ލ. މައިބައިދޫ ބަނދަރުގެ އައު ނެރުގެ މަސައްކަތް ނިމިއްޖެ، ކުރި އުންމީދު ހަގީގަތަކަށް ވެއްޖެ: ކައުންސިލް
މި މައްސަލަ ހައްލުކުރުމަށް 2018ގެ ރިޔާސީ އިންތިހާބުގައި ރައީސް ވައުދުވި
ލ. މައިބައިދު އައު ނެރު ހެދުމުގެ މަޝްރޫއު ނިމުން
ލ. އަތޮޅު މައިބައިދޫގެ މަސައްކަތް ނިމުމާއި އެކު ރައްޔިތުން ކުރި އެތައް އުންމީދުތަކެއް ހަގީގަތަކަށް ވެއްޖެކަމަށް އެ ރަށު ކައުންސިލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން މައިބައިދޫ ކައުންސިލްގެ މެމްބަރ، އިބްރާހިމް ޝަރީފް ވިދާޅުވީ ނެރުގެ މައްސަލަ ހައްލު ކުރުމަށް އެންމެ ފުރަތަމަ އެދުނީ 2018 ވަނަ އަހަރުގެ ރިޔާސީ އިންތިހާބުގައި ރައީސް ސޯލިހު އެ ރަށަށް ކުރެއްވި ދަތުރުފުޅުގައި ކަމަށެވެ. އެގޮތުން، ރައްޔިތުންގެ ފަރާތުން ކަންބޮޑުވުންތައް ހިއްސާ ކުރުމުން އެކަންކަން ހައްލު ކޮށްދެއްވާނެކަމަށް ވައުދުވެވަޑައިގެންނެވި އޭނާ ވިދާޅުވިއެވެ.
ކުރީގައި ނެރު ހަދާފައި އޮތް ގޮތުން، ރައްޔިތުން އުފުލަން ޖެހޭ ތަކުލީފުތައް ހިއްސާ ކުރައްވަމުން ޝަރީފް ވިދާޅުވީ މޫސުން ގޯސް ދުވަސްވަރުގައި ބަނދަރަށް ރާޅު އަރައި އޮޑިފަހަރަށް ގެއްލުންވެދާނެތީ އެކަމަށް ފާރަޔަަށް ތިބެން ޖެހޭ ކަމަށެވެ. އަދި، ނެރު ހަދައިފައި އޮތް ގޮތުން، ރާޅު ގަދަވާ ވަގުތު ކައުންސިލް އިމާރާތުގައި ހުންނަ ރެސްޓޯރަންޓާއި ހަމަޔަށް ރާޅު އަރާ ކަމަށާއި، ބޮޑެތި ގެއްލުންތައްވާ ކަމަށެވެ. އޭނާ ވަނީ މި މަސައްކަތް އަވަހަށް ނިންމީތީ ރައްޔިތުންގެ ފަރާތުން ސަރުކާރަށާއި އެމްޓީސީސީ އަށް ޝުކުރު އަދާކޮށްފައެވެ.
މިނިސްޓްރީއޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ފަރާތުން އެމްޓީސީސީއާއި މި މަޝްރޫއު ހަވާލުކޮށް އެއްބަސްވުމުގައި ސޮއިކުރީ 04 އޯގަސްޓް 2019ގައެެވެ. 16 ޖެނުއަރީ 2020 ގައި އަމަލީ މަސައްކަތް ފަށައި މި ހިނގާ އޯގަސްޓް މަހުގެ 18 ވަނަ ދުވަހު ނެރު ހެދުމުގެ ހުރިހާ މަސައްކަތެއް ނިންމާފައިވާ ކަމަށް އެމްޓީސީސީން ވަނީ ބުނެފައެވެ.
22.4 މިލިއަން ރުފިޔާ އަށް ކުރިޔަށް ގެންދިޔަ މި މަޝްރޫޢުގެ ތެރެއިން ކުރީގައި ކަނޑާފައި އިން ނެރު ބަންދު ކުރުމުގެ މަސައްކަތާއި އާ ނެރެއް ކެނޑުމުގެ މަސައްކަތް ވަނީ ނިމިފައެވެ. އަދި މި މަޝްރޫޢުގެ ތެރޭގައި 17,503.96 ކިއުބިކް މީޓަރުގެ ސަރަހައްދެއްގެ ނެރު ފުންކުރުމާއި، 253 މީޓަރުގެ ސަރަހައްދެއްގައި ބޭރުތޮށި ލުމާއި، 83 މީޓަރުގެ ސަރަޙައްދެއްގައި ރިވެޓްމެންޓް ޖެހުމާއި، މަގުބައްތި ހަރުކުރުން ހިމެނެއެވެ.
