ޓެކްސް ނެގުމާއި ބެހޭ އިދާރީ ޤާނޫނުގެ 56 ވަނަ މާއްދާގެ ދަށުން ޓެކްސް އެޕީލް ޓްރައިބިޔުނަލްގެ ހުސްވެފައިވާ މަގާމަށާއި މޯލްޑިވްސް އިންލެންޑް ރިވެނިއު އޮތޯރިޓީ (މީރާ)ގެ ބޯޑުގެ ހަތަރު މެމްބަރުން އައްޔަނު ކުރުމަށް ރައްޔިތުންގެ މަޖިލީހުން ރުހުންދީފިއެވެ.
ޓެކްސް އެޕީލް ޓްރައިބިޔުނަލްގެ ޤާނޫނީ ދާއިރާއިން ހުސްވެފައިވާ މަގާމަށް ދެ ބޭފުޅެއް ކުރިމަތިލެއްވިއިރު، މި މަގާމަށް އައްޔަނު ކުރުމަށް މަޖިލީހުން ރުހުން ދީފައިވަނީ 65 މެމްބަރުންގެ ވޯޓާއި އެކު އަލްއުސްތާޛު މުހައްމަދު މުނައްވަރު އަލީ އަށެވެ.
ދެން މި މަގާމަށް ކުރިމަތިލެއްވީ އަލްއުސްތާޛާ ޝީރީން ނާހިދާ އަލީ އެވެ. އެހެންނަމަވެސް، މުނައްވަރަށް ޖަލްސާއަށް ހާޒިރުވެ ތިއްބެވި މެމްބަރުންގެ އަގުލަބިއްޔަތު ލިބުމުން ޝީރީންގެ ނަމަކަށް ވޯޓަށް އަހާފައެއް ނުވެއެވެ.
ޓެކްސް އެޕީލް ޓްރައިބިޔުނަލް އަކީ ޓެކްސްއާ ބެހޭ ޤާނޫނުތަކާއި އެއްގޮތްވާ ގޮތުގެ މަތިން ހުށަހެޅޭ ޓެކްސްއާ ގުޅޭ މައްސަލަތައް ބެލުމަށް ޓެކްސް ނެގުމާއި ބެހޭ އިދާރީ ޤާނޫނުގެ ދަށުން އުފައްދާފައިވާ ޓްރައިބިޔުނަލް އެކެވެ. ޓްރައިބިޔުނަލްގައި 5 މެމްބަރުން ތިއްބަވަން ޖެހެއެވެ.
މީގެ އިތުރުން، ރައްޔިތުންގެ މަޖިލީހުން ވަނީ މީރާގެ ބޯޑަށް ހަތަރު މެމްބަރެއް އައްޔަނުކުރުމަށް ވެސް ރުހުންދީފައެވެ. އެއީ މުމްތާޒް އަބްދުއްރަޝީދު (65 ވޯޓު) އާއި ލީނާ މުހައްމަދު ޒާހިރު ހުސައިން (65 ވޯޓު) އާއި ހުޝާމް ވަހީދު (66 ވޯޓު)ގެ އިތުރުން އާއިޝަތު އަޝާ އަލީ (66 ވޯޓު)ވެ.
މި މަގާމަށް ކުރިމަތިލެއްވި އަލީ އިރުފާނުގެ ނަމަށް ވޯޓަށް އެހިނަމަވެސް، މަޖިލީހުން ނިންމީ އޭނާ އެ މަގާމަށް އައްޔަނު ކުރަން ނުފެންނަ ކަމަށެވެ.
ރައީސުލްޖުމްހޫރިއްޔާގެ އޮފީހުން މީރާގެ ބޯޑަށް ކުރިމަތިލުމުގެ ފުރުސަތު ހުޅުވާލީ މީރާގެ މެންބަރަކު އިސްތިއުފާ ދެއްވުމުގެ އިތުރުން، އެ ބޯޑުގެ ތިން މެންބަރެއްގެ ދައުރު ހަމަވާތީ އެވެ. އެގޮތުން، މިމަގާމުތަކަށް ކުރިމަތި ލެއްވި ބޭފުޅުންގެ ތެރެއިން 8 ބޭފުޅެއްގެ ނަން ރައީސުލްޖުމްޖުމްހޫރިއްޔާ ވަނީ މަޖިލީހަށް ފޮނުއްވިއިރު ނަންތައް ދިރާސާކުރި އިގްތިސާދީ ކޮމިޓީން ތަޅުމަށް ފޮނުވާފައިވަނީ ފަސް ފަރާތެއްގެ ނަމެވެ.
މީރާގެ ބޯޑުގައި ހަތް މެމްބަރުން ހިމެނޭ އިރު އޭގެ ތެރޭގައި ހިމެނެނީ ފިނޭންސް މިނިސްޓަރު ކަނޑައަޅާ ފަރާތަކާއި ރައީސުލްޖުމްހޫރިއްޔާ އައްޔަނުކުރައްވާ ފަސް މެމްބަރުންގެ އިތުރުން ކޮމިޝަނާ ޖެނެރަލް އޮފް ޓެކްސޭޝަނެވެ.
މީރާގެ ބޯޑުގެ ޗެއަރޕާސަން ކަނޑައެޅުމުގެ ބާރު އޮންނަނީ ފިނޭންސް މިނިސްޓްރީއަށެވެ. މީރާގެ ބޯޑުގެ ޗެއާރޕާސަންއަކީ ފިނޭންސް މިނިސްޓްރީގެ ޗީފް ފައިނޭންސް ބަޖެޓް އެގްޒެކްޓިވް، އަހުމަދު ސަރުވަޝް އާދަމް އެވެ.
