އައްޑޫމީދޫ ދާއިރާގެ މެންބަރާއި މަޑުއްވަރީ ދާއިރާގެ މެންބަރުގެ ސިޔާދަތީ ކޯޅުން

ސިޔާދަތީ ބާރެއް ދޫކޮށްލައިފިއްޔާ އަޅުގަނޑުމެންވެސް ނިކުންނާނެ ކަމަށާއި، އެނަމުގައި ކޮވިޑް ފަތުރަން އުޅުއްވާ ސަބަބެއް ވިސްނިވަޑައިނުގަންނަވާ ކަމަށް ވިދާޅުވެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް މަޑުއްވަރީ ދާއިރާގެ މެންބަރަށް ބަހުގެ ހަމަލާތަކެއް ރައްދުކުރައްވައިފިއެވެ.

ރާއްޖެ ވިއްކާލުމާ ދެކޮޅުކަމަށް ބުނެ އިދިކޮޅު ކޯލިޝަނުން ހުކުރުދުވަހު ބޭއްވި މުޒާހަރާގެ ތެރެއިން މަޑުއްވަރީ ދާއިރާގެ މެންބަރު އަދި ކުރީގެ ޑިފެންސް މިނިސްޓަރު އާދަމް ޝަރީފް ކުރެއްވި ޓްވީޓުގައި ވަނީ ރާއްޖޭގެ ސިޔާދަތީ ބާރުތައް ރައްކާތެރިކުރުމަށް ކުރަންޖެހޭ ކޮންމެ ކަމެއް ކުރުމަށް ދިވެހިން ތައްޔާރު ކަމަށެވެ. އަދި ސިޔާދަތީ ބާރުތައް ދޫކޮށްލާނީ ގައުމުގެ ޚާއިނުން ކަމަށެވެ.

މިޓްވީޓަށް ރައްދު ދެއްވާ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ކުރެއްވި ޓްވީޓެއްގައި ވިދާޅުވީ، ތީހަމަ ތެދުފުޅެއް ކަމަށާއި، ތިޔަ ވިދާޅުވާ ސިޔާދަތީ ބާރުތައް ދޫކޮށްލައިފިނަމަ އަޅުގަނޑުމެންވެސް ނުކުންނާނެ ކަމަށެވެ. އެހެން ނަމަވެސް އެފަދަ ކަމެއް ނުވަނީސް ކޮވިޑް-19 ފަތުރަން ނުކުމެ އުޅުއްވާ ހަގީގީ ބޭނުމެއް އެއްގޮތަކަށްވެސް ވިސްނިވަޑައިނުގަންނަވާ ކަމަށެވެ. އަދި ބަޔަކު ދުނިޔޭގައި ތިބެގެން އާދަމް ޝަރީފަށް އުނދަގޫވެ ވަޑައިގަންނަވަނީތޯވެސް ރޮޒައިނާ ވަނީ އައްސަވާފައެވެ.

ރޮޒައިނާ މިމޭރުމުން އާދަމް ޝަރީފަށް ބަހުގެ ހަމަލާތަކެއް ރައްދުކުރެއްވިއިރު، އިދިކޮޅުން ހުކުރުދުވަހު ވަނީ ރާއްޖެ ވިއްކާލަނީ ކަމަށް ބުނެ އެޗްޕީއޭގެ މިންގަނޑުތަކާ ޚިލާފަށް ޒުވާނުންގެ ސައިކަލުބުރެއް ބާއްވާފައެވެ. އެކަމާ ގުޅިގެން ގިނަ ރައްޔިތުންތަކެއްވަނީ އިދިކޮޅުން ކުރިއަށްގެންދިޔަ އެއްވުން ކުއްވެރިކޮށްފައެވެ. އަދި އެޗްޕީއޭގެ މިންގަނޑުތަކާ ހިލާފުވުމުގެ ސަބަބުން ފުލުހުން ވަނީ އެކަން ތަހުގީގުކުރާނެކަންވެސް ހާމަކޮށްފައެވެ.

ކުރީގެ ރައީސް ޔާމީން ސަރުކާރުގައިވެސް ރާއްޖޭގެ ފަޅުތަކާއި ބިންތައް ވިއްކުމަށްޓަކައި ތަފާތު އެކި ބިލްތައް ފާސްކޮސް ގިނަ މަސައްކަތްތަކެއްވަނީ ކޮށްފައެވެ. ނަމަވެސް އޭރު އިދިކޮޅުގައި ތިބި ފަރާތްތަކުން މަގުތަކަށްނުކުމެ ކުރި ސިލްސިލާ މުޒާހަރާތަކުގެ ސަބަބުން އެކަންވަނީ ކުރެވޭ ގޮތް ނުވެފައެވެ. އޭގެ ތެރެއިންވެސް ރައްޔިތުންގެ އެންމެ ބޮޑު ހިތްހަމަނުޖެހުމަކަށް ވެގެންދިޔައީ ފާފު އަތޮޅުން ބައެއް ސައުދީ ދިނުމަށްޓަކައި ނުވަތަ ވިއްކާލުމަށްޓަކައި މަޖިލީހުން ފާސްކުރި ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނާ ގުޅިގެންނެވެ.