ހޯމް އެންޑް އަވޭ އުސޫލުން ލީގެއް ފެށުމަށް ޔޫތު މިނިސްޓަރ އަހުމަދު މަހްލޫފް އަދި ފުޓުބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލު މަޝްވަރާ ކުރައްވައިފިއެވެ.
މިނިސްޓަރ މަހްލޫފް ކުރެއްވި ޓުވީޓެއްގައި ވިދާޅުވީ، މުޅި ރާއްޖެއަށް ހުޅުވާލައިގެން ހޯމް އެންޑް އަވޭ އުސޫލުން ލީގެއް ފެށުމަށް މަޝްވަރާ ކުރެވިފައިވާ ކަމަށާއި، އެފްއޭއެމް އާއި ފުޓުބޯޅަ އާއިލާއާ ގުޅިގެން ރަނގަޅު ނަތީޖާތަކެއް ނެރެން މަސައްކަތް ކުރާނެ ކަމަށެވެ.
މިނިސްޓަރ މަހްލޫފް ވިދާޅުވީ، ބައްސާމްއާއެކު ކުރިޔަށް ގެންދިޔަ ބައްދަލުވުމުގައި ރާއްޖޭގައި ފުޓުބޯޅަ ކުރިއެރުވުމަށް އަދި ޕްރޮމޯޓު ކުރުމަށް މަޝްވަރާތަކެއް ކުރެވުނު ކަމަށެވެ.
ރާއްޖޭގައި ހޯމް އެންޑް އަވޭ އުސޫލުން މިހާތަނަށް ފުޓުބޯޅަ ލީގެއް ބާއްވާފައި ނުވާއިރު، މިހާތަނަށް ފުރަތަމަ ޑިވިޝަންގައި ހޯމް އެންޑް އަވޭ އުސުލުން މެޗެއް ކުޅެފައިވަނީ މިފަހަރުގެ ސީޒަން ހުޅުވަން ކުޅުނު ޗެރިޓީ ޝިލްޑް މެޗެވެ.
އެފްއޭއެމުން ވަނީ މީގެކުރިންވެސް ހޯމް އެންޑް އަވޭ އުސޫލުން ލީގު ބަދަލުކުރުމަށް މަޝްވަރާތަކެއް ކުރިޔަށް ގެންގޮސްފައެވެ.
