ބްރެޒިލްގެ އިގްތިޞާދު ދެވަނަ ކުއާރޓަރ ގައި ރިކޯޑް މިންވަރަކަށް ދަށަށް ގޮސްފި

ކޮވިޑް-19 ގެ ބަލިމަޑުކަމާ ގުޅިގެން ބްރެޒިލްގެ އިގްތިޞާދު ދެ ވަނަ ކުއާރޓަރގައި ރިކޯޑް މިންވަރަކަށް ދަށަށް ގޮސްފި އެވެ.

ބްރެޒިލްގެ ހުރިހާ ސެކްޓަރީ ތަކެއް ވަނީ ދަށަށްގޮސްފައެވެ. އަދި މި ލޮޅުމާއެކު ލެޓިން އެމެރިކާގެ އެންމެ ބޮޑު އިގްތިޞާދު އޮތް ބްރެޒިލްގެ އިގްތިޞާދު މިވަނީ 2009 ވަނަ އަހަރު އޮތް ހިސާބަށް ގޮސްފައެވެ.

ކޮވިޑްގެ ސަބަބުން އެގައުމުގެ ޖީޑީޕީ ވަނީ 9.7 އިންސައްތަ އޭގެ ކުރީ ކުއާރޓަރ އާއި އަޅާބަލާއިރު ދަށަށްގޮސްފައެވެ. އެގައުމުގެ ސްޓެޓިސްޓިކް އެޖެންސީން ހާމަކޮށްފައިވާ ގޮތުގައި މިއަހަރުގެ ފުރަތަމަ ކުއާރޓަރ އާއި އަޅާބަލާއިރު އެގައުމުގެ އިގްތިޞާދު ދެ ވަނަ ކުއާރޓަރ ގައި ވަނީ 11.4 އިންސައްތަ ދަށަށްގޮސްފައެވެ.

ވަކިވަކި ސެކްޓަރ ތަކަށް ބަލާނަމަ އިންޑަސްޓްރީތައް 12.3 އިންސަތަ ދަށަށްގޮސްފައިވާއިރު ސަރވިސަސް 9.7 އިންސައްތަ ވަނީ ދަށަށްގޮސްފައެވެ. އަދި އިންވެސްޓްމަންޓްތައް 15.4 އިންސައްތަ ދަށަށްގޮސްފައިވާއިރު ގޭބިސީތަކުން ކުރާ ޚަރަދުތަކުގެ 12.5 އިންސައްތަ ވަނީ ދަށަށްގޮސްފައެވެ. އަދި ސަރުކާރުގެ ޚަރަދުތަކުގެ 8.8 އިންސައްތަ ވަނީ ދަށަށްގޮސްފައެވެ.

ގޭބިސީތަކުން ކުރާ ޚަރަދުތަކަކީ އެގައުމުގެ އިގްތިޞާދީ ހަރަކާތްތަކުގެ ތިން ބައިކުޅަ ދެ ބައި ކަމަށްވާއިރު އެހަރަކާތްތައް ވަނީ ވަރަށް ބޮޑަށް ދަށަށްގޮސްފައި ކަމަށް އެޖެންސީން ބުނެއެވެ.

ދެވަނަ ކުއާރޓަރގައި މައްޗަށް ގޮސްފައިވާ ހަމައެކަނި ދާއިރާއަކީ ދަނޑުވެރިކަމެވެ. އެއީ 0.4 އިންސައްތަ އެވެ.

ބްރެޒިލްގެ އިގްތިޞާދު މިވަގުތު ހުރީ 2014 ވަނަ އަހަރު އެގައުމުގެ އިގްތިޞާދުގެ އެންމެ ބާރު ދުވެލީގައި ހުރި މިންވަރާއި އަޅާބަލާއިރު 15 އިންސައްތަ ދަށުގައެވެ.

އޭއެސްއޭ ބޭންކުގެ ޑިރެކްޓަރ އަދި ކުރީގެ ޓެރެޝަރީ ސެކްޓަރީ ކާރލޯސް ކަވާލް ވިދާޅުވާ ގޮތުގައި މިދިޔަ އަހަރު އެގައުމުގެ އިގްތިޞާދު ހުރި ހިސާބަށް އަންނާނީ 2023 ވަނަ އަހަރުއެވެ. އޭނާ ވިދާޅުވީ މިވަގުތު ބްރެޒިލްގެ އިގްތިޞާދު ވަނީ ވަރަށް ނާޒުކު ފައްތަރެއްގައި ކަމަށެވެ. އެގޮތުން އިޖުތިމާއީ އެތައް މައްސަލަތަކެއް ދިމާވެފައިވާއިރު ވަޒީފާ ނެތް މީހުންގެ އަދަދު ވަނީ ވަރަށް ބޮޑަށް އިތުރުވެފައި ކަމަށް ކާރލޯސް ވިދާޅުވިއެވެ.

ބްރެޒިލްގެ އިކޮނިމިކް މިނިސްޓަރ ޕައުލް ގުއެޑްސް ވިދާޅުވީ ދެ ވަނަ ކުއާރޓަގެ އަދަދުތަކަކީ ކޮވިޑްގެ ޕެންޑަމިކްގެ އެންމެ ކުރީގެ އަސަރުތަކުގެ ސަބަބުން އައިސްފައިވާ އަދަދުތަކެއް ކަމަށެވެ. އަދި އެގައުމުގެ އިގްތިޞާދު ކުރިއަރާނީ ވީ ޝޭޕަށް ކަމަށް ޕައުލް ވިދާޅުވިއެވެ.

އެގައުމުގެ އިގްތިޞާދުގެ ދުވެލި އިގްތިޞާދީ މާހިރުން ލަފާކުރި މިންވަރަށް ވުރެ ވަނީ ދަށަށް ގޮސްފައެވެ.