ހުޅުމާލޭ ޖަލުގައި ތިބި ހަ މީހަކަށް ކޮވިޑު ޖެހިއްޖެ
އިތުރު މީހުން ޓެސްޓު ކުރުމުގެ މަސައްކަތްތައް ދަނީ ކުރިޔަށް
ގައިދީންތަކެއްގެ ސާމްޕަލް ނަގަނީ
ހުޅުމާލޭ ޑިޓެންޝަނުގައި ބަންދުކޮށްފައި ތިބި ހަ މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ކަރެކްޝަނުން ބުނެފިއެވެ.
ކަރެކްޝަނުން އާއްމު ކޮށްފައިވާ ބަޔާނެއްގައި ބުނީ، ޕޮޒިޓިވްވި ހަ މީހުންގެ ތެރެއިން ފަސް މީހުންނަކީ އިމިގްރޭޝަން ގާނޫނާ ހިލާފުވެގެން ފުރުވާލެެވެންދެން ބައިތިއްބާފައި ތިބި ފަސް ބިދޭސީންނާއި، ހުޅުމާލެ ޖަލުގައި ހުކުމް ތަންފީޒު ކުރަމުންދިޔަ ގައިދީއެއް ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އަންގާފައިވާ ކަމަށެވެ.
ހުޅުމާލޭ ޖަލުގައި ކޮވިޑް ވައިރަސް ވަދެފައި ކަމަށް ބެލެވެނީ އަލަށް ގެނެވުނު ބިދޭސީންގެ ފަރާތުން ކަމަށް ކަރެކްޝަނުން ބުންޏެވެ. ކޮވިޑު ކޭސްތަކެއް ފެނުމާއި ގުޅިގެން މިހާތަނަށް ޖުމްލަ 10 އޮފިސަރުންނާއި ދެ ނަރުހުންގެ އިތުރުން 19 ގައިދީންނާއި އެއް ގައިދީއެއްގެ ސާމްޕަލް ނަގާފައިވާ ކަމަށް ކަރެކްޝަނުން މައުލޫމާތުދެއެވެ.
ކަރެކްޝަނުން ބުނީ، މި ހާލަތާ ގުޅިގެން އެޗްޕީއޭގެ ގައިޑްލައިންތަކާ އެއް ގޮތަށް ކަނޑައެޅިފައިވާ އުސޫލުތަކާ އެއްގޮތަށް ޖަލުން ދެމުންދާ ހިދުމަތްތައް މެދު ނުކެނޑި ދެމުންދާނެ ކަމަށެވެ.
