މަތީ ތައުލީމް ބިލްގެ ސަބަބުން ނިޒާމަށް އިތުބާރު ބޮޑުވެގެން ދާނެ: މިނިސްޓަރު

މަތީ ތައުލީމް ބިލުގެ ސަބަބުން ރައްޔިތުންގެ މެދުގައި ނިޒާމަށް އޮންނަ އިތުބާރު ބޮޑުވެގެންދާނެކަމަށް ހަޔަރ އެޑިއެކޭޝަން މިނިސްޓަރު ޑރ. އިބްރާހިމް ހަސަން (ޗަބީ) ވިދާޅުވެއްޖެ އެވެ.

ހޯމަ ދުވަހު ކުރިޔަށް ދިޔަ ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމެޓީއަށް، މަތީ ތައުލީމުގެ ބިލާ ގުޅޭގޮތުން ހަޔަރ އެޑިއުކޭޝަން މިނިސްޓަރު ހިމެނޭ ގޮތަށް އެ މިނިސްޓްރީގެ އިސްވެރިން ވަނީ ހާޒިރުކޮށްފައެވެ.

ކޮމިޓީގައި ވާހަކަ ދައްކަވަމުން ޑރ. އިބްރާހިމް ހަސަން ވިދާޅުވީ، އެ ބިލުގެ ސަބަބުން ހުނަރުވެރި ފަންނުވެރި ޒުވާނުން މަސައްކަތުގެ ބާޒާރަށް ނެރުމަށް އިތުރު ބާރެއް ލިބިގެން ދާނެ ކަމަށެވެ. ޕްރައިވެޓް ސެކްޓަރުން ހަޔަރ އެޑިޔުކޭޝަނަށް ކުރާ އިންވެސްޓްމަންޓްތަކަށް ގާނޫނީ ރައްކާތެރިކަން ލިބެގެންދާނެ ކަމަށް މިނިސްޓަރު ވިދާޅުވި އެވެ. ޑރ. އިބްރާހިމް ހަސަން ވިދާޅުވީ، ބިލުގެ ސަބަބުން ރާއްޖޭގައި ފުރަތަމަ ފަހަރަށް ގާނޫނީ އޮނިގަނޑެއްގެ ތެރެއިން ޕްރައިވެޓް ޔުނިވަރސިޓީތައް އުފެއްދުމުގެ މަގު ފަހިވެގެން ދާނެ ކަމަށެވެ.

އެއަށްފަހު މިނިސްޓަރު ވިދާޅުވީ، މި ބިލަކީ ދިވެހިރާއްޖޭގައި މަތީ ތައުލީމާއި ތަމްރީން ދިނުމުގެ އަސާސްތަކާއި އުސޫލުތައް ކަނޑައަޅައި ތަންފީޒްކުރުމުގެ މުހިއްމު މަގްސަދުގައި ފަރުމާކުރެވިފައިވާ ބިލެއް ކަމަށެވެ.

މި ބިލުގެ ސަބަބުން ދައުލަތުގެ ހިންގުން ހަރުދަނާވެ ހަރަދު ކުޑަވެގެންދާނެތޯ ކުރެއްވުނު ސުވާލުތަކާއި ގުޅިގެން ޖަވާބު ދެއްވަމުން މިނިސްޓަރު ވިދާޅުވީ، ތައުލީމީ ކަންކަމުގައި ލިބޭނެ މަންފާއާއި ފައިދާ ކުރު މުއްދަތެއްގެ ތެރޭގައި ފެންނަން ނުހުންނާނެ ކަމަށާއި ގިނަފަރަށް ކަމެއް ވަކި ގޮތަކަށް އޮތުމުގެ މުހިއްމުކަން ފާހަގަވެގެން ދާނީ ކޮންމެވެސް ބޮޑު މައްސަލައެއް ސިސްޓަމްގެ ތެރެއިން ދިމާވުމުން ކަމަށެވެ. އަދި ތައުލީމީ ކަންކަން ފައިސާއިން އަގުމަގު ކުރަން ދަތިވާނެ ކަންވެސް ފާހަގަކުރެއްވިއެވެ.

އެމްކިޔުއޭ އާއި ޓިވެޓް އޮތޯރިޓީއާއި އަދި އަލަށް ގާއިމް ކުރަން ހުށަހަޅާފައިވާ ރިސާޗް ކައުންސިލް ފަދަ ތަންތަނުގެ ސަބަބުން ދައުލަތުގެ ހަރަދު ބޮޑުވެގެން ނުދާނެތޯ މެންބަރުން ސުވާލު އުފެއްދެވިއެވެ.

މިނިސްޓްރީގެ ފަރާތުން ބައިވެރިވެ ވަޑައިގެންނެވި ބޭފުޅުން އެ ސުވާލަށް ޖަވާބުދެއްވަމުން ފާހަގަކުރެއްވީ އެފަދަ އިދާރާތައް ވަކިވަކި އިދާރާތަކުގެ ގޮތުގައި ހިންގުމުގެ އެންމެ ބޮޑު ބޭނުމަކީ މިއިން ކޮންމެ އިދާރާއަކަށްވެސް އެ އިދާރާއެއްގެ މެންޑޭޓްގައިވާ ކަންކަން ވީހާވެސް މިނިވަން ވިސްނުމެއްގައި، ގައުމަށް ފައިދާކުރަނިވި ގޮތެއްގައި ކުރިޔަށް ގެންދެވޭނެ މަގުފަހިކުރުން ކަމަށެވެ.

ހަމައެހެންމެ ވަކިން ހާއްސަކޮށް އެމްކިޔުއޭ ބާރުވެރިކުރުވުމަކީ މި ސަރުކާރުގެ ވައުދުތަކުގެ ތެރެއިން ވައުދެއްކަންވެސް މިނިސްޓަރ ފާހަގަކުރެއްވިއެވެ. އަދި، އެމްކިޔުއޭ ކަހަލަ އިދާރާތައް ވަކި އިދާރާއެއްގެ ގޮތުގައި ހިންގުމަކީ ދުނިޔޭގެ ގައުމުތަކުގައި އަމަލުކުރަމުން އަންނަ ބެސްޓްޕްރެކްޓިސް އެކެވެ.

ދައުލަތުގެ އެކިއެކި މުއައްސަސާތަކުގައި ތަފާތު އެކި ނަންނަމުގައި ޓްރަސްޓްފަންޑް ހަދާފައި ހުންނަކަމަށާއި ގާނޫނުގައި އެކަން ހިމަނަން ބޭނުންވާ ސަބަބާ ބެހޭ ގޮތުން މެމްބަރުން ސުވާލު ކުރުމުން މިނިސްޓްރީން ޖަވާބުދެއްވި ބޭފުޅުން ފާހަގަކުރެއްވި ގޮތުގައި މިފަދަ ފަންޑަކަށް ގާނޫނީ ބާރުވެރިކަން ދިނުމުގެ އެންމެ ބޮޑު ބޭނުމަކީ ސްޓޫޑަންޓް ލޯން ރިވޯލްވިންގ ފަންޑެއް ގާއިމްކުރުމެވެ.

އަދި ގާނޫނީ ބާރުވެރިކަން ލިބިއްޖެ ނަމަ ތައުލީމީ ދާއިރާއަށް ޑޮނޭޓް ކުރަން ޝައުގުވެރިކަން ހުންނަ ފަރާތްތަކުގެ ފަރާތުން ޑޮނޭޝަންގެ ގޮތުގައި ފައިސާ ފަންޑަށް ލިބުމުގެ ފުރުސަތު ވަރަށް ބޮޑުކަމަށާއި ރައްޔިތުންގެ މަޖިލީހުން މިނިސްޓަރ ޖަވާބުދާރީ ކުރުވުމުގެ މަސައްކަތް އިތުރަށް ފުރިހަމަވެގެން ދާނެއެވެ