އަތޮޅު ތެރޭގައި ވިޔަފާރިކުރާ ފަރާތްތަކުގެ ތެރެއިން މިދިޔަ އަހަރުގެ ފަހު ތިން މަހުގެ ޖީއެސްޓީ ބަޔާން ހުށަނާޅާ ފަރާތްތަކާއި ޖީއެސްޓީ ނުދައްކާ ފަރާތްތަކުގެ މައުލޫމާތު ދައުލަތުގެ ޓެކްސް އިދާރާ މޯލްޑިވްސް އިންލަންޑް ރެވެނިއު އޮތޯރިޓީ (މީރާ) އިން ހާމަކޮށްފިއެވެ.

މި ލިސްޓުގައި ޓޫރިޒަމް ދާއިރާގައި ވިޔަފާރިކުރާ 10 ފަރާތެއް ހިމެނެ އެވެ.  އަދި އެނޫން އެހެން ދާއިރާތަކުގައި ވިޔަފާރި ކުރާ 53 ފަރާތަކާ އެކު ޖުމުލަ 63 ފަރާތެއްގެ ނަން ހިމެނެއެވެ.

މީރާ އިން ބުނީ ޖީއެސްޓީ ނުދައްކާ ފަރާތްތަކުގެ މައުލޫމާތު ހާމަކުރުމުގެ ކުރިން އެ ފަރާތްތަކަށް އެކި ފަހަރު މަތިން ފޯނުން ގުޅައި، ޓެކްސް ނުދައްކާ ފަރާތްތަކަށް ގާނޫނުގައި ކަނޑައަޅައިފައިވާ އަދަބުތައް ހަދާންކޮށްދިނުމުގެ މަސައްކަތް ކުރަމުންގެންދާ ކަމަށެވެ.

މީގެ އިތުރުން އެސްއެމްއެސްގެ ޒަރީއާއިންނާ އެ ތަންތަނަށް ޒިޔާރަތްކޮށްގެން ވެސް އެ ފަރާތްތަކަށް އެ ކަން އެންގުމުގެ މަސައްކަތްކޮށްފައިވާނެ ކަމަށް މީރާއިން ބުނެ އެވެ.

މީގެ އިތުރުން، މީރާ އިން ވަނީ މާލެ ސަރަހައްދުގައި ވިޔަފާރިކުރާ ފަރާތްތަކުގެ ތެރެއިން މިދިޔަ އަހަރުގެ ފަހު ތިން މަހުގެ ޖީއެސްޓީ ބަޔާން ހުށަނާޅާ ފަރާތްތަކާއި ޖީއެސްޓީ ނުދައްކާ ފަރާތްތަކުގެ މައުލޫމާތު ގެޒެޓްގައި ޝާއިއު ކޮށްފަ އެވެ.

މިދިޔަ ހޯމަ ދުވަހު އާއްމު ކުރި މި މައުލޫމާތުގައި  ޓޫރިޒަމް ދާއިރާގައި ވިޔަފާރިކުރާ 13 ފަރާތަކާއި އެ ނޫން ދާއިރާތަކުގައި ވިޔަފާރިކުރާ 69 ފަރާތަކާއެކު ޖުމުލަ 82 ފަރާތެއްގެ ނަން މީރާ އިން ވަނީ އާއްމުކޮށްފަ އެވެ.

މީރާގެ އެންފޯސްމަންޓް ޕޮލިސީގައި ވާގޮތުން މި ލިސްޓު ދިވެހި ސަރުކާރުގެ ގެޒެޓްގައި ޝާއިއު ކުރުމަށް ވެސް ވަނީ ހަމަޖެހިފައެވެ.

މީރާއިން އަންނަނީ ދޭތެރެ ދޭތެރެއިން ޓެކްސް ނުދުއްކާ ފަރާތްތަކުގެ މައުލޫމާތު ހާމަކުރަމުންނެވެ. އަދި ޓެކްސް ނުދައްކާ ފަރާތްތަކާއި ގުޅޭ މައްސަލަތައް ކޯޓަށް ހުށަހަޅާ، ގާނޫނުން ދެއްކުމަށް ލާޒިމްކުރާ ޓެކްސްތައް އަންނަނީ ދައްކަމުންނެވެ.