އަމީންްްގެ ކުށެއް ނެތްކަން ސާބިތުކޮށް ނުދެވޭންޏާ އެންމެ ރަނގަޅީ އިސްތިއުފާ ދިނުން: ގާސިމް
18 އޯގަސްޓު 2020 | އަންގާރަ 14:08މައްސަލަ ބަލަން ފުލުހުންގެ އިތުރުން އޭސީސީ އަށް ވަނީ ހުށައަޅާފައި
ޖޭޕީގެ ލީޑަރު ގާސިމް އިބްރާހިމް
ހެލްތް މިނިސްޓްރީގެ އޮޑިޓް ރިޕޯޓުން ފެންމަތިވި ކަންތައްތަކުގައި މިނިސްޓަރު އަބްދުﷲ އަމީންގެ ކުށެއް ނެތްކަން އޭނާ އަށް ސާބިތުކޮށް ނުދެވޭނަމަ، އެންމެ ރަނގަޅީ އަމީން މަގާމުން އިސްތިއުފާ ދެއްވުން ކަމަށް ސަރުކާރު ކޯލިޝަން ގައި ހިމެނޭ ޖުމްހޫރީ ޕާޓީގެ ލީޑަރު ގާސިމް އިބްރާހިމް ވިދާޅުވެއްޖެއެވެ.
އޮޑިޓް ރިޕޯޓުގައި ހުރި ކަންތައްތައް ތަހުގީގުކޮށް ނިމެންދެން ޖުމްހޫރީ ޕާޓިގެ ސްލޮޓެއްގައި ވަޒީރު ކަމަށް ވަޑައިގެންވި އަމީން ވަނީ އެކަހެރިވެ ވަޑައިގަންނަވާފައެވެ.
ކޮވިޑުގެ ބަލި މީހުންނަށް ފަރުވާދޭން ބޭނުންވާ ވެންޓިލޭޓަރު ގެނައުމުގައި އުސުލޫތަކުގެ ބޭރުން ހެލްތް މިނިސްޓްރީން އަމަލުކޮށްފައިވާ ގުޅޭ ގޮތުން އޮޑިޓް ރިޕޯޓުން ފެންމަތިވި މައުލޫމާތުތަކާއެކު ގާސިމް އަށް ލިބިވަޑައިގެންނެވީ ސިހުމެކެވެ.
ފޯނު މެދުވެރި ކުރައްވާ ރާއްޖެ.އެމްވީއާ ވާހަކަ ދައްކަވަމުން ގާސިމް ވިދާޅުވީ، މިނިސްޓްރީ ތެރޭގައި ގިނަ ކަންތައްތަކެއް އުސޫލުން ބޭރުން ކޮށްފައިވަނީ މިނިސްޓަރަށް އެކަށީގެންވާ ވަރަށް ޒިންމާ އަދާ ނުކުރެވެމުގެ ސަބަބުން ކަަމަށެވެ. ނަމަވެސް މައްސަލަ ނިމެންދެން، އަމީން އެކެހެރިވެ ވަޑައިގެންނެވުން ގާސިމް ސިފަކުރެއްވީ ރަނގަޅު އަދި ކެރޭ މީހުން ކުރާ ކަމެއްގެ ގޮތުގައެވެ.
މައްސަލައާއި ގުޅިގެން މިނިސްޓްރީގެ ބިޑް ކޮމިޓީގެ މެމްބަރުން ވެސް ގޭގައި މަޑުކުރަން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވަނީ އަންގާފައެވެ. ކޯފާ އިސްކުރައްވައި ވާހަކަފުޅު ދައްކަވަމުން ގާސިމް ވިދާޅުވީ، މިނިސްޓްރީގެ ބޯޑުން ނިންމާ ނިންމުން ގަބޫލުނުކުރެވެނަމަ އެކަން ރިވައިޒް ކުރަން ހުށައެޅުމުގެ ބާރު މިނިސްޓަރަށް ލިބިގެންވާ ކަމަށެވެ.
އޮޑިޓް ރިޕޯޓުގައި ހުރި ކަންތައްތައް ތަހުގީގު ކުރަން ފުލުހުންނަށާއި، އޭސީސީ އަށް ރައީސް އޮފީހުން ވަނީ ހުށައަޅާފައެވެ. އެކަމަކު ގާސިމްގެ ހިޔާލު އެކަމުގައި ތަފާތެވެ. ރައްޔިތުންގެ މަޖިލީހުގެ މާމިގިލި ދާއިރާގެ މެމްބަރުކަން ވެސް ކުރައްވާ ގާސިމް ވިދާޅުވީ، އޮޑިޓާ ޖެނެރަލް އަކީ ގާނޫނީ ގޮތުން ބާރު ލިބިފައިވާ ފަރާތަކުން ގާނޫނީ މަސްއޫލިއްޔަތުތަކަކާއި ޒިންމާތަކެއް އަދާކުރަން ހަވާލުކޮށްފައިވާ ފަރާތަކަށްވާއިރު އޮޑިޓް އޮފީހުން ރިޕޯޓުގެ ހަގީގަށް ހާމަކޮށްދޭން ޖެހޭނީ އެކަންކަން ތުހުމަތު ކުރެވުނު ފަރާތުން ނުވަތަ ޒިންމާ އަދާކުރަން ހަވާލުކޮށްފައިވާ ފަރާތްތަކުންނެވެ.
ވެންޓިލޭޓަރުތަކެއް ހޯދަން ކުރި މަސައްކަތުގެ ތެރެއިން ހެލްތް މިނިސްޓްރީގެ ބިޑް ކޮމެޓީން ބޮޑެތި އޮޅުވާލުންތަކެއް ހިންގާފައި ކަމަށް އަންގާރަ ދުވަހު ކުރިޔަށް ދިޔަ މާލިއްޔަތު ކޮމެޓީން އޮޑިޓަރ ޖެނެރަލް ހަސަން ޒިޔަތު ވަނީ ވިދާޅުވެފައެވެ.
