ކުރީގެ ކްލަބު ސަލާމަތް ކުރަން ފެލައިނީގެ ލޯނު އެހީއެއް

ކުރީގެ ކްލަބު ކަމަށްވާ ބެލްޖިއަން ޕްރޯ ލީގުގެ ސްޓެންޑާޑް ލީޖް ރެލިގޭޝަނުން ސަލާމަތްކުރުމަށްޓަކައި ތިން މިލިއަން ޑޮލަރުގެ ލޯނު އެހީއެއް ދޭން މަރުއޯން ފެލައިނީ ނިންމައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ބެލްޖިއަމް ލީގު ކެންސަލް ކުރަން އަންނަނީ މަސައްކަތް ކުރަމުންނެވެ. އެގޮތުން ލީގު މެދުކަނޑާލާފައިވާއިރު، ގިނަ ކްލަބުތަކަށް ވަނީ މާލީ ގޮންޖެހުންތަކާ ކުރިމަތިލާން ޖެހިފައެވެ.

ބެލްޖިއަމްގެ ޗެމްޕިއަންކަން 10 ފަހަރު ހޯދާފައިވާ ސްޓެންޑާޑްގެ މާލީ ހާލަތު ގޯސްވެފައިވާއިރު، ޕްރޮފެޝަނަލް ކްލަބު ލައިސަންސް ހޯދަން ފުރިހަމަކުރަން ޖެހޭ ކަންތައްތައް ކުރަން ބަޖެޓު ނެތުމުގެ ސަބަބުން އެކަން އޮތީ ނުވެއެވެ.

ޕްރޮފެޝަނަލް ކްލަބް ލައިސަންސް ދެނީ ބެލްޖިއަމް ފުޓްބޯޅަ ފެޑެރޭޝަނުން ބަލާ މިންގަނޑުން ފާސްވާ ކްލަބުތަކަށެވެ. މިދިޔަ އޭޕްރީލް މަހުގެ 10 ވަނަ ދުވަހު މުއްދަތު ހަމަވިއިރު، ސްޓެންޑާޑުން މިހާރު ވަނީ ކޯޓް މެދުވެރިކޮށް އިތުރު މުހުލަތެއް ހޯދާފައެވެ. މި މުއްދަތުގެ ތެރޭގައި އެކަން ނުކުރެވިއްޖެނަމަ، ސްޓެންޑާޑް ދަށް ޑިވިޝަނަކަށް ރެލިގޭޓްކޮށްލާނެ އެވެ.

އެއާއެކު ފެލައިނީ ވަނީ އޭނާ ކެރިއަރު ފެށި ކްބަލު ސަލާމަތް ކުރުމަށް ތިން މިލިއަން ޑޮލަރުގެ ލޯނު އެހީއެއް ދޭން ނިންމާފައެވެ. ފެލައިނީގެ އިތުރުން އެ ކްލަބަށް ކުރިން ކުޅުނު މިޑްފީލްޑަރު އެކްސެލް ވިޓްސެލް ވަނީ ކްލަބަށް މާލީ އެހީތެރިކަން ފޯރުކޮށްދިނުމުގެ ގޮތުން އެ ކްލަބުގެ ދަނޑުގެ 45 އިންސައްތަ ހިއްސާ ގަނެފައެވެ.

ސްޓެންޑާޑް އިން ކެރިއަރު ފެށި ފެލައިނީ އެ ޓީމަށް ކުޅެދިނީ 2006 ން 2008 ށެވެ. އޭގެ ފަހުން އެވަޓަން އާއި މެންޗެސްޓާ ޔުނައިޓެޑަށްވެސް އޭނާ ކުޅެދިން އިރު، މިހާރު ފެލައިނީ ކުޅެމުން އަންނަނީ ޗައިނާގެ ޝަންޑޮން ލުނެން އަށެވެ.

އުމުރުން 32 އަހަރުގެ ފެލައިނީ ދާދި ފަހުން ވަނީ ކޮވިޑް-19 އަށް ޕޮޒިޓިވްވުމުން ފަރުވާދީފައެވެ. އަދި ވައިރަހުން ރަނގަޅުވުމާއެކު މިދިޔަ މަހުގެ މެދުތެރޭގައި ވަނީ ހޮސްޕިޓަލުން ދޫކޮށްލާފައެވެ.