ޖަރުމަން ލީގުގައި އާދީއްތަ ދުވަހުގެރޭ ކުޅުނު މެޗުން ޕަޑާބޯން އަތުން ބޮރޫޝިއާ ޑޯޓްމުންޑް ފަސޭހަ މޮޅެއް ހޯދައިފި އެވެ.

ރަށުން ބޭރުގައި ކުޅުނު މި މެޗުން ޑޯޓްމުންޑް މޮޅުވީ 6-1 ގެ ތަފާތު ބޮޑު ނަތީޖާ އަކުންނެވެ.

އަންގާރަ ދުވަހުގެރޭ ބަޔާން މިއުނިކާ ދެކޮޅަށް ކުޅުނު މެޗުގައި ކަކުލަށް ލިބުނު އަނިޔާގެ ސަބަބުން މި މެޗުގައި ޑޯޓްމުންޑްގެ ތަރި އާލިން ހާލަންޑް ކުޅެފައެއް ނުވެ އެވެ.

މެޗުގެ ފުރަތަމަ ހާފުގައި ލަނޑެއް ނުފެނުނު ނަމަވެސް، ދެވަނަ ހާފުގެ ކުރީކޮޅު ޑޯޓްމުންޑުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 54 ވަނަ މިނެޓުގައި ޑޯޓްމުންޑަށް ލީޑު ނަގައިދިނީ ތޯގަން ހަޒާޑެވެ. އަދި އޭގެ ތިން މިނެޓު ފަހުން ޖޫލިއަން ބްރަންޓްގެ އެހީއާއެކު ޖޭޑަން ސަންޗޯ ވަނީ ޑޯޓްމުންޑަށް ލީޑު ފުޅާކޮށްދީފަ އެވެ.

އެކަމަކު މެޗުގެ 72 ވަނަ މިނެޓުގައި ޕަޑާބޯން އިން ވަނީ ފަރަގު ކުޑަކޮށްފަ އެވެ. ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބުކޮށްދިނީ އުވެ ހުނެމަޔާ އެވެ.

ޕަޑާބޯން އިން ފަރަގު ކުޑަކުރިތާ ދެ މިނެޓު ފަހުން ޑޯޓްމުންޑުން ވަނީ އަނެއްކާވެސް ލީޑު ފުޅާކޮށްފައެވެ. ތޯގަން ހަޒާޑްގެ އެހީއާއެކު މި ލަނޑު ޑޯޓްމުންޑަށް ކާމިޔާބުކޮށްދިނީ ޖޭޑަން ސަންޗޯ އެވެ. އަދި 85 ވަނަ މިނެޓުގައި އަޝްރަފް ހަކީމީ ޑޯޓްމުންޑުގެ ހަތަރުވަނަ ލަނޑު ކާމިޔާބުކުރިއިރު، އޭގެ ހަތަރު މިނެޓު ފަހުން މާސެލް ޝްމެލްޒާ ވަނީ ޑޯޓްމުންޑުގެ ފަސްވަނަ ލަނޑު ޖަހާފަ އެވެ. މެޗުގައި ސަންޗޯ އޭނާގެ ހެޓްރިކް ފުރިހަމަކުރީ އިތުރު ވަގުތުގެ ތެރޭގަ އެވެ.

މި މޮޅާއެކު ޑޯޓްމުންޑުން ވަނީ އެއްވަނައިގައި އޮތް ބަޔާންގެ ލީޑު ހަތް ޕޮއިންޓަށް ކުޑަކޮށްފަ އެވެ. ބަޔާން އެއްވަނައިގައި އޮތީ ކުޅުނު 29 މެޗުން 67 ޕޮއިންޓާއެކު އެވެ. ދެވަނައިގައި އޮތް ޑޯޓްމުންޑަށް ލިބިފައިވަނީ 29 މެޗުން 60 ޕޮއިންޓެވެ.