ސްޓޫޑަންޓް ލޯނުގެ އިދާރީ ދާއިރާގެ ކެޓަގަރީއަށް ޝައުގުވެރިކަން ކުޑަ: ހަޔަރ އެޑިއުކޭޝަން
އިދާރީ 87 ދައިރާއަށް ހާއްސަކޮށްގެން ކެޓަގަރީއެއް އިއުލާނު ކުރުމުން އެކެޓަގަރީން ކުރިމަތިލީ 46 ދަރިވަރުން
ރައްޔިތުންގެ މަޖިލީހުގެ އިޖުތިމާއީ ކޮމެޓީން މިއަދު ބޭއްވި ބައްދަލުވުމަށް ހަޔަރ އެޑިއުކޭޝަން މިނިސްޓަރާއި އިސްވެރިން ބައިވެރިވެ ވަޑައިގެން މައުލޫމާތު ހިއްސާ ކުރައްވަނީ
ދަރުވަރުންނަށް މަތީ ތައުލީމުގެ ފުރުސަތު ހޯދާ ދިނުމަށް، ސަރުކާރުން ދޫކުރާ ލޯނު ސްކީމުގައި، ރައްޔިތުންގެ މަޖިލީހުގެ ގޮނޑިތައް ބެހިފައިވާ ގޮތަށް ކޮންމެ ދާއިރާއަކަށް ހާއްސަކޮށްގެން ޖާގައެއް ކަށަވަރު ކޮށްދިން ނަމަވެސް އެ ކެޓަގަރީން ކުރިމަތިލާ ފަރާތްތައް މަދުކަން ހަޔަރ އެޑިއުކޭޝަނުން ފާހަގަ ކޮށްފި އެވެ.
ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމެޓީއަށް ވަޑައިގެން މައުލޫމާތި ދެއްވަމުން ހަޔަރ އެޑިއުކޭޝަން މިނިސްޓަރ ޑރ. އިބްރާހީމް ހަސަން ވިދާޅުވީ، އިދާރީ ދާއިރާތަކަށް ހާއްސަކޮށްގެން ކެޓަގަރީއަށް ހުޅުވާލުމުން، އެކެޓަގަރީން ކުރިމަތިލީ 46 ދަރިވަރުން ކަމަށެވެ.
މިނިސްޓަރު ވިދާޅުވީ، އިންތިހާބީ ދާއިރާއަށް ހާއްސަކޮށްގެން ކެޓަގަރީއެއް އިއުލާން ކުރުމަށްވުރެ، ރާއްޖޭގެ ކޮންމެ ރަށަކަށް ހާއްސަކޮށްގެން ކެޓަގަރީއެއް އިއުލާން ކުރުމުގެ ވިސްނުމެއް މިހާރު ގެންގެޅެމުންދާ ކަމަށެވެ. އަދި އެއީ ރަށްތަކުގެ ތަރައްގީއާ މީހުން ބިނާކުރުމަށް ރަނގަޅު ވިސްނުމެއް ކަމަށް ގަބޫލުކުރެވޭ ކަމަށްވެސް މިނިސްޓަރ އިބްރާހީމް ހަސަން ވިދާޅުވި އެވެ.
މިނިސްޓަރު ވިދާޅުވީ ދެން އިއުލާން ކުރެވޭ ލޯނު ސްކީމަށް ރާއްޖޭގެ ކޮންމެ ރަށަކަށް ހާއްސަކޮށްގެން، ކެޓަގަރީއެއް އިއުލާން ކުރުމުގެ ވިސްނުން ގެންގުޅުއްވާ ކަމަށެވެ. އަދި އިދާރީ 87 ދާއިރާއަށް އިއުލާން ކުރުމުން އެންމެ ގިނަ ވެގެންވެސް އެދެވެނީ 87 ލޯނު ސްކީމް ކަމަށެވެ. ނަމަވެސް ރާއްޖޭގެ ކޮންމެ ރަށަކަށް ޖާގައެއް ކަށަވަރުވާ ގޮތަށް ލޯނު ސްކީމެއް އިއުލާން ކުރާނަމަ، އެއީ 192 ޖާގަ ކަމަށް ވެސް އިބްރާހީމް ހަސަން ވިދާޅުވި އެވެ.
މަތީ ތައުލީމުގެ ލޯނަށް އެދެން ހުޅުވާލި ފުރުސަަތު ގައި ލޯނަށް އެދި ހުށައެޅި ދަރިވަރުންގެ ތެރެއިން 514 ދަރިވަރުންނަށް މަތީ ތައުލީމްގެ ލޯން ދޫކޮށްފައިވާ ކަމަށް މިނިސްޓަރ އިބްރާހީމް ހަސަން ވިދާޅުވި އެވެ.
