އަޅުގަނޑުމެންނަށް މޮޑަން ފުޓުބޯޅައިގެ ޓޮޕް ލެވަލް އެއް ނޭނގޭ: ސޮބާ
15 އެޕްރީލު 2017 | ހޮނިހިރު 16:16ޖަރުމަނާއި ސްޕެއިން ފަދަ ގައުމުތަކަކީ ފުޓުބޯޅައިގެ "ހިތް"
ކްލަބު ގްރީން ސްޓްރީޓްސްގެ ކޯޗު ސޮބާހު މުހައްމަދު (ސޮބާ)
އަޅުގަނޑުމެންނަށް މޮޑަން ފުޓުބޯޅައިގެ ޓޮޕް ލެވެލް އެއް ނޭނގޭ ކަމަށާއި ސްޕެއިންގައި ކުރިއަށްގެންދިޔަ ތަމްރީނުތަކުން ރާއްޖޭގެ ފުޓުބޯޅައިގެ ހާލަތު ވަރަށް ރަނގަޅަށް އެނގިގެން ހިނގައްޖެ ކަމަށް ކްލަބު ގްރީން ސްޓްރީޓްސްގެ ކޯޗު ސޮބާހު މުހައްމަދު (ސޮބާ) ބުނެފި އެވެ.
ނޫސްވެރިންނަށް މައުލޫމާތުދެމުން ސޮބާ ބުނީ މިފަދަ ކޯހެއްގައި ބައިވެރިވުމުގެ ކުރިން ކުޅުންތެރިއެއްގެ ހައިސިއްޔަތުން އަދި ކޯޗެއްގެ ހައިސިއްޔަތުން ބޭރުގެ އެކި ކޯޗުންނާއެކު މަސައްކަތް ކުރެވިފައި ހުރުމަކީ އޭނާއަށް ލިބުނު ކުރިއެރުމެއް ކަމަށް ގަބޫލުކުރާ ކަމަށެވެ. އަދި ބޭރު ގައުމެއްގައި މިފަދަ ކޯހެއްގައި ބައިވެރިވެ ތަމްރީނުތަކެއް ލިބުމަކީ އޭނާގެ ހުވަފެނެއް ހަގީގަތަކަށް ވެގެންދިޔަ ކަމެއް ކަމަށް ސޮބާ ބުންޏެވެ.
ދުނިޔޭގައި ފުޓުބޯޅަ ކުރިއަރާފައި އޮތް މިންވަރުގެ މައްޗަށް އަލިއަޅުވާލަމުން ސޮބާ ބުނީ ޖަރުމަނާއި ސްޕެއިން ފަދަ ގައުމުތަކަކީ ފުޓުބޯޅައިގެ "ހިތް" ކަމަށާއި އެހެން ކަމުން އެފަރާތުގެ އެހީގައި މިހާތަނަށް ނޭނގި ހުރި ނުވަތަ މަދުވެފައި ހުރި އެތައް ކަމެއް އެނގިގެންދިޔަ ކަމަށެވެ.
ސޮބާ ބުނީ މިފަދަ އިތުރު ފުރުސަތުތައް ކައިރި މުސްތަގުބަލެއްގައި ލިބިއްޖެނަމަ މިހާރު އޭނާ ހުރި ލެވަލް އަށްވުރެ އެހެން ލެވެލް އަކަށް ދިއުމުގެ ފުރުސަތު ބޮޑު ކަމަށެވެ.
"މީގެ މާނައަކީ މިކޯސް ނިންމާފައި އައުމުން މާގިނަ ކަންތައްތަކެއް އެނގި އެހެން މީހަކަށް ބަދަލުވީއެއް ނޫން، އެކަމަކު މިހާރު ވަރަށް މުހިންމު އެއްޗެހިތަކެއް އެނގިއްޖެ، މި ރޮނގުން ކުރިއަށްދާން ބޭނުން ކަމަށްވާނަމަ އިތުރު ފުރުސަތު ހޯދަންޖެހޭ." މިސީޒަނުގައި ގްރީން ސްޓްރީޓަށް ރަނގަޅު ނަތީޖާތަކެއް ނެރެދެމުން އަންނަ ކޯޗު ސޮބާ ބުންޏެވެ.
ސޮބާ ބުނީ ސްޕެއިނުގައި ކޯސް ކުރިއަށްދިޔަ އިރު ވީ މުއްދަތުގައި ބާސެލޯނާގެ ލިއޮނަލް މެސީ އަދި އިނިއެސްޓާ ފަދަ ކުޅުންތެރިން ތަމްރީނު ހެދި ލަ މާސިއާ ޓްރެއިނިންގް އެކަޑަމީ އަށް ޒިޔާރަތްކޮށް އެތަނުގައި މަސައްކަތް ކުރާގޮތް ފެނުމުން އަމިއްލަ ގައުމުގައި އެފަދަ ކަންތައްތައް މިހާ ހިސާބަށް އައި އިރުވެސް ނެތުމުން އެކަމާ ދެރަވި ކަމަށެވެ. އަދި ރާއްޖޭގެ ފުޓުބޯޅަ ކުރިއަށް ގެންދިއުމަށްޓަކައި މިފަދަ އެކަޑަމީތައް ހިންގުމަކީ މުހިންމު ކަމެއްކަން އިހުސާސް ވެގެންދިޔަ ކަމަށް ސޮބާ ބުންޏެވެ.
ސޮބާ އަންނަނީ ގްރީން ސްޓްރީޓާއި ހަވާލުވި ފަހުން ލީގުގައި އެޓީމަށް ރަނގަޅު ނަތީޖާތަކެއް ނެރެދެމުންނެވެ. އެގޮތުން މިހާތަނަށް ކުޅުނު ހަތަރު މެޗުގެ ތެރެއިން ދެ މެޗު ކާމިޔާބުކޮށް އެއް މެޗުން އެއްވަރުވެ އެޓީމު އޮތީ 7 ޕޮއިންޓާއެކު ލީގުގެ ފަސްވަނައިގަ އެވެ.
