅު ނޫން ކަމަށް އެމަނިކުފާނު ވިދާޅުވެއްޖެ އެވެ.
ކުރީގެ ރައީސް މައުމޫން އަބްދުލް ގައްޔޫމް ކޮވިޑް-19 އަށް ޕޮޒިޓިވްވެ ހޮސްޕިޓަލުގައި އެޑްމިޓް ކުރެއްވުމާއި އެކު އެންމެންގެ ނަޒަރު ހުއްޓިގެން ދިޔައީ އެމަނިކުފާނު ތުރުކުރައްވައިގެން އޮންނެވި ހެދުން ކޮޅަށެވެ. މާ ޖަހާފައިވާ އެ ހެދުންކޮޅު ބޮޑަށް ވައްތަރީ އަންހެން ކަނބަލުން ތުރުކުރައްވާ ކުރުތާއަކާއެވެ. އަދި އެ ހެދުމުގެ ފަހަތުގައިވާ ސިއްރަކީ އެ ދެމަފިރިންގެ ދުވަސްވީ ލޯބި ކަމަށް ބުނެ ބައެއް މީހުން ވަނީ ސޯޝަލް މީޑިއާގައި އެ ފޮޓޯތައް ހިއްސާ ކޮށްފައެވެ.
މައުމޫން ވަނީ އެ ފޮޓޯގެ ހަގީގަތް އާއްމުންނާ ހިއްސާ ކުރައްވާފައެވެ. ރައީސް މައުމޫން ވިދާޅުވީ، އެއީ އެމަނިކުފާނުގެ ހެދުން ކޮޅެއް ކަމަށެވެ. އަދި އެ ހެދުން ކޮޅަކީ މާޖެހި ފޮތީގެ ހެދުން ކޮޅެއް ކަމަށް މައުމޫން ވިދާޅުވިއެވެ.
ކުރީގެ ރައީސް މައުމޫނާއި އަނބިކަނބަލުން ނަސްރީނާގެ ލޯބީގެ ވާހަކަ އަކީ އާންމުންނަށް އާ ވާހަކައެއް ނޫނެވެ. ރައީސް މައުމޫނު ހޯމަ ދުވަހު ކުރެއްވި ޓްވީޓެއްގައި ވިދާޅުވީ ނަސްރީނާ އާއި ދުރުގައި އައިސޮލޭޝަންގައި ހުންނަވައި ވާހަކަ ދެއްކެވުމުން އުފާވި ކަމަށެވެ. އަދި ހޮސްޕިޓަލުގައި އެމަނިކުފާނު ހުންނެވީ ހެޔޮ ހާލުކޮޅުގައި ކަމަށާއި، ހޮސްޕިޓަލުގައި އެމަނިކުފާނު ބައްލަވަމުން ގެންދަވާ ސްޓާފުންނަށް ޝުކުރު އަދާ ކުރާ ކަމަށެވެ.
މީގެ އިތުރުން މައުމޫނު ވިދާޅުވީ އުންމީދަކީ މާތް ﷲ ގެ އިރާދަފުޅުން ވީ އެންމެ އަވަހަކަށް އާއިލާއާ ބައްދަލުވުން ކަމަށެވެ.
ރައީސް މައުމޫން ކޮވިޑަށް ޕޮޒިޓިވްވެފައިވާއިރު އެމަނިކުފާނު އަނބިކަނބަލުން ނަސްރީނާ އިބްރާހިމް ވަނީ މީގެ ކުރިން ކޮވިޑަށް ޓެސްޓު ކުރައްވާފައެވެ. އެކަމަނާ ވަނީ ކޮވިޑަށް ނެގެޓިވްވެފައެވެ.
