ކުޅުދުއްފުށީގައި ޓަރޝަރީ ހޮސްޕިޓަލް: 130،493 އަކަފޫޓްގެ ބިމެއް ހަމަޖައްސައިދީފި
ސަރުކާރުން އެދުނީ 360،000 އަކަފޫޓުގެ ބިމެއް ދޭން
ކުޅުދުއްފުށި ހިއްކި ބިމުގެ ސަރަހައްދު: ޓަރޝަރީ ހޮސްޕިޓަލު އަޅަން ހަމަޖެހިފައިވަނީ މިސަރަހައްދުގައި
ހދ. ކުޅުދުއްފުށީގައި ޓަރޝަރީ ފެންވަރުގެ ހޮސްޕިޓަލެއް ތަރައްގީ ކުރުމަށް ބޭނުންވާ ބިން، ކުޅުދުއްފުށި ކައުންސިލުން ހަމަޖައްސައިފި އެވެ.
ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން އާ ހަވާލާދެއްވައި ކުޅުދުއްފުށި އޮންލައިން އިން ބުނެފައިވަނީ، ޓަރޝަރީ ހޮސްޕިޓަލް ތަރައްގީ ކުރަން ބޭނުން ބިން ހޯދުމުގެ މަސައްކަތުގެ މަޝްވަރާތައް އެންމެ ފުރަތަމަ ފަށާފައިވަނީ ޖެނުއަރީ މަހުގައި ކަމަށެވެ. އޭރު ސަރުކާރުން އެދިފައިވަނީ އެ ހޮސްޕިޓަލް އެޅުމަށް 360،000 އަކަފޫޓް ހޯދުމަށެވެ. ނަމަވެސް ކުޅުދުއްފުއްޓަކީ ބިމު ޖާގަ ދަތި ރަށަށް ވާތީ ކައުންސިލުން ސަރުކާރުން އެދުނު އަަދަދަށް ބިން ދިނުމަށް ދެކޮޅު ހެދި އެވެ.
ނަމަވެސް، ފަހުން މަޝްވަރާކުރުމަށްފަހު ކައުންސިލުން ނިންމީ 130،493 އަކަފޫޓްގެ ބިމެއް ހޮސްޕިޓަލް ތަރައްގީކުރުމަށް ދިނުމަށެވެ. އެ ބިން ހަމަޖައްސައިދީފައިވަނީ ހިއްކި ބިމުން ނެވެ. އަދި ބިން ހަމަޖެއްސުމަށްފަހު، އެކަން ސަރުކާރުގެ ކަމާ ގުޅުން ހުރި ފަރާތްތަކަށް އަންގާފައިވާ ކަމަށް ކައުންސިލުން ބުނެއެވެ.
ރާއްޖޭގެ ފަސް ސަރަހައްދެއްގައި ޓަރޝަރީ ފެންވަރުގެ ހިދްމަތް ދެވޭ ފަސް ހޮސްޕިޓަލު އެޅުމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ވައުދު ފުޅެކެވެ.
ކުޅުދުއްފުށީގައި ހުންނަ ރީޖަނަލް ހޮސްޕިޓަލަކީ އަތޮޅުތެރޭގެ އެންމެ ގިނަ ރައްޔިތުން ހިދުމަތް ހޯދަމުންދާ އެއް ހޮސްޕިޓަލެވެ.
ވެންޓިލޭޓަރ ގަތުމުގައި ބޮޑެތި އޮޅުވާލުންތަކެއް ހުރިކަން، ހެލްތް މިނިސްޓްރީގެ ކޮވިޑް-19 އާ ގުޅޭ ޚަރަދުތަކުގެ ކޮމްޕަލަޔަންސް އޮޑިޓް ރިޕޯޓްގައި ފާހަގަކޮށްފައިވާތީ، އެމައްސަލަ ތަހުގީގު ކުރަމުންދާތީ، އަމިއްލަ ފުޅަށް ވަޒީފާގެ މަސްއޫލިއްޔަތުން އެކަހެވިވެ ވަޑައިގެން ހުންނެވި، ހެލްތް މިނިސްޓަރ އަބްދުﷲ އަމީން ރާއްޖެޓީވީއަށް މީގެކުރިން ދެއްވި އިންޓަވިއުއެއްގައި ވިދާޅުވެފައިވަނީ، މި އަހަރުގެ ތެރޭގައި ރާއްޖޭގެ ފަސް ސަރަހައްދުގައި ގާއިމުކުރެވޭ ފަސް ޓަރޝަރީ ހޮސްޕިޓަލުން ހިދްމަތް ފޯރުކޮށްދެވޭނެ ކަމަށެވެ.
އަމީން ވިދާޅުވެފައި ވަނީ، މިއަހަރުގެ ތެރޭގައި 5 ޓަޝިއަރީ ހޮސްޕިޓަލުގެ ފުރިހަމަ ހިދްމަތްތައް ލިބެން ފެށުމާއެކު މިއަހަރުގެ ތެރޭގައި ވެސް ސިއްހީ ދާއިރާއިން ބޮޑެތި ކުރިއެރުންތަކެއް އަންނާނެ ކަމަށެވެ.
މިސަރުކާރުން ޓާޝިއަރީ 5 ހޮސްޕިޓަލުގެ ގޮތުގައި ކަނޑައަޅާފައިވަނީ، އައްޑޫ އިކުއިޓޯރިއަލް ހޮސްޕިޓަލާއި ހދ. ކުޅުދުއްފުށި ރީޖަނަލް ހޮސްޕިޓަލާއި ލ. ގަން ރީޖަނަލް ހޮސްޕިޓަލް، ގދ. ތިނަދޫ އަބްދުއްޞަމަދު މެމޯރިއަލް ހޮސްޕިޓަލް އަދި ބ. އޭދަފުށި ރީޖަނަލް ހޮސްޕިޓަލް އެވެ.
އައްޑޫ އިކުއިޓޯރިއަލް ހޮސްޕިޓަލަކީ، މުޅިން އަލަށް ތަރައްގީ ކުރަމުން އަންނަ ހޮސްޕިޓަލެކެވެ. ދެން ހުރި ރީޖަނަލް ހޮސްޕިޓަލްތަކަކީ ކުރިންވެސް ހިދްމަތް ދެމުންދިޔަ ހޮސްޕިޓަލުތައް ކަމަށްވާތީ، އެ ހޮސްޕިޓަލުތަކުން ޓަޝިއަރީ ފެންވަރުގެ ސިއްހީ ހިދްމަތް ދިނުމަށް ބޭނުންވާ ޖާގަ އިތުރުކުރުމާއި، އިމާރާތް އަދި މަރާމާތު ކުރުމުގެ މަައްސަކަތް ދަނީ ކުރިއަށެވެ.
މިހާރު ބެލެވިފައިވާ ގޮތުގައި، ކުޅުދުއްފުށީގައި ހިއްކި ބިމުގައި ގާއިމު ކުރެވޭ، ޓަރޝަރީ ހޮސްޕިޓަލް ގައިމުކޮށް ނިމެންދެން ޓަރޝަރީ ހޮސްޕިޓަލުގެ ހިދްމަތް ދެމުންދާނީ ކުޅުދުއްފުށި ރީޖަނަލް ހޮސްޕިޓަލުން ނެވެ.
ރާއްޖޭގެ ފަސް ސަރަހައްދުގައި ގާއިމު ކުރެވޭ ފަސް ޓަރޝަރީ ހޮސްޕިޓަލްތަކުން އެމްއާރުއައި ސްކޭނާއި ސީޓީ ސްކޭންތައް ހެދި ބޮޑެތި އޮޕަރޭޝަންތައް ކުރުމުގެ އިންތިޒާމުތައް ހަމަޖެހޭނެ އެވެ. ހެލްތް މިނިސްޓްރީން މައުލޫމާތު ދީފައިވާގޮތުގައި، އެ ފަސް ހޮސްޕިޓަލުގެ ތަރައްގީގެ ތެރެއިން ބޭނުންވާ އިންސާނީ ވަސީލަތާއި ބޭނުންވާ އިކުއިޕްމަންޓް، މެޝިނަރީތައް ފަދަ ތަކެތި މިހާރު ވަނީ ހަމަކުރެވިފަ އެވެ. މިހާރު ކުރަން ހުރި މަސައްކަތްތަކަކީ ހޮސްޕިޓަލުތަކުގެ އިމާރާތަށް ގެންނަންޖެހޭ ބަދަލުތައް ގެނައުންފަދަ ޖާގަ އިތުރުކުރުމުގެ މަސައްކަތްތަކެވެ.
