ލޯނު އުސޫލުން ރެއިނިއާ ޑޯޓްމުންޑަށް
19 އޯގަސްޓު 2020 | ބުދަ 14:41ރެއިނިއާ ޑޯޓްމުންޑަށް ބަދަލުވީ ދެ އަހަރުގެ ލޯނު އެއްބަސްވުމެއްގެ ދަށުން
ރެއާލް މެޑްރިޑްގެ ޒުވާން މިޑްފީލްޑަރު ރެއިނިއާ ޖެސޫސް
ލޯނު އެއްބަސްވުމެއްގެ ދަށުން ރެއާލް މެޑްރިޑްގެ ޒުވާން މިޑްފީލްޑަރު ރެއިނިއާ ޖެސޫސް ބޮރޫޝިއާ ޑޯޓްމުންޑަށް ބަދަލުވެއްޖެއެވެ.
ޑޯޓްމުންޑުން ބުދަ ދުވަހުގެ ވަގުތެއްގައި ވަނީ ރެއިނިއާ ލޯނު އެއްބަސްވުމެއްގެ ދަށުން އެ ކްލަބަށް ބަދަލުވިކަން ކަށަވަރުކޮށްދީފައެވެ. ރެއިނިއާ ޑޯޓްމުންޑަށް ބަދަލުވީ ދެ އަހަރުގެ އެއްބަސްވުމެއްގެ ދަށުންނެވެ.
ޑޯޓްމުންޑަށް ބަދަލުވުމަށްފަހު ރެއިނިއާ ބުނީ ޑޯޓުމުންޑަކީ ޒުވާން ކުޅުންތެރިން ކުރިއެރުވުމަށް މަސައްކަތް ކުރަމުން އަންނަ ކުލަބެއް ކަމަށާއި، އެ ކުލަބަށް ކުޅެން ލިބުމުން އެކަމާ އުފާކުރާ ކަމަށެވެ. އަދި ފުޓްބޯޅައިގައި ދަސްކުރަން ޖެހޭ ބައިވަރު ކަންކަން އެބަހުރި ކަމަށާއި، ޑޯޓްމުންޑާއެކު އެކަންކަން ދަސްކުރުމަށް ތައްޔާރަށް ހުރި ކަމަށްވެސް ވަނީ ބުނެފައެވެ.
ޑޯޓްމުންޑްގެ ސްޕޯޓިންގ ޑިރެކްޓަރު މައިކަލް ވިދާޅުވީ ރެއިނިއާގެ ސޮއި ލިބުމަކީ ކުރިއަށް އޮތް ސީޒަނަށް ޓީމަށް ލިބުނު ބޮޑު ކުރިއެރުމެއް ކަމަށާއި، އުންމީދަކީ ރެއިނިއާ އޭނާގެ އެންމެ މޮޅު ކުޅުން ޑޯޓްމުންޑުގައި ދައްކާނެ ކަމަށެވެ.
ފްލެމިންގޯއިން ރެއާލަށް ރެއިނިއާ ބަދަލުވީ މި އަހަރުގެ ޖެނުއަރީ މަހުގެ ތެރޭގައެވެ. އުމުރުން 18 އަހަރުގެ ރެއިނިއާ މި ސީޒަނުގައި ކުޅެފައިވަނީ ރެއާލްގެ ރިޒާވް ޓީމަށެވެ. މީގެ ކުރިން ފްލެމިންގޯއަށް 15 މެޗު ކުޅެދީ ހަ ލަނޑު ކާމިޔާބުކޮށްފައިވާ ރެއިނިއާ ވަނީ އެ ކްލަބާއެކު ދެކުނު އެމެރިކާގެ އެންމެ ބޮޑު ކުލަބު ފުޓްބޯޅަ މުބާރާތާއި ބްރެޒިލްގެ ލީގު ޗެމްޕިއަންކަން ހޯދާފައެވެ.
