ޕޮޒިޓިވް ކޭސްތަކުގެ އަދަދު 7500ށް މައްޗަށް!
މިއަދު ޕޮޒިޓިވްވެފައިވަނީ 109 މީހަކު
މާލެސިޓީގެ މަގުމަތި
އިތުރު 109 މީހަކު ޕޮޒިޓިވްވެ، ރާއްޖޭގައި ކޮވިޑް-19 ޖެހުނު މީހުންގެ އަދަދު 7578ށް އަރައިފިއެވެ.
އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާއިރު ހޮނިހިރު ދުވަހު ޕޮޒިޓިވްވި 109 މީހުންގެ ތެރޭގައި ގިނައީ ދިވެހިންނެވެ. އެގޮތުން 80 ދިވެހިން ޕޮޒިޓިވްވެފައިވާ އިރު ދެން ހިމެނެނީ ބަންގުލަދޭޝްގެ 24 މީހަކާއި، ސްރީލަންކާގެ 2 މީހެއްގެ އިތުރުން ނޭޕާލު މީހެކެވެ.
ހޮނިހިރު ދުވަހު ރިޕޯޓް ކުރި 109 ހުރިހާ ކޭސްތަކުގެ ތެރެއިން ގްރޭޓަރ މާލެ ސަރަހައްދުން 106 ކޭސް ވަނީ ފެނިފައެވެ.
ބަލިން ރަނގަޅުވި މީހުންގެ އަދަދު ވަނީ 4925ށް އަރާފައެވެ. ހޮނިހިރު ދުވަހު ޕޮޒިޓިވްވި 109 މީހުންނާއެކު ފަރުވާ ދެމުންދާ މީހުންގެ އަދަދަކީ 2619 އެވެ. އެޗްޕީއޭއިން ބުނީ މިވަގުތު 184 މީހަކަށް އެޑްމިޓްކޮށްގެން ފަރުވާދެމުން އަންނަ ކަމަށެވެ.
ޖުމްލަ 1482 މީހަކު ވަނީ އައިސޮލޭޓް ކުރެވިފައެވެ. މިހާތަނަށް ރާއްޖޭގައި 28 މީހަކު ވަނީ ބަލީގައި ނިޔާވެފައެވެ. އަދި ނިޔާވި މީހުންގެ ތެރޭގައި ގިނައީ ދިވެހިންނެވެ.
