މައުމޫންގެ ރައްދު: އިންތިހާބުތައް އޮޅުވާލި ކަމަށް ބުނާއިރު، 2008ގެ އިންތިހާބު އޮޅުވާނުލެވުނީ ކީއްވެ؟ ބުއްދި ގަބޫލު ކުރާ ޖަވާބެއް ދެއްވާ!
ދިވެހި ރައްޔިތުންނަކީ މޮޔައިންކަމުގައި ބައްލަވާތީ ދެރަވޭ
ރައީސް މުހައްމަދު ނަޝީދު (ކ) އަދި ރައީސް މައުމޫން (ވ)
2008 ވަނަ އަހަރުގެ އިންތިހާބު ފިޔަވައި ވެރިކަމުގައި ހުންނެވި އިރު ބޭއްވި ހުރިހާ އިންތިހާބެއް ރައީސް މައުމޫން އޮޅުވާލާފައިވާ ކަމަށް ރައީސް ނަޝީދު ވިދާޅުވުމާއި ގުޅިގެން ރައީސް މައުމޫން ރައްދު ދެއްވައިފިއެވެ.
އެކަމާއި ގުޅިގެން ރައީސް މައުމޫން ކުރެއްވި ޓުވީޓެއްގައި ވަނީ 30 އަހަރު ހުރިހާ އިންތިހާބެއް އޮޅުވާލިއިރު 2008ގެ އިންތިހާބު އޮޅުވާނުލެވުނީ ކީއްވެތޯ ވިދާޅުވެ ސުވާލު އުފައްދަވާފައެވެ. އަދި ބުއްދި ގަބޫލު ކުރާ ޖަވާބެއް ދެއްވުމަށް ރައީސް މައުމޫން ވަނީ އެދިވަޑައިގަންނަވާފައެވެ. އަދި ދިވެހި ރައްޔިތުންނަކީ މޮޔައިންކަމުގައި ބައްލަވާތީ ހިތާމަ ކުރައްވާ ކަމަށް ރައީސް މައުމޫން ފާހަގަކުރެއްވިއެވެ.
ރައީސް މައުމޫން މިހެން ވިދާޅުވީ، ރާއްޖޭގައި އޮންނަން ފެންނަނީ ރިޔާސީ ނިޒާމެއްތޯ ނުވަތަ ބަރުލަމާނީ ވެރިކަމެއްތޯ ބެލުމަށް ނެގި ފެންނަން ނުފެންނަ ވޯޓު ކުރީގެ ރައީސް މައުމޫން އަބްދުލްގައްޔޫމް އޮޅުވާލެއްވި ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް ނަޝީދު ވިދާޅުވެފައިވަނިކޮށެވެ.
އަދި، ނުސީދާ ގޮތެއްގައި ރައީސް ނަޝީދު ވަނީ ރައީސް މައުމޫންގެ ހަޔާތްޕުޅުގައި ކޮންމެ ވޯޓެއް އެ މަނިކުފާނު އޮޅުވާލައްވާ މަކަރު ހައްދަވާފައި ކަމަށް ވިދާޅުވެފައެވެ. އަދި 2007 ގެ ނިޒާމްގެ ވޯޓު ވެސް ކަނޑައެޅިގެން އޮޅުވާލެއްވި ކަމަށާއި، ރައީސް މައުމޫނަށް އޮޅުވާނުލެއްވުނީ ހަމައެކަނި 2008 ގެ ވޯޓު ކަމަށެވެ. އަދި އެއިންވީ ބަލި ކަމަށް ރައީސް ނަޝީދު ވިދާޅުވެފައިވެއެވެ.
