ނިއުލެގޫން ސްވިމިން ކްލަބް ލެވަލް ފެސްޓިވަލެއް ބާއްވައިފި

ނިއުލެގޫން ސްވިމިން ކްލަބް ލެވަލް ފެސްޓިވަލް ބާއްވައިފިއެވެ.

ނިއުލަގޫންސް ސްވިމިން ކްލަބްގެ ހެޑް ކޯޗް އިސްމާއިލް ފަރުހާން ވިދާޅުވީ، މިއީ 2017 ވަނަ އަހަރުން ފެށިގެން ކުދިންގެ ހެދިބޮޑުވުން ބަލައި، އެކުދިންނަށް އުފާވެރި މާހައުލެއް ހޯދައިދިނުމުގެ މަގުސަދުގައި ބާއްވާ ފެސްޓިވަލްއެއް ކަމަށެވެ.

ފަރުހާން ވިދާޅުވީ، މިފެސްޓިވަލްގައި ކުޑަކުދިންގެ ދުވަސް ރަމަޟާން މަހާ ދިމާވާތީ ކުޑަ ކުދިންގެ ދުވަސް ފާހަގަކުރުމުގެ އިތުރުން ކޮންމެ އަހަރަކުވެސް ކްލަބުން ބާއްވާ މާހެފުމާއެކު ވަރަށް ފުރިހަމައަށް ފެސްޓިވަލްގެ ހަރަކާތްތައް ކުރިއަށް ގެންދެވިފައިވާ ކަމަށެވެ.

މިއަހަރު މިއީ ދެވަނަ ފެސްޓިވަލްކަން ފާހަގަކުރައްވައި ފަރުހާން ވިދާޅުވީ، 2018 ވަނަ އަހަރު ފެސްޓަލް ނުބޭއްވުނީ މަގުހެދުމުގެ މަޝްރޫއު ކުރިއަށްދިއުމާއި، ތަފާތު އެކިއެކި ސަބަބުތަކާ ހުރެ ސްވިމިންގ ޓްރެކް ނުލިބިގެން ކަމަށެވެ.

ފަރުހާން ވިދާޅުވީ ކްލަބްގައި ގާތްގަނޑަކަށް 250 އެއްހާ ކުދިން ރަޖިސްޓަރ ވެފައި އެބަތިބި ކަމަށާއި، 10 ލެވަލްއަކަށް ކުދިންތައް ބަހާލައިގެން ކްލާސްތައް ކުރިއަށް ގެންދާ ކަމަށެވެ.

''ނިއު ލެގޫންސް ސްވިމިންގ ކްލަބްގައި އޮންނާނީ ލެވަލްތަކަކަށް ބަހާލާފައި. ކޮންމެ ލެވަލްއެއްގައި ވެސް ކޮންމެސް ސްކިލެއް ކިޔަވައި ދެމުން ސިލަބަސްއެއް އޮންނާނެ. އެސިލަބަސް އަޕްގްރޭޑްވަމުންދާ ވަރަކަށް ލެވަލް އަޕްގްރޭޑްވަމުންދާނެ. ދެން އެލަވަލްއެއްގައި އެކުއްޖަކަށް ދަސްވެފައި ހުރި އެއްޗެއް މިއިވެންޓްގެ ގޮތުގައި ކުރިއަށްދާނީ އަސްލު'' ފަރުހާން ވިދާޅުވިއެވެ.

ފަރުހާން ވިދާޅުވީ، ލެވަލް ފެސްޓިވަލް އިތުރަށް ފެންވަރު ރަނގަޅު ކުރުމަށް މަސައްކަތް ކުރަމުން އަންނަ ކަމަށާއި، އަންނަ އަހަރު މިފެސްޓިވަލް މިއަހަރަށްވުރެ ފުރިހަމަވާނެ ކަމަށެވެ. އަދި މިއަހަރު ކުދިންނަށް ބަހަމުންދާ މެޑަލްތަކަކީ ކްލަބުން ފެންވަރު ރަނގަޅުކޮށް ހައްދައިގެން ގެނައި އެއްޗެހި ކަމަށެެވެ.

''އަޅުގަނޑުމެންނަށް މިކަހަލަ އިވެންޓްތައް ފެންވަރު ރަނގަޅުކޮށް ބޭއްވުމުގައި ބައެއް ފަހަރު ދަތިތަކާއި ކުރިމަތިވޭ ކްލަބެއްވީމަ ބައެއް ފަރާތްތަކުން ސްޕަންސަރ ދޭން ތަންކޮޅެއް ޖެހެލުންވާތަން ނޫނީ ބައެއްފަހަރު އުޒުރުވެރިވާތަން އެބައާދޭ. އެހެންވީމަ އަޅުގަނޑުމެން ވަރަށް ބޮޑަށް ރިކުއެސްޓް ކުރަން ބޮޑެތި ކޮންޕެނީތަކުން އަޅުގަނޑުމެން އާދައިގެ ކްލަބެއް ކަމަށް ނުބަލުމަށް. މިރާއްޖޭގައި އަޅުގަނޑުމެން ހަމައެކަނި ކުޅިވަރު ކުރިއަރުވަނީއެއްނޫން.'' ފަރުހާން ވިދާޅުވިއެވެ.

ފަރުހާން ވިދާޅުވީ، ކުދިންތަކެއް ފުރާނަ ސަލާމަތް ކޮށްދިނުމަށްޓަކައި ލައިފް ސްކިލް ދަސްކޮށްދެމުން ކުޅިވަރެއްގެ ގޮތުގައި ކުރިއަރުވަމުން އަންނަ ކަމަށެވެ.

2012 ވަނަ އަހަރުން ލެގޫން ސްވިމިން ނަމުގައި އުފެދުނު މިކްލަބް 2015 ވަނަ އަހަރު ރީބްރޭޑްކޮށް ނިއުލެގޫން ސްވިމިންގެ ނަމުގައި ހިންގަމުން އަންނަ ކްލަބެކެވެ. މިއީ ރާއްޖޭގައި ސްވިމިންގައި ގައުމީ ތަށި މިލްކު ކުރެވިފައިވާ ހަމައެކަނި ކްލަބެވެ.