ޔޫތް މިނިސްޓްރީގެ ބިޑް އިވެލުއޭޝަންތައް އާއްމު ކުރަނީ
21 އޯގަސްޓު 2020 | ހުކުރު 04:37މުހިއްމު މައުލޫމާތުތަކަކަށް ވެގެންދާނެ: މިނިސްޓަރު
ޔޫތް މިނިސްޓަރު އަހުމަދު މަހްލޫފް
މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަރމެންޓުގެ ބިޑް އިވެލުއޭޝަންގެ މައުލޫމާތުތައް އަންނަ ހަފްތާއިން ފެށިގެން އާއްމު ކުރަން ނިންމައިފިއެވެ.
ބުރާސްފަތި ދުވަހުގެރޭ ޔޫތް މިނިސްޓަރު މަހްލޫފް ކުރެއްވި ޓްވީޓެއްގައި ވިދާޅުވީ، ބިޑް އިވެލުއޭޝަންތައް އާއްމުކުރަން ނިންމާފައިވަނީ ބިޑް ކުރާ ހުރިހާ ފަރާތްތަކަށް މުހިއްމު މައުލޫމާތުތަކަކަށް ވެގެންދާތީ ކަމަށެވެ. މަހްލޫފް ވިދާޅުވީ، އެ މައުލޫމާތުތައް ރައްޔިތުންނަށް އާއްމުކުރުމަކީ މުހިއްމު ކަމެއް ކަމަށެވެ.
ޔޫތް މިނިސްޓްރީގެ ބިޑް އިވެލުއޭޝަން އާއްމުކުރަން ނިންމާފައިވާއިރު، ނޭޝަނަލް ޓެންޑަރ މެދުވެރިކޮށް ކުރިއަށް ގެންދާ ބީލަންތައް އިވެލުއޭޝަން މަރުހަލާގެ ހުލާސާ، މިނިސްޓްރީ އޮފް ފިނޭންސްގެ ވެބްސައިޓުގައި ޝާއިއު ކުރަން ވަނީ ނިންމާފައެވެ.
ފިނޭންސް މިނިސްޓްރީން ބުނީ އިވެލުއޭޝަން މަރުހަލާ ހުލާސާގައި ބީލަމަށް ކުރިމަތިލީ ފަރާތްތަކާ، އެފަރާތްތަކުން ހުށަހަޅާފައިވާ އަގުތަކާ އަދި އިވެލުއޭޝަނުން ފާސްވިކަން ނުވަތަ ނުވާކަން އެނގޭނެހެން ބަޔާން ކޮށްފައިވާނެ ކަމަށެވެ. އަދި ބީލަން ކާމިޔާބުނުވާ ފަރާތްތަކުގެ، އެފަރާތްތަކަށް އިވެލުއޭޝަނުން ދަށްވި ސަބަބުގެ ހުލާސާ ވެސް ހިމަނާފައިވާ ކަމަށް މިނިސްޓްރީން ބުނެއެވެ.
