ސިޔާސީ ހަރަކާތްތައް ޒިންމާދާރު ކަމާއިއެކު ކުރުމަށް މަހްލޫފް ގޮވާލައިފި
އިދިކޮޅުން ބޭއްވި މުޒާހަރާގައި އެއްވެސް ވަރަކަށް ގައިދުރުކަމެއް ނެތް
އިދިކޮޅު ޕީޕީއެމް، ޕީއެންސީއިން ހުކުރު ދުވަހު ބޭއްވި މުޒާހަރާގެ ތެރެއިން
ސިޔާސީ ހަރަކާތްތައް ޒިންމާދާރު ކަމާއިއެކު ކުރުމަށް ޔޫތު މިނިސްޓަރު އަހުމަދު މަހުލޫފް ގޮވާލައިފިއެވެ.
ހުކުރު ދުވަހު ޕީޕީއެމް، ޕީއެންސީއިން މާލޭ އާއި ރާއްޖޭގެ އެކި ކަންކޮޅުތަކުގައި ބޭއްވި އެއްވުމަށް ފާޑު ވިދާޅުވެ، މަހުލޫފް ކުރެއްވި ޓްވީޓެއްގައި ވިދާޅުވީ ސިޔާސީ ހަރަކާތްތައް ޒިންމާދާރު ކަމާއިއެކު ކުރުމަށް ގޮވާލާ ކަމަށެވެ.
މަހުލޫފް އިތުރަށް ވިދާޅުވީ ތަންތަނަށް އެއްވާ ހިތްވަނިއްޔާ ރައީސް ޔާމީން ވިދާޅުވާހެން ހައްޖަށް ނުދިޔަޔަސް މުޒާހަރާކޮށް އެއްވެ އުޅެވޭނެ ކަމަށެވެ.
މަހުލޫފް ވިދާޅުވީ، ޑޮކްޓަރުންނާއި ނަރުހުންގެ އިތުރުން ފްރޮންޓް ލައިންގައި މަސައްކަތްކުރާ ފަރާތްތަކުން ވަރުބަލިވެ ވެއްޓެންދެން މަސައްކަތް ކުރާތާ ހަތް މަސް ވެފައިވާ ކަމަށެވެ.
އިދިކޮޅުން މާލޭގައި މުޒާހަރާ ކޮށްފައިމިވަނީ ރާއްޖޭގައި ކޮވިޑް-19 ފެތުރެމުންދާ ހާލަތު ގޯސްވަމުން ދަނިކޮށެވެ. ދުވަހެއް ދުވަހަކަށް ޕޮޒިޓިވްވާ ކޭސްތަކުގެ އަދަދު އިތުރުވަމުން އަންނައިރު އެންމެ މަދުވެގެން ފަސް މީހުންނަށް ވުރެ ގިނަ މީހުން އެއް ނުވުމަށް އެޗްޕީއޭއިން ތަކުރާރުކޮށް ހަނދާން ކޮށްދެމުންނެވެ. ދުވާލެއްގެ މައްޗަށް 100 އަށް ވުރެ ގިނަ ކޭސް ރިޕޯޓް ކުރެވެމުން އަންނައިރު މީގެ ދެ ގުނަ އަށް މީހުން ޕޮޒިޓިވްވާން ފަށައިފިނަމަ ހޮސްޕިޓަލުގެ އެނދުތައް ފުރި ސިއްހީ ނިޒާމަށް ނުކަތާ ވަރަށް ހާލަތު ގޯސްވެދާނެ ކަމަށް ޑޮކްޓަރުން ދަނީ ތަކުރާރުކޮށް ބުނަމުންނެވެ.
މުޒާހަރާގެ ބައިވެރިން ގޮވާލަމުން ދިޔައީ ވިޔަފާރިތަކަށް ގެއްލުން ދިނުން ހުއްޓާލުމަށާއި، ސައިކަލްތައް ޖޫރިމަނާކުރަން ހުއްޓާލަން ގޮވާލަމުންނެވެ. އެމީހުން ވަނީ ރައީސް އިބްރާހިމް މުހައްމަދު ސޯލިހުގެ އިސްތިއުފާ އަށް ވެސް ގޮވާފައެވެ. އެޗްޕީއޭގެ ގައިޑްލައިންތަކާއި ދެކޮޅަށް މުޒާހަރާ ކުރަން ފުލުހުން ވަނީ ޖާގަދީފައެވެ.
