ލަންކާގައި ދިވެހި ކުއްޖާ ނިޔާވީ ސްވައިން ފްލޫ ޖެހިގެނެއް ނޫން: އާސީރީ ހޮސްޕިޓަލް
އާސީރީ ހޮސްޕިޓަލުގައި ނިޔާވެފައިވަނީ 10 އަހަރުގެ ކުއްޖެއް
އާސިރީ ހޮސްޕިޓަލް
ލަންކާގެ އާސިރީ ހޮސްޕިޓަލުގައި ދިވެހި ކުޑަކުއްޖާ ނިޔާވީ ސްވައިން ފްލޫ ޖެހިގެން ނޫން ކަމަށާއި އެކުއްޖާ ނިޔާވެފައިވަނީ އިންފްލޫއެންޒާ އޭ އަށް ޕޮލިޓިވް ވެގެން ކަމަށް އާސީރީ ހޮސްޕިޓަލުން ބުނެފި އެވެ.
މިކަމާ ގުޅޭ ގޮތުން ރާއްޖެއެމްވީ އަށް މައުލޫމާތުދެއްވި، އާސީރީ މެޑިކަލްގެ މެޑިކަލް ޑިރެކްޓަރ ޑރ ހަސަންތީ އިއްޑަމަލްގޮޑާ ވިދާޅުވީ އެ ހޮސްޕިޓަލުގައި މަރުވި 10 އަހަރުގެ ދިވެހި ކުއްޖާގެ ފުރާނަ ސަލާމަތްކުރުމަށް ކުރެވެން ހުރި ހުރިހާ ކަމެއް ކޮށްފައިވާ ކަމަށެވެ. އެކުއްޖާގެ މެޑިކަލް ރިޕޯޓުތަކުން ދައްކާ ގޮތުން، ނިއުމޯނިއާ އަށް ޕޮސިޓިވް ވެފައިވާ އިރު، އިންފްލުއެންޒާ އޭ އަށްވެސް ޕޮސިޓިވް ވެފައިވާކަމަށް އޭނާ ވިދާޅުވި އެވެ. ބައެއް މީޑިޔާ ރިޕޯޓުތަކުގައި ސްވައިން ފްލޫ ޖެހިގެން އެކުއްޖާ ނިޔާވިކަމަށް ހުރި ނަމަވެސް އެކުއްޖާގައިގާ ސްވައިނު ފްލޫ ނެތް ކަމަށް އޭނާ ވިދާޅުވި އެވެ.
"އެކުއްޖާގެ ގައިން ސްވައިން ފްލޫގެ ފެނިފައެއްނުވޭ. އެކުއްޖާ ހަމައެކަނި ޕޮސިޓިވް ވެފައިވަނީ އިންފްލުއެންޒާ އޭ އަށް. އެއްކުއްޖާ ބަލިވެގެން އުޅޭތާ 10 ދުވަސް ވިއިއު އެންމެ ފުރަތަމަ ދައްކާފައިވަނީ އެހެން ހޮސްޕިޓަލަކަށް." ޑރ ހަސަންތީ އިންޑަމަލްގޮޑާ ވިދާޅުވި އެވެ.
އެ ކުއްޖާއަށް ވަގުތުން އައިސީޔޫގައި ފަރުވާދެވެން ފެށުނު ކަމަށް ވެސް އޭނާ ވިދާޅުވި އެވެ.ޑރ ހަސަންތީ ވިދާޅުވީ، އެކުއްޖާ އާސިރީގެ ކުރިން ދެއްކި ހޮސްޕިޓަލުގައި އެޑްމިޓް ކުރުމަށް އެންގުނު ނަމަވެސް އެކުއްޖާ އެޑްމިޓް ނުކުރާކަމަށް މައުލޫމާތު ލިބިފައިވާ ކަމަށެވެ. އަދި އާސިރީއަށް ގެންނަ އިރު ކުއްޖާގެ ހާލުވަރަށް ސީރިއަސް ކަމަށް އޭނާ ވިދާޅުވި އެވެ.
10 އަހަރުގެ ކުއްޖަކު އިންފްލުއެންޒާ ޖެހިގެން ނިޔާވެފައިވާ އިރު ރާއްޖޭގައިވެސް އެޗްވަންއެންވަން އިންފްލުއެންޒާ އެއް އަންނަނީ ވަރަށް ބާރު ސްޕީޑުގައި ފެތުރެމުންނެވެ.
