އިންޑިއާ ސިފައިންނަށް ދިން މަރުގެ އިންޒާރާއި ގުޅިގެން އަނދުން ހުސެއިންގެ ވަރުގަދަ ރައްދެއް
އާދިލް ރިޒާ ވަނީ އިންޑިއާ ސިފައިންނަށް މަރުގެ އިންޒާރު ދީފައި
އެމްޑީޕީ ޕާލިމަންޓްރީ ގުރޫޕުގެ ޑެޕިއުޓީ ލީޑަރު ހުސައިން ޝަހީމް އަދި އައްބާސް އާދިލް ރިޒާ
އިންޑިއާ ސިފައިންނަށް މަރުގެ އިންޒާރު ދިނުމުން ރައްޔިތުންގެ މަޖިލީހުގެ އެމްޑީޕީ ޕާލިމަންޓްރީ ގުރޫޕުގެ ޑެޕިއުޓީ ލީޑަރު އަދި ހެންވޭރު ދެކުނު ދާއިރާގެ މެންބަރު ހުސައިން ޝަހީމް (އަނދުން ހުސައިން) ވަރުގަދަ ރައްދެއް ދީފިއެވެ.
އިންޑިއާ ސިފައިންނަށް މަރުގެ އިންޒާރު ދިނީ ކުރީގެ ރައީސް ޑރ. މުހައްމަދު ވަހީދު ހަސަން މަނިކާއި ކުރީގެ ރައީސް އަބްދުﷲ ޔާމީންގެ ސަރުކާރުގައި އިސް މަޤާމުތަކެއް ފުރުއްވި އައްބާސް އާދިލް ރިޒާ އެވެ.
ހޯމަ ދުވަހު އާދިލް ރިޒާ ކުރައްވާފައިވާ ޓުވީޓްގައި ވަނީ އިންޑިއާ އާއި ރާއްޖެއާ ދެމެދު އޮތް ގުޅުމަށް ފާޑު ވިދާޅުވެފައެވެ. އައްޑޫ ސިޓީގައި އިންޑިއާއިން ތަރައްޤީކުރާ ސަލާމަތީ ބާރުތަކުގެ ޓްރެއިނިން ސްކޫލް އޭނާ ސިފަކޮށްފައިވަނީ "ހަނގުރާމައިގެ ކިއްލާއެއް" ގެ ގޮތުގައެވެ. ޓްރެއިނިންގ ސްކޫލާއި އިންޑިއާ ސިފައިން ރާއްޖޭގައި ޤާއިމް ކުރާ ރާޑަރުތައް ވެސް ޖެހޭނީ ގެންދަން ކަމަށް ރިޒާ ވިދާޅުވިއެވެ.
ރިޒާގެ އިންޒާރަށް ރައްދު ދެއްވައި ހުސައިން ވިދާޅުވީ އިންޑިއާއަށް މިފަދަ އިންޒާރުތައް ދެމުންދާއިރު ފުލުހުން އެ މަައްސަލަ ތަހުޤީގު ކުރަން ޖެހޭ ކަމަށެވެ.
އަދި އެ މައްސަލަ ތަހުޤީގު ނުކޮށް ކޮމިޝަނަރ އޮފް ޕޮލިސް މުހައްމަދު ހަމީދު "ރޯޔަލް" ވެގެން ހުރުމުގެ ފުރުސަތު ނެތް ކަމަށް ހުސައިން ވިދާޅުވިއެވެ.
މިކަމާއި ގުޅޭ ގޮތުން ރާއްޖެ އެމްވީއަށް އިތުރަށް މައުލޫމާތު ދެއްވަމުން އަނދުން ހުސައިން ވިދާޅުވީ އާދިލް ރިޒާގެ ޓެރެރިޒަމް އަށް ހިތްވަރުދޭ އެ އިންޒާރު ހަރުކަށި އިބާރާތުން ކުއްވެރި ކުރައްވާ ކަމަށެވެ.
އެފަދަ އިންޒާރުތަކެއްގެ ސަބަބުން ރާއްޖެ އާއި އިންޑިއާ އާ ދެމެދު އޮތް ގާތް ގުޅުމަށް އިދިކޮޅު ފަރާތްތަކުން ކުރަމުންދާ މަސައްކަތް ތަކުން އެއްވެސް ބަދަލެއް ނާންނާނެ ކަމަށް އޭނާ ވިދާޅުވިއެވެ.
އެ މައްސަލައިގައި ޤާނޫނުގައިވާ ގޮތުގެ މަތިން ހަރުކަށި ފިޔަވަޅު އެޅުމަށް އިދާރާތަކަށް އޭނާ ގޮވާލެއްވިއެވެ.
މިދިޔަ ހުކުުރު ދުވަހުގެ ރޭ ބޮޑުތަކުރުފާނު މަގު ސްޓޭޓް ބޭންކް އޮފް އިންޑިއާ (އެސްބީއައި) އިމާރާތާއި ޖެހިގެން ހުރި ކެފޭގައި ރޯވެ ހިނގި އަލިފާނުގެ ހާދިސާއަކީ އެކްސިޑެންޓަކަށްވުރެ ބޮޑަށް ޓެރެރިޒަމްގެ އަމަލެއްގެ ގޮތުގައި އަނދުން ހުސައިން ވަނީ ސިފަކޮށްފައެވެ.
