މުޅި ލަންކާއިން ކަރަންޓް ކަނޑައިގެން ގޮސްފި

އަވައްޓެރި ސްރިލަންކާއިން ކަރަންޓް ކަނޑައިގެން ގޮސްފިއެވެ.

އެ ޤައުމުގެ ސަރުކާރާ ޙަވާލާދީ ޗެނަލް ނިއުސް އޭޝިއާ އިން ރިޕޯޓް ކޮށްފައިވާ ގޮތުން ހޯމަ ދުވަހުގެ ވަގުތެއްގައި މުޅި ލަންކާއިން ކަރަންޓް ކަނޑައިގެން ގޮސްފައިވާއިރު، ކަރަންޓް ފޯރުކޮށްދޭ މައި ޕްލާންޓުން ވެސް ކުއްލި ގޮތަކަށް މައްސަލަތަކެއް ވަނީ ދިމާވެފައެވެ.

މުޅި ޤައުމުން ކަރަންޓް ދިޔަ ސަބަބާއި ގުޅޭގޮތުން އެ ޤައުމުގެ މިނިސްޓަރ އޮފް ޕަވަރ ދުއްލާސް އަލްހަޕްރަމާ އާ ޙަވާލާދީ ނޫސްތަކުން ރިޕޯޓް ކޮށްފައިވާ ގޮތުން، "ބްލެކްއައުޓް" ދިމާވި މައިގަނޑު ސަބަބަކީ ވެރިރަށް ކޮލަމްބޯގެ ބޭރުގައި ހުރި ޕްލާންޓަކަށް ދިމާވި ޓެކްނިކަލް މައްސަލައަކާ ގުޅިގެންނެވެ. އެގޮތުން 21 މިލިއަނެއްހާ މީހުން ދިރިއުޅޭ ލަންކާއިން ކަރަންޓް ކަނޑައިގެން ގޮސްފައިވަނީ ވެސް މެންދުރުގެ ވަގުތެއްގައެވެ.

އޭގެ އިތުރުން، ބައެއް އަވަށްތަކުން 6 ގަޑިއިރު ތެރޭގައި ކަރަންޓް އައި ނަމަވެސް، ވެރިރަށް ކޮލަމްބޯއަށް ރޭގަނޑުވީއިރު ވެސް ކަރަންޓް އައިސްފައި ނުވާ ކަމަށް ރިޕޯޓްތައް ބުނެއެވެ.

ރިޕޯޓްތައް ބުނާގޮތުން މިއީ 2016 ވަނަ އަހަރަށްފަހު، އެ ޤައުމަށް އައި އެންމެ ބޮޑު "އިލެކްޓްރިކް ބްލެކްއައުޓް" އެވެ. އެގޮތުން 2016 ވަނަ އަހަރުވެސް އެ ޤައުމުން މިގޮތަށް ކަރަންޓް ގޮސްފައިވާއިރު، އޭރު ކަރަންޓު އައިސްފައިވަނީ 8 ގަޑިއިރު ފަހުންނެވެ.

ލަންކާގެ ދެބައިކުޅަ އެއްބައި ކަރަންޓް ހަކަތަ އަކީ ތާރމަލް ޕަވަރ ބޭނުން ކޮށްގެން އުފައްދާ ކަރަންޓެވެ. އެގޮތުން ހޯމަ ދުވަހަކީ ދުނިޔޭގައި މިހާތަނަށް ރެކޯޑް ކުރެވުނު އެންމެ ހޫނުގަދަ ދުވަހަށް ވުމާއެކު، ތާރމަލް އެނަރޖީ ބޭނުން ކޮށްގެން ކަރަންޓު އުފައްދާ އެމެރިކާގެ ބައެއް ސަރަޙައްދުތަކުން ކަރަންޓް ކަނޑައިގެން ގޮސްފައިވެއެވެ. އެހެން ނަމަވެސް މުޅި ލަންކާއިން ކުއްލި ގޮތަކަށް ކަރަންޓް ކެނޑެން ދިމާވި ޓެކްނިކަލް މައްސަލަ އަކީ ކޮބާކަމެއް ރިޕޯޓް ކޮށްފައެއް ނުވެއެވެ.