ލާޒިއޯގެ އެއްބަސްވުން އިމޮބިލޭ އިތުރު ފަސް އަހަރަށް އާކޮށްފި

ލާޒިއޯއާއެކު ހަދާފައިވާ އެއްބަސްވުން އިޓަލީގެ ފޯވާޑް ޗީރޯ އިމޮބިލޭ އިތުރު ފަސް އަހަރަށް އާކޮށްފިއެވެ.

އުމުރުން 30 އަހަރުގެ ފޯވާޑް ލާޒިއޯގެ އެއްބަސްވުން ދިގު މުއްދަތަކަށް އާކުރިއިރު، މި ނިމުނު ސީޒަނުގައި ދެއްކި މޮޅު ކުޅުމާއެކު އޭނާ ހޯދުމަށް ޔޫރަޕްގެ ބޮޑެތި ކުލަބުތަކުން ވަނީ މަސައްކަތް ކޮށްފައެވެ. އޭގެ ތެރޭގައި ލިވަޕޫލާއި، ބާސެލޯނާ އަދި ނިއުކާސަލް ޔުނައިޓެޑުންވެސް އިމޮބިލޭއަށް ޝައުގުވެރިކަން ފާޅުކުރި ކަމަށް ރިޕޯޓުތައް ބުނެއެވެ.

މިދިޔަ ސީޒަނުގައި އިމޮބިލޭ ތަފާތު މޮޅު ކުޅުމެއް ދެއްކިއިރު، އޭނާ ވަނީ މިދިޔަ ސީޒަނުގައި ޔޫރަޕްގެ ބޮޑު ފަސް ލީގުގެ އެންމެ ގިނަ ލަނޑު ޖަހާ ކުޅުންތެރިޔާއަށް ދޭ ރަން ބޫޓު ހޯދާފައެވެ.

މިދިޔަ ސީޒަނުގެ އިޓާލިއަން ލީގުގައި އިމޮބިލޭ 36 ލަނޑު ކާމިޔާބުކޮށް ފުރަތަމަ ފަހަރަށް ރަން ބޫޓު ހޯދިއިރު، ލިސްޓުގެ ދެވަނައިގައި އޮތް ބަޔާން މިޔުނިކްގެ ފޯވާޑް ރޮބަޓް ލެވަންޑޮސްކީއަށް ކާމިޔާބުކުރެވިފައިވަނީ 34 ލަނޑެވެ. އަދި ތިންވަނައިގައި އޮތް ޔުވެންޓަސްގެ ތަރި ކްރިސްޓިއާނޯ ރޮނާލްޑޯއަށް ކާމިޔާބުކުރެވިފައިވަނީ 31 ލަނޑެވެ.

މީގެ އިތުރުން މިދިޔަ ސީޒަނުގައި އިމޮބިލޭ ވަނީ އެއް ސީޒަނެއްގައި އިޓާލިއަން ލީގުގައި އެންމެ ގިނަ ލަނޑު ޖެހި ކުޅުންތެރިޔާގެ ރިކޯޑާ އެއްވަރުކޮށްފައެވެ. މީގެ ކުރިން އެއް ސީޒަނެއްގައި ލީގުގައި 36 ލަނޑު ހަމަކޮށްފައިވަނީ 1928-1929 ވަނަ އަހަރުގެ ސީޒަނުގައި ޓޮރީނޯގެ ފޯވާޑް ޖީނޯ ރޮސެއްޓީ އާއި 2015-2016 ވަނަ އަހަރުގެ ސީޒަނުގައި އޭރު ނާޕޮލީއަށް ކުޅުނު ގޮންޒާލޯ ހިގުއައިންއެވެ.

މީގެ ކުރިން ޔުވެންޓަސްއަށްވެސް ކުޅުނު އިމޮބިލޭ ލާޒިއޯއަށް ބަދަލުވީ 2016 ވަނަ އަހަރުއެވެ. މިހާތަނަށް ލާޒިއޯއަށް 178 މެޗު ކުޅެދީ 125 ލަނޑު ކާމިޔާބުކޮށްފައިވާއިރު، އިމޮބިލޭ ވަނީ ލާޒިއޯއާއެކު އިޓާލިއަން ކަޕްގެ އިތުރުން އިޓާލިއަން ސުޕަ ކަޕް ދެ ފަހަރު ކާމިޔާބުކޮށްފައެވެ.