ނިއުކާސަލް ޔުނައިޓެޑް ވިއްކާލަނީ!

އިނގިރޭސި ޕްރިމިއާ ލީގުގެ ކްލަބް ނިއުކާސަލް ޔުނައިޓެޑް ވިއްކާލުމަށް ނިންމައިފި ކަމަށް އިނގިރޭސި މީޑީއާއިން ރިޕޯޓުކޮށްފިއެވެ.

އިނިގިރޭސިވިލާތުގެ އެންމެ ބޮޑު ނޫސް އެޖެންސީ ކަމަށްވާ 'ބީބީސީ' އިން ރިޕޯޓު ކޮށްފައިވާ ގޮތުގައި 'ޕީސީޕީ ކެޕިޓަލް' އިން 300 މިލިއަން ޕައުންޑަށް ނިއުކާސަލް ޔުނައިޓެޑް ގަންނަން ވަނީ ނިންމާފައެވެ. މި ކުންފުންޏަކީ އެ ގައުމުގެ ވިޔަފާރިވެރިއެއް ކަމަށްވާ އަމަންޑާ ސްޓީވްލީގެ ކުންފުންޏެކެވެ. މީޑީއާއިން ރިޕޯޓުކޮށްފައި ވަނީ ވިއްކާލުމުގެ މަޝްވަރާތައް މިހާރު ނިމިފައިވާ ކަމަށާއި މިހާރު އޮތީ ފައިސާގެ މުއާމަލާތްތައް ދެ ފަރާތުން ވެސް ނިންމާލުން ކަމަށެވެ.

ނިއުކާސަލް އަދި 'ޕީސީޕީ ކެޕިޓަލް' އަކުން ވެސް މިކަން ރަސްމީކޮށް ކަށަވަރު ކޮށްދީފައެއް ނުވެއެވެ.

މިވަގުތު ނިއުކާސަލްއަކީ އިނގިރޭސިވިލާތުގެ ބިލިއަނަރެއް ކަމަށްވާ މައިކް އޭޝްލީގެ ކްލަބެކެވެ. މިދިޔަ އޮކްޓޯބަރު މަހުގެ 16 ވަނަ ދުވަހު އޭޝްލީ، ނިއުކާސަލް ވިއްކާލަން ބޭނުންވާ ކަމަށް އާންމުކޮށް އިއުލާނު ކުރިއިރު އޭނާ އެންމެ ފުރަތަމަ ބުނެފައިވަނީ އެ ކްލަބް ވިއްކާލާނީ 380 މިލިއަން ޕައުންޑަށް ކަމަށެވެ. އެހެނަސް މިއަހަރު ނިންމާލުމުގެ ކުރިން އަވަހަށް ކްލަބް ވިއްކާލުމަށް މަގުފަހި ކުރުމުގެ ގޮތުން އޭނާ ވަނީ ކްލަބް ވިއްކާލުމަށް ބުނި އަދަދު ތިރި ކޮށްފައެވެ.

އޭޝްލީ ނިއުކާސަލް ގަނެފައިވަނީ 2007 އަހަރު އެވެ. އޭނާ އެފަހަރު ކްލަބް ގަނެފައިވަނީ 134.4 މިލިއަން ޕައުންޑަށް ކަމަށްވާއިރު އޭނާ ކްލަބުގެ ޗެއާމަން ކަމުގައި ހުރެ ކަންކަން ކުރާ ގޮތާއި މެދު ސަޕޯޓަރުން ވަރަށް ގިނައިން ހިތްހަމަނުޖެހުން ފާޅުކުރެއެވެ. އޭޝްލީ ނިއުކާސަލްގެ ޗެއާމަންގެ ގޮތުގައި 10 އަހަރު ހޭދަކޮށްފައިވާއިރު އޭނާގެ ޗެއާމަންކަމުގައި އެ ކްލަބް ވަނީ ދެފަހަރެއްގެ މަތިން ޕްރިމިއާ ލީގުން ރެލިގޭޓް ވެފައެވެ.

ނިއުކާސަލް މިވަގުތު އޮތީ ޕްރިމިއާ ލީގުގައި ކުޅުނު 12 މެޗުން ލިބުނު 14 ޕޮއިންޓާއެކު ތާވަލުގެ 11 ވަނައިގައެވެ.