ދ. ވާނީ ޓްރެއިނިން ސެންޓަރުގެ ސަބަބުން ފުލުހުންގެ ޓްރެއިންނިންތައް އިތުރަށް ފުރިހަމަވެގެންދާނެ
ޓްރެއިނިން ސެންޓަރުގެ ސަބަބުން ފުލުހުންގެ ޓްރެއިނިންގ އަށް ބޭނުންވާ މުހިންމު ގިނަ ސާމާނުތަކެއް ލިބިގެންދާނެ
ކޮމިޝަނަރު އޮފް ޕޮލިސް މުހައްމަދު ހަމީދު
ދ. ވާނީގައި ގާއިމްކުރެވުނު ޕޮލިސް ޓްރެއިނިންގ ސެންޓަރުގެ ސަބަބުން ފުލުހުންގެ ޓްރެއިނިންތައް އިތުރަށް ފުރިހަމަ ކުރުމުގެ ފުރުސަތު ލިބިގެންދާނެ ކަމަށް ކޮމިޝަނަރު އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ވާނީގައި ގާއިމްކުރެވުނު ޓްރެއިނިން ސެންޓަރުގެ ސަބަބުން ފުލުހުންގެ ޓްރެއިނިންގ އަށް ބޭނުންވާ މުހިންމު ގިނަ ސާމާނުތަކެއް ލިބިގެންދާނެ ކަމަށާއި މީގެ ސަބަބުން ފީލްޑް އޮފިސަރުންނަށާއި އޮޕަރޭޝަނަލް އޮފިސަރުންނަށް ރަނގަޅު ތަމްރީނު ޕްރޮގްރާމުތަކެއް ކުރިއަށް ގެންދެވޭނެ ކަމަށް ސީޕީ ފާހަގަކުރެއްވިއެވެ. އަދި މި ސެންޓަރުގެ ސަބަބުން ޓްރެއިނިންގ ދުވަސްވަރު ފުލުހުންނަށް ސާފު ބޯފެނާއި ޒަރޫރީ އެހެނިހެން ތަކެތި ފަސޭހައިން ލިބިގެންދާނެ ކަމަށްވެސް ކޮމިޝަނަރު ވިދާޅުވިއެވެ.
ސިޕީ ވިދާޅުވީ، ވާނީ ޓްރެއިނިންގ ސެންޓަރު ބޭނުން ކުރެވިގެން ދާނީ ފުލުހުންގެ އިދާރާއަށް އަލަށް ވަންނަ ފަރާތްތަކާއި ވަކިވަކި ދާއިރާތަކުން ސްޕެޝަލައިޒްވާ ފުލުހުންނަށް ޓްރެއިނިންގ ދިނުމަށް ކަމަށެވެ.
މީގެ އިތުރުން އައްޑޫ ގައި ގާއިމް ކުރަމުންދާ ޕޮލިސް އެކަޑަމީ ތަރައްގީކޮށް ނިމުމުން ރާއްޖޭގައި ފުލުހުންނަށް ތަމްރީނުދޭނެ ރަނގަޅު ދެ ސެންޓަރެއް ހުންނާނެ ކަމަށް ފާހަގަކޮށް ސީޕީ ވަނީ ފުލުހުންގެ އިދާރާއަކީ ކުރިއަށް އޮތް ތަނުގައި މިއަށްވުރެ ރަނގަޅަށް ރައްޔިތުންނަށް ހިދުމަތް ފޯރުކޮށްދެވޭނެ އިދާރާއަކަށް ވެގެންދާނެ ކަމަށް ވިދާޅުވެފައެވެ.
ވާނީ ގައި ގާއިމްކުރެވިގެން ދިޔަ ޕޮލިސް ޓްރެއިނިންގ ސެންޓަރަކީ އަށް މިލިއަން ރުފިޔާގެ މަޝްރޫއުއެކެވެ. މި ސެންޓަރުގައި ފަތާ ޓްރެކަކާއި، ޖިމެއްގެ އިތުރުން، އުޅަނދުފަހަރާއި ފުލުހުންގެ ޓްރެއިނިންތަކަށް ބޭނުންވާ އެހެނިހެން ސާމާނު ހުންނާނެއެވެ.
