ޔުވެންޓަސްގެ ޖަރުމަން މިޑްފީލްޑަރު އެމްރޭ ޗޭން އެ ގައުމުގެ ބޮރޫޝިއާ ޑޯޓްމުންޑަށް ބަދަލުވެއްޖެ އެވެ.

ޗޭން ޑޯޓްމުންޑަށް ބަދަލުވެފައިވަނީ ލޯނު އެއްބަސްވުމެއްގެ ދަށުންނެވެ. އެކަމަކު މި ސީޒަން ނިމުމުން 25 މިލިއަން ޔޫރޯއަށް ޗޭން ގަތުމުގެ ފުރުސަތު ޑޯޓްމުންޑަށް އޮންނާނެ އެވެ.

ޑޯޓްމުންޑުގެ ސްޕޯޓްސް ޑިރެކްޓަރު މައިކަލް ޒޯޗް ވިދާޅުވީ ޗޭންއަކީ އެޓީމަށް ވަރަށް މުހިންމު ކުޅުންތެރިއެއް ކަމަށެވެ. އެގޮތުން އެޓީމުގެ މެދުތެރެއާއި ފަހަތުގައިވެސް ޗޭންގެ ބޭނުން ހިފޭނެ ކަމަށްވެސް ވިދާޅުވި އެވެ.

ބަޔާން މިއުނިކާއި ބަޔާ ލެވަކޫސަންއަށްވެސް މީގެ ކުރިން ކުޅުނު ޗޭން އެންމެ ފުރަތަމަ ވިދާލީ ލިވަޕޫލުންނެވެ. 2014 ވަނަ އަހަރު ލިވަޕޫލަށް ބަދަލުވެ އެޓީމުގައި މޮޅު ކުޅުމެއް ދެއްކިއިރު، އޭނާ ޔުވެންޓަސްއަށް ބަދަލުވެފައިވަނީ އެއްބަސްވުން ހަމަވުމުން 2018 ވަނަ އަހަރު އެވެ.

ޔުވެންޓަސް އަށް ބަދަލުވެ 45 މެޗު ކުޅެދީފައިވީ ނަމަވެސް، ފަހަކަށް އައިސް އޭނާއަށް ވަނީ ޔުވެންޓަސްގެ ފުރަތަމަ އެގާރައިން ފުރުސަތު ގެއްލިފައެވެ. އެގޮތުން މި ސީޒަނުގެ ޗެމްޕިއަންސް ލީގުގެ ގްރޫޕް ސްޓޭޖަށް ޔުވެންޓަސް އިން އެކުވާލި ސްކޮޑުން ޖާގަ ނުލިބުމުން ކްލަބު ދޫކޮށްލަން ބޭނުންވާކަން ޗޭން ހާމަކުރި އެވެ.

ޖަރުމަންގެ ޤައުމީ ޓީމަށްވެސް މިހާތަނަށް 25 މެޗު ކުޅެދީފައިވާ ޗޭން ވަނީ ޔުވެންޓަސްއާއެކު މިދިޔަ ސީޒަނުގެ އިޓާލިއަން ލީގު ކާމިޔާބުކޮށްފައެވެ.