ބޯކޮށް ވާރޭ ވެހި ކަރާޗީގެ މަގުތަކުގައި ކޯރު ހެދިއްޖެ

ޕާކިސްތާނުގެ ކަރާޗީއަށް ބޯކޮށް ވާރޭވެހި މަގުތަކުގައި ފެންބޮޑުވެ، އާންމު ދިރިއުޅުމަށް ބުރޫ އަރައިފިއެވެ.

ޕާކިސްތާނުގެ މީޑިއާ ތަކުން ރިޕޯޓްކޮށްފައިވާ ގޮތުގައި މިއީ މިދިޔަ 89 އަހަރު ތެރޭގައި ކަރާޗީއަށް ރެކޯޑް މިންވަރަކަށް ވާރޭ ވެހުނު ފަހަރެކެވެ.

އެހެން އަހަރުތަކުގެ ވެސް އޮގަސްޓު މަހަކީ ޕާކިސްތާނުގެ ވިއްސާރަ މޫސުމެވެ. އަދި ޕާކިސްތާނުގެ އެކި އަވަށުތަކުގައި ފެންބޮޑުވެއެވެ. ޕާކިސްތާނުގެ މޫސުމާއި ބެހޭ އިދާރާއިން ބުނީ އެހެން އަހަރުތަކާއި ހިލާފަށް މިއަހަރުގެ ވިއްސާރަ މޫސުމުގައި އެގައުމުގެ އެކި ހިސާބުތަކަށް ބޯކޮށްވާރެވެހޭނެ ކަމަށެވެ. އަދި ކަރާޗީއަށް މިހާރު ކުރަމުންދާ ވިއްސާރަ އަކީ ރެކޯޑެއް ކަމަށް އެ އިދާރާއިން ބުނެއެވެ.

ޕާކިސްތާނުގެ މީޑިއާ ތަކުން ރިޕޯޓް ކޮށްފައިވާ ގޮތުގައި ކަރާޗީގެ މަގުތަކުގައި ފެން ބޮޑުވެ ކޯރު ހެދިފައިވާއިރު، ބައެއް ގެތަށް ވަނީ ފެނު އަޑީގައެވެ.

ޕާކިސްތާނު ސަރުކާރުގެ އިސް އޮފިޝަލަކު ވިދާޅުވީ މިހާރު ކުރަމުންދާ ވިއްސާރައިގައި ހާލުގައި ޖެހިފައި ތިބި ފަރާތްތަކަށް އެހީތެރިވުމަށް މަސައްކަތް ކުރަމުން އަންނަ ކަމަށާއި، އެގޮތުން ފެން ބޮޑުވެފައިވާ ސަރަހައްދުތަކުގައި ތިބި މީހުން ސަލާމަތީ ހިސާބުތަކަށް ބަދަލުކުރުމަށް މަސައްކަތް ކުރަމުންދާ ކަމަށެވެ.