ޕީޕީއެމް/ޕީއެންސީ 150،000 ރުފިޔާއިން ޖޫރިމަަނާކޮށްފި
31 އޯގަސްޓު 2020 | ހޯމަ 09:53މުޒާހަރާ ބޭއްވި ގައިޑްލައިންތަކާއި ހިލާފަށް
ޕީޕީއެމުން މާލޭގައި ބޭއްވި ސައިކަލް ބުރުގެ ތެރެއިން
ސިޔާސީ ޕާޓީތަކުގެ ގާނޫނާއި އާންމު ސިއްހަތު ރައްކާތެރިކުރުމުގެ ގާނޫނުގެ ދަށުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލައިންއާ ހިލާފުވެގެން އިލެކްޝަން ކޮމިޝަނުން ޕީޕީއެމް/ޕީއެންސީ 150،000 ރުފިޔާއިން ޖޫރިމަނާ ކޮށްފިއެވެ.
އިލެކްޝަންސް ކޮމިޝަނުން ބުނީ ސިޔާސީ ޕާޓީތަކުން އަމަލުކުރާނެ ގޮތްތަކެއް ކަނޑައަޅައި ޚާއްސަ ޤާނޫނެއް އެކުލަވާލާފައިވާ ކަމަށެވެ. ކޮންމެ ސިޔާސީ ޕާޓީއެއްވެސް ޤާނޫނަށް ފުރިހަމަ އަށް ބޯލަނބަންޖެހޭއިރު، އެކި ހަރަކާތްތަކާއި ގުޅިގެން ޚާއްސަކޮށް މިހާލަތުގައި އެޗްޕީއޭއިން އަންގާ އެންގުންތަކަށް ބޯލެނބުމަކީ ސިޔާސީ ޕާޓީތަކުން ކުރަންޖެހޭ ކަމެއް ކަމަށެވެ.
ރާއްޖެއެމްވީއަށް މައުލޫމާތު ދެއްވަމުން އިލެކްޝަންސް ކޮމިޝަންގެ ނައިބު ރައީސް އަހްމަދު އަކްރަމް ވިދާޅުވީ އެ ދެ ޕާޓީ އިން ވެސް ކުރިއަތް އޮތް 30 ދުވަހުގެ ތެރޭގައި އީސީއަށް ދައްކަން ޖެހޭ ކަމަށެވެ.
އެޗްޕީއޭގެ ގައިޑްލައިންތަކާއި އިދިކޮޅުން ހިލާފުވެފައިވަނީ ހުކުރު ދުވަހު ޕްރޮގްރެސިވް ކޯލިޝަނުން ''ރާއްޖެ ވިއްކާލުމުގެ'' ނަމުގައި މާލޭގައި ބޭއްވި ސައިކަލް ބުރުގައެވެ.
ގިނަ އަދަދެެއްގެ ޒުވާނުން ބައިވެރިވި އެ ސައިކަލް ބުރުގައި ގައިދުރު ކަމެއް ނެތެވެ. މި މައްސަލަ ބަލަން ފަށައި ޕީޕީއެމް/ޕީއެންސީގެ ލީޑަަރޝިޕްގެ އިސް ބޭފުޅުން ފުލުހަށް ހާޒިރުކޮށް އެޗްޕީއޭގެ ގައިޑްލައިންއާ ހިލާފުވެފައިވާތީ ޖޫރިމަނާކޮށްފައިެވެއެވެ. 1000 ރުފިޔާ އިން ޖޫރިމަނާ ކުރި ބޭފުޅުންގެ ތެރޭގައި ޕީއެންސީގެ ރައީސް އަބްދުއްރަހީމް އަބްދުﷲ، ރައްޔިތުންގެ މަޖިލީހުގެ ބާރަށު ދާއިރާގެ ކުރީގެ މެމްބަރު އިބްރާހިމް ޝުޖާއުގެ އިތުރުން ޕީއެންސީގެ ނައިބް ރައީސް އަދި ނައިފަރު ދާއިރާގެ މެމްބަރު އަހުމަދު ޝިޔާމްވެސް ހިމެނިވަޑައިގަންނަވައެވެ.
ގައިޑްލައިންތަކާއި ހިލާފުވެގެން ކުރީގެ ރައީސް އަދި ޕްރޮގްރެސިވް ކޯލިޝަންގެ އެޑްވައިޒަރު ޑރ. ވަހީދު ހަސަން މަނިކުވެސް ފުލުހަށް ހާޒިރުކުރިއެވެ. އިދިކޮޅުން ބުނަމުންދަނީ ފުލުހަށް ހާޒިރުކުރިޔަސް ފަހަތަށް ނުޖެހޭނެ ކަމަށާއި، ރައްޔިތުންގެ އަޑު އުފުލަމުންދާނެ ކަމަށެވެ.
