މިހާތަނަށް ހިލޭ އެހީ އާއި ލޯނުގެ ގޮތުގައި ލިބިފައިވަނީ 190 މިލިއަން ޑޮލަރު
ޑެފިސިޓް ފޫބުއްދުމަށް ކޮންސެޝަނަލް ފައިނޭންސްގެ ގޮތުގައި ބޭރުގެ ފަރާތްތަކުން ފައިނޭންސް ހޯދުމަށް އަންނަނީ މަސައްކަތްކުރަމުން
ފިނޭންސް މިނިސްޓަރ އިބްރާހީމް އަމީރު
ކޮވިޑް-19 އާ ގުޅިގެން ހިލޭ އެހީ އާއި ލޯނުގެ ގޮތުގައި މިހާތަނަށް ލިބިފައި ވަނީ 190 މިލިއަން ޑޮލަރު (2.9 ބިލިއަން ރުފިޔާ) ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެ އެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި މިހާލަތުގައި ރާއްޖެއަށް ލިބޭ އާމްދަނީ އާއި ގުޅޭގޮތުން ދެންނެވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކޮވިޑް-19 ގެ ހާލަތާއި ގުޅިގެން ރާއްޖޭގެ ފިސްކަލް ޑެފިސިޓް ހުންނާނެ ކަމަށް މިހާރު ބެލެވެނީ 15 ބިލިއަން ރުފިޔާގައި ކަމަށެވެ. އެހެންކަމުން ޑެފިސިޓް ފޫބެއްދުމަށް ކޮންސެޝަނަލް ފައިނޭންސްގެ ގޮތުގައި ބޭރުގެ ފަރާތްތަކުން ފައިނޭންސް ހޯދުމަށް މަސައްކަތް ކުރަމުންދާ ކަމަށް މިނިސްޓަރ ވިދާޅުވިއެވެ.
މިއަހަރުގެ ބަޖެޓްގައި ބުނެފައިވަނީ ފިސްކަލް ޑެފިސިޓް ހުންނާނެކަމަށް ބެލެވެނީ 6 ބިލިއަން ރުފިޔާގައި ކަމަށެވެ. 30 ބިލިއަން ރުފިޔާ އާމްދަނީ އާއި ހިލޭ އެހީގެ ގޮތުގައި މިއަހަރު ލިބޭނެކަމަށް ވަނީ އަންދާޒާކޮށްފައެވެ. ނަމަވެސް މިހާރު ބެލެވިފައިވަނީ އާމްދަނީ އާއި ހިލޭ އެހީގެ ގޮތުގައި ލިބޭނީ 15 ބިލިއަން ވަރުކަމުގައެވެ.
މިއަހަރުގެ އޭޕްރީލް މަހު ފިނޭންސް މިނިސްޓްރީން ބުނެފައިވަނީ ކޮވިޑް-19 އާ ގުޅިގެން ރާއްޖެއަށް ދިމާވާނެ އިގްތިޞާދީ ދަތިކަން ފޫބެއްދުމަށްޓަކައި ބޭރުގެ އެކި ފަރާތްތަކުން 215.37 މިލިއަން އެމެރިކާ ޑޮލަރު ހޯދުމުގެ މަސައްކަތް ސަރުކާރުން ކުރައްވަމުން ގެންދަވާކަމަށެވެ.
ޕްރޮގްރާމްގައި ވާހަކަ ދައްކަވަމުން މިނިސްޓަރ ވަނީ ޑޮލަރުގެ ރޭޓް ބޮޑުވަމުންދާ މައްސަލައަށްވެސް ވާހަކަދައްކަވާފައެވެ. މިނިސްޓަރ ވިދާޅުވީ ޑޮލަރުގެ ރޭޓް މަތިވަމުންދާކަން ފާހަގަކުރެވިފައިވާ ކަމަށެވެ. ރާއްޖެއަށް ޑޮލަރުގެ އާމްދަނީގެ ބޮޑުބައި ލިބެނީ ޓޫރިޒަމް ސިނާއަތުން ކަމަށާއި ނަމަވެސް އެ މަގުތައް ގާތްގަނޑަކަށް ބަންދުވެފައިވާ ކަމަށް މިނިސްޓަރ ވިދާޅުވިއެވެ.
ޑޮލަރު ލިބުން ދަތިވެ ޑޮލަރުގެ ރޭޓް މަތިވަމުންދާތީ އާންމުން އަންނަނީ އެކަމުގެ ކަންބޮޑުވުން ފާޅުކުރަމުންނެވެ.
