ޝިޕިންގެ އެޖޭންޓްގެ ގޮތުގައި 112 ކުންފުންޏެއް ރަޖިސްޓްރީ ކުރަން ހުށަހަޅާފައިވޭ: ޓްރާންސްޕޯޓް އޮތޯރިޓީ
ޝިޕިންގ އެޖެންޓް، ފްރައިޓް ފޯވަޑް ކުންފުނިތަކުން ބޮޑެތި ފީތައް ނަގާ، 500 ޑޮލަރުގެ މުދަލުން 1000 ޑޮލަރު ވެސް ނަގަމުންދޭ، އެކިފަހަރު އެކި އަދަދުތަކުން ނަގަމުންދޭ
ޓްރާންސްޕޯޓް އޮތޯރިޓީގެ ސްޓޭޓް މިނިސްޓަރ އަހުމަދު އާދިލް: ޝިޕިންގ އެޖެންޓް، ފްރައިޓް ފޯވަޑް ކުންފުނިތަކުން ބޮޑެތި ފީތައް ނަގަމުންދާ މައްސަލައަކީ ބޮޑު މައްސަލައެއް
ޝިޕިންގ އެޖޭންޓްގެ ގޮތުގައި ރެޖިސްޓްރީ ކުރުމަށް 112 ކުންފުންޏެއް މިހާތަނަށް ރެޖިސްޓްރީ ކުރުމަށް ހުށަހަޅާފައިވާ ކަމަށް ޓްރާންސްޕޯޓް އޮތޯރިޓީން ބުނެއެވެ.
ރާއްޖެޓީވީގެ "ފަށާއިރު" ޕްރޮގްރާމްގައި މައުލޫމާތު ދެއްވަމުން، ޓްރާންސްޕޯޓް އޮތޯރިޓީ ހިނގެވުމާ ހަވާލުވެ ހުންނެވި، ޓްރާންސްޕޯޓް މިނިސްޓްރީގެ ސްޓޭޓް މިނިސްޓަރ އަހުމަދު އާދިލް ވިދާޅުވީ، ޝިޕިންގ އެޖޭންޓުންގެ ގޮތުގައި ރެޖިސްޓްރީ ކުރުމަށް ހުށަހަޅާފައިވާ 112 ކުންފުނީގެ ތެރެއިން މިހާތަނަށް 21 ކުންފުނި ރެޖިސްޓްރީ ކުރެވިފައިވާ ކަމަށެވެ.
ޓްރާންސްޕޯޓް އޮތޯރިޓީން ވަނީ، މިދިއަ ޖުލައި މަހު 16 ވަނަ ދުވަހު އެ އޮތޯރިޓީން ސަރުކާރުގެ ގެޒެޓްގައި ޝާއިއު ކޮށްފައެވެ. އަދި އެ ދުވަހުން ފެށިގެން ޝިޕިންގ އެޖެންސީގެ ހިދްމަތް ދިނުމާ ބެހޭ ގަވާއިދާ އަމަލު ކުރަން ފަށާފައެވެ. އެ ގަވާއިދުގެ ދަށުން، އޮގަސްޓް 16 ވަނަ ދުވަހުގެ ކުރިން ޝިޕިންގ އެޖޭންސީ ރަޖިސްޓްރީ ކުރަން ޖެހެއެވެ. ނަމަވެސް ޓްރާންސްޕޯޓް އޮތޯރިޓީގެ އޮފީސް ބަދަލުވުމާއި ހިދުމަތް ދިނުމުގައި ދަތިތަކެއް ދިމާވުމުން ޓްރާންސްޕޯޓް އޮތޯރިޓީން ވަނީ ޝިޕިންގ އެޖޭންސީ ރަޖިސްޓްރީ ވުމަށް ސެޕްޓެމްބަރު 15 ވަނަ ދުވަހުގެ ނިޔަލަށް އިތުރުކޮށްފައެވެ.
އެ ގަވާއިދު ބުނާ ގޮތުން، ދިވެހިރާއްޖޭގައި ޝިޕިންގ އެޖެންޓު ނުވަތަ ފުރައިޓު ފޯވަޑަރެއް ޑެލިވަރީ އޯޑަރ ދޫކުރުމަށް ޝިޕިންގ އެޖެންޓު ނުވަތަ ފުރައިޓު ފޯވާޑަރ ސީދާ ގޮތުންނާއި ނުސީދާ ގޮތުންވިޔަސް ކޮންސައިނީގެ އަތުން ފުރައިޓުގެ އިތުރަށް ފީއެއްގެ ގޮތުގައި ނެގޭނީ ޑެލިވަރީ އޯޑަރަށް އެޑްމިނިސްޓްރޭޓިވް ފީއެއްގެ ގޮތުގައި ގިނަވެގެން -/500 (ފަސްސަތޭކަ) ރުފިޔާއެވެ.
ނަމަވެސް މިފަދަ ބައެއް އެޖެންޓުން ދިވެހި ވިޔަފާރިވެރިން އަތުން ބޮޑެތި އަދަދުތަކުން ފައިސާ ނަގަމުންދާ ކަމަށްދާތީ، ވަރަށް ގިނަ ޝަކުވާތައް ދިވެހި ވިޔަފާރިވެރިންގެ ފަރާތުން ލިބެމުންދާ ކަމަށާއި، އެހެންކަމުން، ގާނޫނީ ބާރު ލިބިގެން ގަވާއިދު ހަދައި، މިހާރު އެ ގަވާއިދަށް އަމަލު ކުރަމުންދާ ކަމަށް ވެސް އާދިލް ވިދާޅުވި އެވެ.
މިފަދަ ޝިޕިންގ އެޖޭންޓުންގެ ގޮތުގައި ނުފޫޒު ގަދަ ދިވެހިންގެ ބަޔަކު އަޑީގައި ތިބެގެން، ހިންގަމުންދަނީ ސްރީލަންކާގެ ބައެއް ކަމަށް ވެއެވެ.
އާދިލް ވިދާޅުވީ ޝިޕިން އެޖެންޓުން ރަޖިސްޓަރކޮށްގެން، ލައިސަންސެއްގެ ދަށުން ނޫނީ ފުރައިޓް ފޯވަޑިން ހިދުމަތް ނުދެވޭނެ ގޮތަށް ޤަވާއިދެއްގެ ދަށުން ހެދީ ގިނަ ބައެއްގެ ޝަކުވާތަކެއް އެކަމާމެދު އޮތުމުން، އެކަންތައް ހައްލުކުރުމަށް ކަމަށެވެ.
މި މައްސަލާގައި މިދިއަ ހަފްތާގައި ރައްޔިތުންގެ މަޖިލީހުގެ އިގްތިޞާދީ ކޮމެޓީއަށް ވަޑައިގެން އާދިލް ވިދާޅުވެފައިވަނީ، ޝިޕިން އެޖެންޓުން ރަޖިސްޓަރކޮށްގެން، ލައިސަންސެއްގެ ދަށުން ނޫނީ ފުރައިޓް ފޯވަޑިން ހިދުމަތް ނުދެވޭނެ ގޮތަށް ޤަވާއިދެއްގެ ދަށުން ހެދީ ގިނަ ބައެއްގެ ޝަކުވާތަކެއް އެކަމާމެދު އޮތުމުން، އެކަންތައް ހައްލުކުރުމަށް ކަމަށެވެ.
އާދިލް ވިދާޅުވީ ރާއްޖޭގައި ހަރަކާތްތެރިވާ ޝިޕިން އެޖެންޓް، ފުރައިޓް ފޯވަޑް ކުންފުނިތަކުގެ 90 އިންސައްތަ ފަރާތްތަކަކީ ދިވެއްސެއްގެ ނަމުގައި ބޭރު މީހުން ހިންގާ ކުންފުނިތައް ކަމަށެވެ. އަދި ޤަވާއިދު އެކުލަވާލުމުގެ ކުރިން އެފަރާތްތަކުން ދިޔައީ ފުރައިޓް ފޯވަޑިންގެ ހިދުމަތް ދިނުމުގައި ގިނަ ފީތަކާއި، ބޮޑެތި އަގުތަކެއް ނަގަމުންކަމަށް އާދިލް ވިދާޅުވިއެވެ.
އާދިލް ވިދާޅުވީ އައު ޤަވާއިދުގެ ދަށުން މިމައްސަލަތައް ހައްލުވާނެ ކަމަށެވެ. އަދި އެ ގަވާއިދާ ހިލާފަށް ޝިޕިންގެ އެޖޭންޓްކަން ކުރާ ފަރާތްތަކާއި ގަވާއިދުގައި ބުނާ ފީ އަށް ވުރެ އިތުރު ފީއެއް ނަގާނަމަ، އެފަރާތްތަކާމެދު ފިޔަވަޅު އަޅަމުންދާނެ ކަމަށް ވެސް އާދިލް ވިދާޅުވިއެވެ.
