ރާއްޖެއިން ދަތިކަމެއް ނެތި ބަޓަރު ލިބެން އެބަހުރި

ރާއްޖެއިން ދަތިކަމެއް ނެތި ބަޓަރު ލިބެން އެބަހުރި ކަމަށް ވިޔަފާރިވެރިން ބުނެފިއެވެ.

ރާއްޖޭގެ ބާޒާރުން ބަޓަރު ހުސްވެފައިވާ ކަމަށް ބައެއް މީޑިއާތަކުގައި ވަނީ ރިޕޯޓްކޮށްފައެވެ. އެކަމާއި ގުޅިގެން ބައެއް ވިޔަފާރިވެރިން ބުނީ މީގެ ކުރިން ބާޒާރުން ބަޓަރު ހުސްވި ނަމަވެސް މިހާރު އެއްވެސް ދަތިކަމެއް ނެތި ލިބޭނެ އެބަހުރި ކަމަށެވެ.

ރާއްޖެއެމްވީއަށް މައުލޫމާތު ދެއްވަމުން ރާއްޖޭގައި ފުޅާދާއިރާއެއްގައި ވިޔަފާރި ކުރަމުން އަންނަ އެއް ފިހާރަ ކަމަށްވާ ރެޑްވޭވް އިން ބުނީ ބާޒާރުން ބަޓަރު ހުސްވުމާއި ގުޅިގެން އެއަރ ފްރައިޓްކޮށް މިހާރު ޝިޕްމަންޓެއް ގެނެސްފައިވާ ކަމަށެވެ. އަދި އެއަރ ފްރައިޓްކޮށް ޝިޕްމަންޓެއް ގެނައުމުން މިހާރު ބަޓަރުގެ އަގު އުފުލިފައިވާ ކަމަށެވެ. އެގޮތުން 200ގްރާމް ބަޓަރު ކުރިން ލިބެމުން އައީ 40 ރުފިޔާއަށް ނަމަވެސް މިހާރު 200ގްރާމް ލިބެނީ 85 ރުފިޔާއަށް ރެޑްވޭވް އިން ބުނެއެވެ.

އާންމު ގޮތެއްގައި ބަޓަރު ބޭނުން ކުރަނީ ކޭކާއި ޕޭސްޓްރީ އަދި ފޮނި ތަކެތި ފިހުމަށެވެ.