މީހުން މަރަން އުޅުމަކީ ބޮޑު ކުށެއް، އެފަދަ ކުށްވެރިންނާއިމެދު ސަމާލުވާންޖެހޭ: ޑރ. ޖަމީލް
މިލިއަނުން ގެއްލުނު ފައިސާ އާއި، ބެހި ރަށްތައް މަތިން ހަނދާން ނައްތާނުލެއްވޭނެ ކަމަށް ވިދާޅުވި
ކުރީގެ ނައިބުރައީސް އަދި މޯލްޑިވްސް ޔުނައިޓެޑް އޮޕޮޒިޝަންގެ ލީޑަރު، ޑރ. މުޙައްމަދު ޖަމީލް އަޙުމަދު
މީހުން މަރަން އުޅުމަކީ ބޮޑު ކުށެއް ކަމަށާ، އެފަދަ ކުށެއް ކުރާ މީހުންނާއިމެދު އަމަލުކުރަންވާނީ ވަރަށް ބޮޑަށް ސަމާލުވެގެން ކަމަށް ކުރީގެ ނައިބުރައީސް އަދި މޯލްޑިވްސް ޔުނައިޓެޑް އޮޕޮޒިޝަންގެ ލީޑަރު، ޑރ. މުޙައްމަދު ޖަމީލް އަޙުމަދު ވިދާޅުވެއްޖެއެވެ.
ބުދަ ދުވަހު ކުރެއްވި ޓްވީޓްތަކެއްގައި ޑރ. ޖަމީލް ވިދާޅުވީ، މީހުން މަރަން އުޅުމަކީ ބޮޑު ކުށެއް ކަމަށާ، އެފަދަ ކުށްކޮށްފައިވާ ފަރާތްތައްކަށް ހައްޤު އަދަބު ދިނުމަށް ޤައުމު އެކުގައި ސާބިތުވެ ތިބެން ޖެހޭ ކަމަށެވެ. އަދި މިފަދަ ނުރައްކާތެރި ކުށްވެރިންނާއިމެދު އަމަލުކުރަންޖެހޭނީ ވަރަށް ބޮޑަށް ސަމާލުވެގެން ކަމަށް އެމަނިކުފާނު ވިދާޅުވިއެވެ.
އެކި މައްސަލަތަކުގައި 33 އަހަރުގެ ޖަލު ހުކުމެއް ތަންފީޒުކުރައްވަމުން ގެންދަވާ ކުރީގެ ނައިބުރައީސް އަޙުމަދު އަދީބަށް އަމާޒުކޮށްކަމަށް ދޭހަވާ ފަދައިން ކުރައްވާފައިވާ މި ޓްވީޓްތަކުގައި ޑރ. ޖަމީލް އިތުރަށް ވިދާޅުވީ، އެމްއެމްޕީއާރްސީން ޚިޔާނަތުގެ ތެރެއިން ގެއްލިފައިވާ ފައިސާ އަދިވެސް ދައުލަތަށް ހޯދިފައިނުވާ ކަމަށާ، މިލިއަނުން ގެއްލުނު ފައިސާ އާއި ކޮރަޕްޓް ފަރާތްތަކަށް ބެހި ރަށްތަކުގެ މައްސަލަ ހަނދާންނައްތައި ނުލެވޭނެ ކަމަށެވެ.
ފުރާނައަށް ނުރައްކާވާފަދަ ބަލިތަކަކާއި ހަނގުރާމަ ކުރައްވަމުން ގެންދެވި ނަމަވެސް، ބޭސްފަރުވާއަށް ރާއްޖެއިން ބޭރަށް ވަޑައިގަތުމުގެ ފުރުޞަތު އަދީބަށް ދިނުމަށް ސަރުކާރުން ދެކޮޅުހަދާފައިވާތީ ގިނަ ބަޔަކު ސަރުކާރަށް ފާޑުކިޔަމުންދާއިރު، ޑރ. ޖަމީލްގެ އިތުރު ޓްވީޓެއްގައި ވިދާޅުވީ ހައްގުތަކުން މަހުރޫމްކުރެވިފައި އެތައް ބަޔަކު ރާއްޖޭގެ ޖަލުތަކުގައި އެބަ ތިބި ކަމަށެވެ. އަދި އޭގެ ތެރެއިން ބަޔަކު ތިބީ ބޭއިންސާފު ޝަރީއަތުން ޖަލަށް ލާފައި ކަމަށް ވިދާޅުވެ، ހަމަހިމޭނުންތިބެ، އެކަންކަން ތަހައްމަލް ކުރަމުން ގެންދާ ފަރާތްތަކުގެ ހައްގު ހޯދައިދިނުމަށް އަޑު ނުއުފުލަނީ ކީއްވެތޯ ޑރ. ޖަމީލް ވަނީ ސުވާލު އުފައްދަވާފައެވެ.
މި ކަންކަން މިފަދައިން ފާހަގަކުރެއްވުމަށްފަހު، ޑރ. ޖަމީލް ވިދާޅުވީ، ކޮންމެ ޤައިދީއަކާއިމެދުވެސް ސަރުކާރުން އަމަލުކުރަން ޖެހޭނީ އިންސާނިއްޔަތުކަމުގެ ހަމަތަކުގެ މަތިން ކަރާމާތްތެރިކަމާއިއެކު ކަމަށެވެ. އަދި އެގޮތަށް އަމަލުކުރި ނަމަވެސް ސިޔާސީ ކުށްވެރިންނާއި، ޖިނާއީ ބޮޑެތި ކުށްތައް ކޮށްފައިތިބޭ ފަރަތްތަކާއި މެދު އޮންނަ ފަރަޤު ހިފަހައްޓަންޖެހޭ ކަމަށް އެމަނިކުފާނު ވިދާޅުވިއެވެ.
އަދީބަށް ރައްދުވާކަމަށް ދޭހަވާގޮތަށް މިފަދަ ޓްވީޓްތަކެއް ޑރ. ޖަމީލް ކުރައްވާފައިވާއިރު، މި ވެރިކަމުގެ ފުރަތަމަ ނައިބުރައީސްކަމުގައި ޑރ. ޖަމީލް ހުންނަވަނިކޮށް، އެމަނިކުފާނުގެ މައްޗަށް އިތުބާރު ނެތްކަމަށް މަޖިލީހުން ފާސްކޮށް، ނައިބު ރައީސްކަން ވަނީ އަދީބާއި ހަވާލުކޮށްފައެވެ.
