"ސިރަމް އިންސްޓިޓިއުޓްގެ ވެކްސިން 73 ދުވަސް ތެރޭ ވިއްކަން ފަށާ ޚަބަރަކީ ދޮގު ޚަބަރެއް"
1600 ވޮލެންޓިއަރުންނާއި އެކު ކުރިއަށް ގެންދެވޭ ފަހު ޓްރަޔަލް ވަނީ ފަށާފައި
ވެކްސިންގެ އެންމެ ފަހުގެ އަޕްޑޭޓްތައް ލިބިގެންދާނެ ވެބްސައިޓެއް ޤާއިމު ކުރުމުގެ މަސައްކަތްވެސް ދަނީ ކުރަމުން
އިންޑިއާގެ، ސިރަމް އިންސްޓިޓިޓުގެ ކޮވިޑް-19 ވެކްސިން، 'ކޮވި ޝީލްޑް' 73 ދުވަހުގެ ތެރޭގައި ވިއްކަން ފަށާ ކަމަށް ބުނާ ޚަބަރު އެ އިންސްޓިޓިއުޓުން ދޮގު ކޮށްފިއެވެ.
އިންޑިއާ ސަރުކާރުން އެ އިންސްޓިޓިއުޓްއަށް ޚާއްސަ މެނުފެކްޗަރިންގް ލައިސަންސްއެއް ދީ، ވެކްސިންގެ ޓްރަޔަލް މަރުޙަލާތައް އަވަސް ކުރުމުގެ ފުރުސަތު ދީފައިވާކަމަށް ބޭރުގެ މީޑިއާތަކުން ރިޕޯޓުކޮށްފައިވާ ދަނޑިވަޅެއްގައި ސެރަމްއިން ބުނީ، އެއީ ކަނޑައެޅިގެން ދޮގު ޚަބަރެއް ކަމަށެވެ. އެގޮތުން ޕުނޭގައި ޤާއިމުކޮށްފައިވާ މި އިންސްޓިޓިއުޓުން އާދިއްތަ ދުވަހު ބުނީ، ވެކްސިން އާންމުކޮށް ވިއްކަން ފަށާނީ ޓެސްޓު ކުރުމުގެ ހުރިހާ މަރުޙަލާއެއް އޮންނަ އުސޫލުގެ މަތިން ނިންމައި، ލިބެން ޖެހޭ ހުރިހާ ހުއްދަތަކެއް ލިބުމަށް ފަހު ކަމަށެވެ.
1600 ވޮލެންޓިއަރުންނާއި އެކު ކުރިއަށް ގެންދެވޭ ފަހު ޓްރަޔަލް އެ އިންސްޓިޓިއުޓުން ފަށާފައިވާއިރު، މި ޓްރަޔަލްތައް ވީހާވެސް އަވަހަށް ނިންމުމަށް ދަނީ މަސައްކަތް ކުރަމުންނެވެ.
ކޮވިޑް-19 ގެ ވެކްސިންއާ ބެހޭ އެންމެ ފަހުގެ މައުލޫމާތުތައް ފޯރުކޮށްދިނުމަށް މެޑިކަލް ރިސަރޗ ބޮޑީ (އައިސީއެމްއާރް) އިން ދަނީ ކޮވިޑްގެ ވެކްސިންގެ އެންމެ ފަހުގެ އަޕްޑޭޓްތައް ލިބިގެންދާނެ ވެބްސައިޓެއް ޤާއިމު ކުރުމުގެ މަސައްކަތްވެސް ކުރަމުންނެވެ. މި ވެބްސައިޓުގައި އިންޑިއާގެ އިތުރުން، ބޭރުގެ ޤައުމުތަކުން މި ވައިރަސްއަށް ވެކްސިނެއް ހޯދުމަށް ކުރަމުންދާ މަސައްކަތްތަކުގެ ފަހުގެ މައުލޫމާތުތައް ލިބެން ހުންނާނެ ކަމަށް އިންޑިއާގެ ނޫސްތަކުން ރިޕޯޓް ކޮށްފައިވެއެވެ.
