ސިންގަޕޫރު ކުންފުންޏަކުން ނިއުކާސަލް ގަތުމަށް މަޝްވަރާކުރަނީ
18 އޯގަސްޓު 2020 | އަންގާރަ 14:14300 މިލިއަން ޕައުންޑަށް ނިއުކާސަލް ގަންނަން ކުރި މަސައްކަތް މީގެ ކުރިން ވަނީ ނާކާމިޔާބުވެފައި
ނިއުކާސަލް ޔުނައިޓެޑްގެ ދަނޑު ބޭރު
ނިއުކާސަލް ޔުނައިޓެޑްގެ ލެޖެންޑް އެލަން ޝިއަރާގެ އެހީއާއެކު ސިންގަޕޫރުގެ ބެއްލަގްރާފް ނޯވާ ގްރޫޕުން ނިއުކާސަލް ގަތުމަށް މަޝްވަރާކުރަމުން އަންނަ ކަމަށް އެ ގްރޫޕުން ބުނެފިއެވެ.
މީގެ ކުރިން ސައުދީގެ އިންވެސްޓަރުންގެ ބޮޑު ހިއްސާއަކާއެކު 300 މިލިއަން ޕައުންޑަށް ނިއުކާސަލް ގަންނަން އަމަންޑާ ސްޓަވިލީސްގެ ޕީސީޕީ ކެޕިޓަލް ޕާޓްނާސް އިން ވަނީ މަސައްކަތް ކޮށްފައެވެ. އަމަންޑާ އާއެކު ނިއުކާސަލް ގަތުމުގައި ހިއްސާވީ ސައުދީ އަރަބިއްޔާ ވަލީއަޙުދު މުޙައްމަދު ބިން ސަލްމާން އަލް ސައުދުގެ ހިއްސާ އޮންނަ ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިންނެވެ.
އެކަމަކު އެމަސައްކަތް ހުއްޓާލަން ޖެހުނީ އެކި ފަރާތްތަކުން ކުރިމަތި ކުރުވި ޕްރެޝަރާ އެކުގައެވެ. އެކަމަކު އެކަމަށް ނިއުކާސަލްގެ ކުރީގެ ކުޅުންތެރިން ވަނީ ނުރުހުން ފާޅުކޮށްފައެވެ. އެކުޅުންތެރިން ގަބޫލުކުރާ ގޮތުގައި ސައުދީން އިސްވެ ނިއުކާސަލް ގަތްނަމަ، އެ ކުލަބަށް ކުރިއެރުންތަކެއް އަންނާނެއެވެ.
ރިޕޯޓުތައް ބުނާ ގޮތުން ނިއުކާސަލްގެ ލެޖެންޑް އެލަން ޝިއަރާގެ އެހީތެރިކަމާއެކު ބެއްލަގްރާފް ނޯވާ ގްރޫޕުން މިހާރު ވަނީ ނިއުކާސަލް އާއެކު މަޝްވަރާތައް ފަށާފައެވެ. އަދި އެ މަސައްކަތުގައި ބޮޑު ކުރިއެރުމެއް ހޯދާފައިވާ ކަމަށްވެސް ރިޕޯޓުތައް ބުނެއެވެ. އަދި އެކަމުގައި އެލަން ޝިއަރާގެ އިތުރުން ނިއުކާސަލްގެ ކުރީގެ ކުޅުންތެރިޔާ މައިކަލް ޗޯޕްރާވެސް ބައިވެރިވެއެވެ.
ބެއްލަގްރާފް ނޯވާ ގްރޫޕްގެ ތަރުޖަމާނު ދާދި ފަހުން މީޑިއާއަށް ދިން އިންޓަވިއުއެއްގައި ވިދާޅުވީ މިހާރު ނިއުކާސަލް އާއެކު ވާހަކަ ދެކެވެމުން އަންނަނީ ޑީލް ކުރިއަށްދާނެ ގޮތަކާ މެދު ކަމަށާއި، މަޝްވަރާގެ ބައްދަލުވުންތަކުގައި ބޮޑު ކުރިއެރުންތަކެއް ލިބިފައިވާ ކަމަށެވެ.
ސިންގަޕޫރު ކުންފުންޏަކުން ނިއުކާސަލް ގަތުމަށް މަޝްވަރާކުރަމުން އަންނައިރު، މީގެ ކުރިން ސައުދީގެ އިންވެސްޓަރުންގެ ބޮޑު ހިއްސާއަކާއެކު ނިއުކާސަލް ގަތުމާ ގާތަށް ދިޔަ ނަމަވެސް، އެކަން ފަހުން ވަނީ ނާކާމިޔާބުވެފައެވެ.
ސައުދީގެ ހިއްސާދާރުންނަށް ނިއުކާސަލް ވިއްކާލުމާ ދެކޮޅަށް ވާދަވެރި ކްލަބުތަކުގެ އިތުރުން މީޑިއާ އާއި ބައެއް ބައިނަލްއަގުވާމީ ޖަމިއްޔާތަކުންވެސް އެފަހަރު އަޑުއުފިލިއެވެ. ނިއުކާސަލް ޑީލް މީގެ ކުރިން ހުއްޓުނުއިރު، ނިއުކާސަލްގެ އައު ބޯޑުގައި ރަޖިސްޓްރީކުރަން ހުށަހަޅާފައިވާ ނަންތަކާއި ސައުދީ ސަރުކާރާ ސީދާ ގުޅުމެއް ވޭތޯ ޕްރިމިއާ ލީގުން ވަނީ ބަލަން ފަށާފައެވެ.
