ވީއޭއާރްގެ ސަބަބުން ފުޓުބޯޅައިގެ ފޯރި ކުޑަވެއްޖެ: މޮރީނިއޯ

ދާދިފަހުން ޓޮޓެންހަމް ހޮޓްސްޕަރގެ ކޯޗުކަމާއި ހަވާލުވި ހޯޒޭ މޮރީނިއޯގެ ރުޅިގަނޑު ވީއޭއާރް އަށް ބައިލައިފިއެވެ.

އިނގިރޭސި ޕްރިމިއަރ ލީގުގައި ޗެލްސީ އަތުން ބަލިވި މެޗަށްފަހު ވާހަކަދައްކަމުން މޮރީނިއޯ ބުނީ ވީއޭއާރްގެ ސަބަބުން ދުނިޔޭގެ އެންމެ ފެންވަރު ރަނގަޅު ލީގުގެ ފޯރި ކުޑަވެއްޖެ ކަމަށެވެ.

ޗެލްސީ އަދި ޓޮޓެންހަމް ކުޅުނު މެޗުގައި ޓޮޓެންހަމްގެ އިތުބާރު ފޯވަރޑް ސޮންއަށް ދެއްކި ރަތްކާޑާއި ގުޅިގެން މޮރީނިއޯ ބުނީ ރެފްރީ ކަންކުރީ ކަން ކުރަން އޮންނަ ގޮތަށް ނޫންކަމަށާއި އެ މެޗުގައި ރެފްރީކަންކުރި ރެފްރީއަށް ސޮން ފައުލްކުރިކަން ވެސް އިނގުނީ ވީޑިއޯ އެސިސްޓެންޓް އެކަން ބުނުމުން ކަމަށެވެ. އެހެންކަމުން ސޮން އަށް ރަތް ކާޑު ދެއްކުން އެއީ އެންމެ އެކަށީގެންވާ ގޮތް ނޫންކަމަށްވެސް މޮރީނިއޯ ބުންޏެވެ.

މޮރީނިއޯ އިތުރަށް ބުނީ ވީއޭއާރް އަކީ ފުޓުބޯޅައިގެ ފޯރި އިތުރަށް ގެނައުމަށް ބޭނުން ކުރަން ފެށި އެއްޗެއްކަމަށާއި ނަމަވެސް ކަން ނިމިގެންދާއިރު ވީއޭއާރްގެ ސަބަބުން ފުޓުބޯޅައިގެ ފޯރި ދުވަހެއް ދުވަހަކަށް ދަށްވަމުން އަންނަ ކަމަށެވެ.

މި ސީޒަނުގައި ދަށް ނަތީޖާ ތަކެއް ނެރެމުން އަންނަ ޓޮޓެންހަމްއިން އޮތީ ލީގު ތާވަލުގެ 7 ވަނައިގައި ލިބުނު 26 ޕޮއިންޓާއެކުގައެވެ. އެއްވަނައިގައި އޮތް ލިވަރޕޫލަށް 49 ޕޮއިންޓް ލިބިފައިވާއިރު ލީގު ތާވަލުގެ ދެވަނައިގައި ލެސްޓާ ސިޓީ އޮތީ 39 ޕޮއިންޓާ އެކުގައެވެ. އަދި ތިންވަނައިގަ އޮތް އެންމެ ފަހުގެ ލީގު ޗެމްޕިއަން ސިޓީ އަށް ލިބިފައިވަނީ 38 ޕޮއިންޓެވެ.