ދެ މަސް ދުވަހަށްފަހު ކުޅުނު ފުރަތަމަ މެޗުން ޑޯޓްމުންޑަށް ބޮޑު މޮޅެއް

ދެ މަސް ދުވަހަށް ފަހު ޖަރުމަން ލީގު އެނބުރި އައިރު، ޝާލްކާ އަތުން ބޮރޫޝިއާ ޑޯޓްމަންޑް 4-0 އިން ބޮޑު މޮޅެއް ހޯދައިފި އެވެ.

ކޮރޯނާވައިރަސް (ކޮވިޑް-19) އާ ގުޅިގެން ޖަރުމަން ލީގު މެދުކަނޑާލީ މާޗު މަހުގެ 13 ވަނަ ދުވަހު އެވެ. ޖަރުމަން ލީގުގެ ކުޅުން ހޮނިހިރު ދުވަހު ފެށިއިރު، މިއީ ޔޫރަޕްގެ ގަދަ ފަސް ލީގުގެ ތެރެއިން ކުޅުން ފެށި ފުރަތަމަ ލީގެވެ. ޖަރުމަން ލީގުގެ މެޗުތައް ކުރިއަށް ގެންދަން ނިންމާފައިވަނީ ދަނޑަށް ސަޕޯޓަރުން ނުވައްދައެވެ.

ޖަރުމަން ލީގު ފެށުމުގެ ކުރިން ހުރިހާ ކުޅުންތެރިން ކޮވިޑް-19 އަށް ޓެސްތު ކޮށްފައިވާއިރު، އަލުން މެޗުތައް ފެށީ ޓީމުތަކުން އަމަލުކުރަންޖެހޭ އުސޫލުތަކެއް ކަނޑައެޅުމަށް ފަހު އެވެ. އެ ގޮތުން މެޗު ފެށުމުގެ ކުރިން ސަލާން ކުރުން މަނާ ކޮށްފައިވާއިރު، ބެންޗުގައި ތިބޭ ކުޅުންތެރިންގެ ދެމެދުގައި ވެސް އެކަށީގެންވާ ދުރުމިނެއް ބަހައްޓަން ވަނީ އަންގާފައެވެ. އަދި މެޗު ކުޅޭ ބޯޅަތައް ޑިސްއިންފެކްޓް ކުރުމުގެ އިތުރުން، ލަނޑު ޖެހުމަށްފަހު ކުޅުންތެރިން ގައިގޯޅިވެ އުފާފާޅު ނުކުރަން ވަނީ ލަފާ ދީފައެވެ.

ހޮނިހިރު ދުވަހު މެޗުތައް އަލުން ފެށިއިރު، ޑޯޓްމުންޑުގެ ދަނޑުގައި ކުޅުނު މެޗުން އެޓީމު މޮޅުވީ ޝްލަކާ އަތުން 4-0 އިންނެވެ.

މި މެޗުގައި ޑޮޓްމުންޑަށް އެންމެ ފުރަތަމަ ލީޑު ނަގައިދިނީ މެޗުގެ 29 ވަނަ މިނެޓުގައި އާލިން ބްރައުޓް ހާލަންޑެވެ. މިއީ ޖެނުއަރީ މަހު ޑޯޓްމުންޑާ ގުޅުނު ހާލަންޑް ލީގުގައި ކާމިޔާބުކުރި 10 ވަނަ ލަނޑެވެ.

ފުރަތަމަ ހާފުގެ ފަހު މިނެޓުގައި ޑޯޓްމުންޑަށް ލީޑު ފުޅާކޮށްދިނީ ޑިފެންޑަރު ރަފައެލް ގަރޭރޯ އެވެ. ދެވަނަ ހާފު ފަށައިގެން ތިންވަނަ މިނެޓުގައި ތޯގަން ހަޒާޑް ޑޯޓްމުންޑުގެ ތިންވަނަ ލަނޑު ކާމިޔާބުކޮށްދިން އިރު، 63 ވަނަ މިނެޓުގައި ޑޯޓްމުންޑުގެ ހަތަރުވަނަ ލަނޑު ކާމިޔާބުކޮށްދިނީ ދެވަނަ ލަނޑުވެސް ކާމިޔާބުކޮށްދިން ގެރޭރޯ އެވެ.

މި މޮޅާ އެކު ދެވަނައިގައި އޮތް ޑޯޓްމުންޑް ވަނީ އެއްވަނައިގައި އޮތް ބަޔާން މިއުނިކާ އެއް ޕޮއިންޓާ ގާތަށް ޖެހިލާފައެވެ. ބަޔާނަށް 25 މެޗުން 55 ޕޮއިންޓު ލިބިފައިވާއިރު، ޑޯޓްމުންޑް ވަނީ 26 މެޗުން 54 ޕޮއިންޓު ހޯދައިފަ އެވެ. ތިންވަނައިގައި އޮތީ ހޮނިހިރު ދުވަހު އަމިއްލަ ދަނޑުގައި ފްރެއިބާގާ 1-1 އިން އެއްވަރުވި އާރްބީ ލެއިޕްޒީގް އެވެ. ލެއިޕްޒީގަށް 26 މެޗުން ލިބިފައިވަނީ 51 ޕޮއިންޓެވެ.

ދެން ޖަރުމަން ލީގުގައި ހޮނިހިރު ދުވަހުގެރޭ ކުޅުނު އެހެން މެޗުތަކުގެ ނަތީޖާ އަށް ބަލާއިރު، އޯގްސްބާގް އަތުން ވުލްފްސްބާގް ވަނީ 2-1 އިން މޮޅުވެފައެވެ. ޑުސެލްޑޯފް އާއި ޕާޑެބޮން ކުޅުނު މެޗު ލަނޑެއް ނުޖެހި އެއްވަރުވިއިރު، ހޮފެންހައިމް އަތުން ހާތާ ބާލިން މޮޅުވީ 3-0 އިންނެވެ.

ޖަރުމަން ލީގު ހޮނިހިރު ދުވަހު ފެށިއިރު، ޖޫން މަހުގެ 28 ވަނަ ދުވަހު ލީގުގެ ކުޅުން އެއްކޮށް ނިންމާލަން ޖަރުމަން ފުޓްބޯލް ލީގުން ވަނީ ނިންމާފައެވެ.