ޕްރިމިއާ ލީގު: ނިއުކާސަލް ބަލިކޮށް ސިޓީ އަށް 15 ޕޮއިންޓްގެ ލީޑެއް
ނިއުކާސަލްގެ މައްޗަށް ސިޓީ ކުރިހޯދީ 0-1 ގެ ނަތީޖާއަކުން
ސިޓީގެ ކުޅުންތެރިން އުފާފާޅުކުރަނީ
ޕްރިމިއާ ލީގުގައި ނިއުކާސަލް ޔުނައިޓެޑް ބަލިކޮށް މެންޗެސްޓާ ސިޓީން ޕޮއިންޓް ތާވަލުގައި 15 ޕޮއިންޓްގެ ލީޑެއް ނަގައިފިއެވެ.
ބުދަ ދުވަހުގެ ރޭ ކުޅުނު މި މެޗު ނިއުކާސަލްއާ ވާދަކޮށް ސިޓީން މެޗު ކާމިޔާބުކުރީ 0-1 ގެ ނަތީޖާއަކުންނެވެ.
ނިއުކާސަލް ދަނޑުގައި ކުޅުނު މި މެޗު ފެށިގެން ބޯޅަ ކޮންޓްރޯލްކޮށްގެން ރަނގަޅަށް ކުޅުނީ ސިޓީންނެވެ. އެގޮތުން އެޓީމުން ވަނީ ނިއުކާސަލްގެ ހާފަށް ބާރުބޮޑުކޮށް ލަނޑުޖެހުމަށް ފުރުސަތުތަކެއް ތަނަވަސްކޮށްފައެވެ.
ސިޓީން މެޗުގެ ލީޑު ނެގީ 31 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ ކެވިން ޑެބްރޭނާގެ އެހީތެރިކަމާއެކު ރަހީމް ސްޓާލިންއެވެ. މި ލަނޑަށްފަހުވެސް ސިޓީން ދިޔައީ ނިއުކާސަލްގެ ހާފަށް ބާރުބޮޑުކުރަމުންނެވެ.
މެޗުގެ ފުރަތަމަ ހާފް ނިމުނީ 0-1 ގެ ނަތީޖާއިން ނިއުކާސަލްގެ މައްޗަށް ސިޓީ ކުރީގައި އޮވެގެންނެވެ.
ދެވަނަ ހާފް ފެށިގެންވެސް ރަނގަޅަށް ކުޅުނީ ސިޓީއެވެ. އެގޮތުން އެޓީމުން ވަނީ ފުލުފުލުގައި ނިއުކާސަލްގެ ހާފަށް ބާރުބޮޑުކޮށް ލަނޑު ޖެހުމަށް ގިނަ ފުރުސަތުތައް ތަނަވަސްކޮށްފައެވެ.
އެހެން ނަމަވެސް ދެވަނަ ހާފްގައި ނިއުކާސަލްއިން ވަނީ މޮޅު ޑިފެންސެއްކޮށްފައެވެ. އެޓީމުން ވަނީ ކައުންޓާގައި ސިޓީގެ ގޯލަށް ނުރައްކާ ކުރުމަށް މަސައްކަތްކޮށްފައެވެ.
މި ނަތީޖާއާއެކު ސިޓީ އޮތީ ކުޅުނު 20 މެޗުން ލިބުނު 58 ޕޮއިންޓާއެކު ޕޮއިންޓް ތާވަލުގެ އެއްވަނައިގައެވެ. ޕޮއިންޓް ތާވަލުގެ ދެވަނައިގައި 43 ޕޮއިންޓާއެކު އޮތް މެންޗެސްޓާ ޔުނައިޓެޑް އާއި ސިޓީއާ ދެމެދު 15 ޕޮއިންޓުގެ ފަރަގެއް އެބަ އޮތެވެ. މެޗުން ބަލިވި ނިއުކާސަލް އޮތީ ކުޅުނު 20 މެޗުން ލިބުނު 18 ޕޮއިންޓާއެކު ޕޮއިންޓް ތާވަލުގެ 15 ވަނައިގައެވެ.
