ދެލައްކަ ރުފިޔާއިން ރާއްޖެޓީވީ ޖޫރިމަނާ ކުރި މައްސަލައިގެ އިސްތިއުނާފަށް ތައްޔާރުވުމަށް ދައުލަތަށް ފަސް ދުވަސް ދީފި
ދެ ލައްކަ ރުފިޔާއިން ޖޫރިމަނާ ކުރި މައްސަލަ
ބްރޯޑްކާސްޓިންގ ކޮމިޝަންގެ މެންބަރުން
ރާއްޖެޓީވީގެ ޚަބަރެއްގައި އަބުރާ ބެހިފައިވާ ކަމަށް ބުނެ ދެލައްކަ ރުފިޔާއިން ޖޫރިމަނާ ކުރި މައްސަލައިގެ އިސްތިއުނާފަށް ތައްޔާރުވުމަށް ސިވިލް ކޯޓުން ދައުލަތަށް ފަސް ދުވަހުގެ ފުރުސަތެއް ދީފި އެވެ.
ދެލައްކަ ރުފިޔާއިން ރާއްޖެޓީވީ ޖޫރިމަނާ ކުރި މައްސަލަ ސިވިލްކޯޓަށް ހުށަހަޅާފައި މިވަނީ ގާނޫނުގައި ބުނެފައިވާ ގޮތަށް ޖޫރިމަނާގެ ފައިސާ ބްރޯޑްކާސްޓިން ކޮމިޝަނަށް ދެއްކުމަށް ފަހުގައެވެ. އެގޮތުން އެ މައްސަލަ ރާއްޖެޓީވީގެ ފަރާތުން ސިވިލް ކޯޓަށް ހުށަހެޅީ މިދިޔަ މަހުގެ 26 ވަނަ ދުވަހުއެވެ.
އެ މައްސަލަ މިހާރު އޮތީ ސިވިލް ކޯޓުގެ ޑިސްޕިއުޓް ރިޒޮލިއުޝަން މަރުހަލާގަ އެވެ. އެ މަރުހަލާގައި އޮންނާނީ ދެ ފަރާތުން ވާހަކަ ދައްކައިގެން ހައްލެއް ހޯދުމުވެ. މައްސަލަ ޝަރީއަތަށް ފޮނުވާނީ ޑިސްޕިއުޓް ރެޒޮލިއުޝަނުން ހައްލެއް ނުލިބިއްޖެ ނަމައެވެ.
އެ މައްސަލައިގެ ފުރަތަމަ އަޑުއެހުން ބުރާސްފަތި ދުވަހު ވަނީ ބާއްވާފަ އެވެ. ރާއްޖެޓީވީގެ ފަރާތުން ސިވިލް ކޯޓަށް ވަޑައިގެންނެވީ ކުރީގެ ޑެޕިއުޓީ ޕްރޮސެކިއުޓާ ޖެނެރަލް ހުސެއިން ޝަމީމް އެވެ. މި މައްސަލައިގައި ބްރޯޑްކާސްޓިން ކޮމިޝަން ތަމްސީލު ކުރައްވަނީ ބަންޑާރަނައިބުގެ އޮފީހުންނެވެ.
ޝަމީމް ވިދާޅުވީ ބުރާސްފަތި ދުވަހުގެ އަޑުއެހުމުގައި މައްސަލަައިގެ ލިޔެކިޔުންތައް ދައުލަތާއި ހަވާލުކޮށްފައިވާ ކަމަށާއި އަދި ބްރޯޑްކާސްޓިން ކޮމިޝަނާއެކު މަޝްވަރާކޮށް މައްސަލައަށް ތައްޔާރުވުމަށް ދައުލަތުގެ ވަކީލުންނަށް ފަސް ދުވަހުގެ ފުރުސަތެއް ދީފައިވާ ކަމަށެވެ.
ޝަމީމް ވިދާޅުވީ މި މައްސަލަ ތަހުގީގު ކޮށްފައިވަނީ ރާއްޖޭގެ ގާނޫނީ ނިޒާމުގައި ކަނޑައަޅާފައި ހުރި އުސޫލުތަކާއި އިސްލާމީ ޝަރީއަތުގައި ކަނޑައަޅާފައި ހުރި އުސޫލުތަކާއި ޚިލާފަށް ކަމަށާއި ރާއްޖެޓީވީން މި މައްސަަލައިގައި އެ ނުކުތާ ފާހަގަކުރާނެ ކަމަށެވެ.
ޝަމީމް ވިދާޅުވީ މައްސަލަ ސިވިލް ކޯޓަށް ހުށަހަޅާފައިވަނީ ރާއްޖެޓީވީ ޖޫރިމަނާ ކުރުމަށް ބްރޯޑްކާސްޓިން ކޮމިޝަނުން ނިންމީ އަަދުލުއިންސާފުގެ މައިގަނޑު އަސާސީ ހަމަތަކާއި ޚިލާފަށް ކަމަށްވާތީ، ބްރޯޑްކާސްޓިން ކޮމިޝަނުގެ އެ ނިންމުމަކީ ބާތިލް ނިންމުމެއް ކަމަށް ކަނޑައަޅައި، އެ ފައިސާ އަނބުރާ ހޯދުމަށް އެދި ކަމަށެވެ.
ޝަމީމް ވިދާޅުވީ ބްރޯޑްކާސްޓިން ކޮމިޝަނުން ތުހުމަތުކުރެވޭ މައްސަލައާ ގުޅޭ ސުވާލެއް ކޮށްފައިނުވާއިރު، ތުހުމަތު ކުރެވޭ މާއްދާއެއް ވެސް ރާއްޖެޓީވީއަށް ކިޔައިދީފައިނުވާ ކަމަށެވެެ. އަދި މައްސަލައަށް ޖަވާބުދާރީވާން ރާއްޖެޓީވީއަށް ފުރުސަތު ދީފައިނުވާކަން ވެސް ޝަމީމް ފާހަގަކުރެއްވި އެވެ.
"އާދައިގެ ބަހުން ބުނާނަމަ ހޭ ވެސް އަހާނުލައި މައްސަލަ ކުރިއަށް ގެންގޮސް ނިންމާލާފައި އޮތީ، އެއީ ހަމަޖެހޭ އުސޫލެއް ނޫން، އެއީ ގާނޫނީ ގޮތުން އެކަހަލަ ކަންތައް ކުރަން އޮންނަ އުސޫލެއް ވެސް ނޫން،" ޝަމީމް ވިދާޅުވި އެވެ.
ބްރޯޑްކާސްޓިން ކޮމިޝަނުން ރާއްޖެޓީވީ އާއި ސްޓޭޝަންގެ ކުރީގެ ނޫސްވެރިއަކު ޖޫރިމަނާކޮށްފައި ވަނީ ނޮވެމްބަރ 19، 2016 ގައި ރާއްޖެޓީވީގެ ތިން ޚަބަރު ގަޑިއެއްގައި ގެނެސްދީފައިވާ ރޭޕްގެ މައްސަލައަކާ ގުޅޭ ޚަބަރެއްގައި، މައްސަލައިގައި ހިމެނޭ ކުއްޖާގެ އާއިލާއާ ހަވާލާދީ މީހެއްގެ ނަން ހާމަކޮށްފައިވާ ކަމަށް ބުނެއެވެ. މިއީ އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ 10 ވަނަ މާއްދާއާ ޚިލާފަށް ލިޔެފައިވާ ޚަބަރެއް ކަމަށާއި، ޚަބަރުގެ ސަބަބުން ނަން ހާމަވި މީހާގެ އަބުރުގެ ކަރާމާތަށް އުނިކަން ލިބިފައިވާ ކަމަށް ނިންމާފައިވާ ކަމަށް ވެސް އެކޮމިޝަނުގެ ރިޕޯޓްގައި ވެއެވެ.
އެހެންކަމުން، އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ ހަވަނަ ބާބުގެ ދަށުން ޖޫރިމަނާ ކުރުމާއި ބެހޭ އުސޫލުގެ 14 ވަނަ މާއްދާގެ (ށ) އަދި (ބ) އަށް ރިޢާޔަތްކޮށް މި އުސޫލުގެ 10 ވަނަ މާއްދާގެ (ހ) ގެ އެކެއްގެ ދަށުން ރާއްޖެ ޓީވީ 200،000ރ. އިން ޖޫރިމަނާކޮށް، މި ޚަބަރު ތައްޔާރު ކުރި، ރާއްޖެޓީވީގެ ކުރީގެ ނޫސްވެރިޔާ، އާލާ އިބްރާހިމް މި އުސޫލުގެ 10 ވަނަ މާއްދާގެ (ށ) ގެ އެކެއްގެ ދަށުން 50،000ރ. އިން ވަނީ ޖޫރިމަނާ ކޮށްފައެވެ.
ނަމަވެސް ފައިސާ ދެއްކުމަށް ދިން 30 ދުވަހުގެ ތެރޭގައި ފައިސާ ދައްކާފައި ނުވާތީ ޖީނާއީ މައްސަލައެއްގެ ގޮތުގައި އާލާގެ މައްސަލަ ކޯޓަށް ފޮނުވުމަށް ތަހްގީގު ހިންގުމަށް ފުލުހުންނަށް ހުށަހަޅާފައ ވަނިކޮށް އާލާގެ މައްސަލަ ބެލުމުގައި އޭނާގެ ބަހެއް ހޯދާފައި ނުވާތީ އެއީ މައްސަލަ ރައްދުވާ ފަރާތަށް ފުރުސަތު ނުދީ ގާނޫނު އަސާސީގެ ރޫހާ ހިލާފަށް ނިންމާފައިވާ ނިންމުމެއް ކަމަށް ގަބޫލުކުރާ ކަމަށް ބްރޯޑްކޮމް އިން ފަހުން ވަނީ ބުނެފައެވެ. އެހެން ކަމުން އާލާގެ މައްސަލަ ރިވިއުކުރަމުން ގެންދާ ކަމަށް ބުނެ ރާއްޖެ ޓީވީގެ ނިއުސް ޑިރެކްޓަރު އަލީ ޔޫސުފް މިދިޔަ ހަފްތާގައި ވަނީ ބްރޮޑްކޮމް އަށް ހާޒިރުކޮށްފައެވެ.
އަބުރުގެ މައްސަލައަކާ ގުޅިގެން ރާއްޖެ ޓީވީއާއި ކުރީގެ ނޫސްވެރިއަކު ޖޫރިމަނާ ކުރިއިރު، މިއީ އަބުރު ރައްކާތެރިކޮށްދިނުމާއި، ޚިޔާލު ފާޅުކުރުމުގެ މިނިވަންކަމުގެ ޤާނޫނުގެ ދަށުން މީޑިއާއެއް، އަދި ނޫސްވެރިއަކު ވެސް ޖޫރިމަނާ ކުރި ފުރަތަމަ ފަހަރެވެ. އެ ފައިސާ ރާއްޖެ ޓީވީން ދެއްކުމާ އެކު ބްރޮޑްކޮމް އިން ބެލި އެހެން މައްސަލައެއްގައި ރާއްޖެ ޓީވީ ވަނީ އެއް މިލިއަން ރުފިޔާ އިން ޖޫރިމަނާކޮށްފައެވެ. ރާއްޖެޓީވީން ވަނީ ބުރާސްފަތި ދުވަހު އެ ފައިސާ ދައްކާފަ އެވެ.
