މަންމަ އާއި ތިން ދަރިން މަރާލުމުގެ ތުހުމަތުގައި ކުދިންގެ ބައްޕަ ހައްޔަރުކޮށްފި

އެމެރިކާގެ ޖޯޖިއާގައި އަންހެނަކާއި އޭނާގެ ތިން ކުދިން މަރާލިކަމުގެ ތުހުމަތުގައި އެކުދިންގެ ބައްޕަ ހައްޔަރުކޮށްފިއެވެ.

ކޮލަމްބަސްގެ ފުލުހުންގެ އިދާރާގެ ޗީފް ހާމަކުރި ގޮތުގައި ހަތަރު މީހުން މަރާލިކަމުގެ ތުހުމަތުގައި ހައްޔަރުކޮށްފައިވަނީ 27 އަހަރުގެ ޓްރެވޭން ބްރޭންޑަން ޖެކްސަން ކިޔާ މީހެކެވެ. އަދި ބެލެވޭ ގޮތުގައި އެއީ ތިންކުދިންގެ ބައްޕައެވެ. އަދި މަރާލި އަންހެންމީހާއާއި ލޯބީގެ ގޮތުން ގުޅިގެން އުޅޭ ފަރާތެވެ.

މަރާލެވިފައިވަނީ އުމުރުން 29 އަހަރުގެ ޖެރިކާ ސްޕެލްމެން އާއި އޭނާގެ 3 އަހަރުގެ ފިރިހެން ދަރިފުޅު ކިންގ ޖެކްސަން، އެއް އަހަރުގެ ކެންސްލީ ޖެކްސަން އަދި އެއްމަހުގެ ކްރިސްޓަން ޖެކްސަން އެވެ. ޖެކްސަން ދިރިއުޅެމުން އަންނަނީ ބުދަދުވަހު މަރާލާފައި އޮއްވާ ފެނުނު ހަތަރު މީހުންވެސް ފެނުނު ގޭގައެވެ.

ފުލުހުންގެ އިދާރާގެ ޗީފް އިތުރަށް ހާމަކޮށްފައިވާގޮތުން 2017 ވަނަ އަހަރުވެސް ޖެކްސަން ވަނީ ޖެރިކާ ސްޕެލްމެން އަށް ގެވެށި އަނިޔާ ކުރި ކަމުގެ މައްސަލައެއްގައި ހައްޔަރު ކުރެވިފައެވެ. އަދި ކޯޓް ތަކުގައިވެސް އެ މައްސަލަ ބަލާފައިވާކަމަށް އޭނާ ބުންޏެވެ.

ޖެކްސަންގެ މައްޗަށް ކުރާ ދައުވާގެ އަޑުއެހުމެއް އޮންނާނީ ހޮނިހިރު ދުވަހުގެ 9 ޖަހާއިރުއެވެ. ނަމަވެސް ލަފާ ކުރެވޭގޮތުން މި މައްސަލައިގެ އަޑުއެހުން ބޭއްވޭނެކަމަށް ބެލެވެނީ އަންނަ ހަފަތާގެ ހުކުރު ދުވަހުއެވެ.